«Эвертон» ярим ҳи-моячиси Жеймс Маккарти «Вест Бромвич» билан учрашув (24-тур)да кўнгилсизликка учради - оёғи синди. У энди узоқ муддат майдонга тушолмайди. Ўша вазиятда Жеймс билан тўқнашиб кетган Саломон Рондон (ҳа, «Зенит»нинг собиқ ҳужумчиси) майдоннинг ўзида йиғлаб юборди. Жуда таъсирли ҳолат...

Жароҳатланган Маккартини майдондан замбилда олиб чиқишди. Тўқнашув оқибатини кўрган Рондон эса кўз ёшларини тўхтатолмади, чоғи. Саломон ўйиндан сўнг ҳам ғоят тушкун ҳолатда эди. «Жуда бўшашиб кетяпман. Ҳамкасбинг бундай жароҳатга йўлиққанида, майдондаги ўзаро рақиблик аҳамиятини буткул йўқотади. Умид қиламанки, тез орада майдонга қайтасан, Маккарти», - деб ёзди Саломон «Твиттер»даги саҳифасида. «Вест Бромвич» бош мураббийи Алан Пардью эса воқеани қуйидагича изоҳлади: «Саломоннинг умумий ҳолатига қараб, унинг ўйинни давом эттиролмаслини осонгина тушуниш мумкин эди. Қиёфасида синиш товушини эшитгани шундоқ акс этиб турарди. Рондон шунақа инсон...». Эслатма, ўйин 1:1 ҳисобида якунланди ва бу натижа икки томонни ҳам асло қониқтирмади. Фақат Рондоннинг кўнгилсизликка муносабати кўпчиликни бефарқ қолдиргани йўқ.

Ҳ.АТАВУЛЛАЕВ тайёрлади