Футзал бўйича Ўзбекистон миллий терма жамоаси Хитой Тайпейи мезбонлик қилган Осиё чемпионатида муваффақиятли тарзда иштирок этиб, якунда бронза медалини қўлга киритди.

Баҳодир Аҳмедов бошчилигидаги футзалчиларимиз 3-ўрин кечган баҳсда Ироқ терма жамоасини пенальтилар сериясига кўра 2:1 ҳисобида енгишди. Ўйиннинг асосий вақтида эса жанговор дуранг (4:4) қайд этилганди. Бу билан жамоамиз ўз тарихида тўртинчи маротаба қитъа чемпионатининг бронза медалига эга чиқди.

Умуман олганда, Ўзбекистон футзал терма жамоаси Осиё чемпионатида саккизинчи бор совриндорлар сафидан жой олди. Ҳозирча жамоамизга қитъа чемпиони бўлиш бахти насиб этмаяпти. Футзалчиларимиз охирги учта Осиё чемпионатининг барчасида совриндор бўла олишди.

Терма жамоамиз делегацияси Хитой Тайпейидан юртимизга қайтиб келгач, «Ислом Каримов номли Тошкент халқаро аэропорти»да кенг спорт жамоатчилиги Осиёнинг учинчи жамоасини тантанали равишда кутиб олди.

Биз терма жамоа сардори Артур Юнусовдан интервью олдик.

- Осиё чемпионатида кучли учликдан жой олганимиздан хурсандмиз. Бу бронза медали биз учун олтинга тенг. Боиси, бу медаль ҳам шунчаки ерда ётмайди. Бунинг учун ҳам яхшигина меҳнат қилиш керак бўлади. Озми-кўпми, бу ютуқ билан халқимизни хушнуд эта олган бўлсак, бундан бағоят хурсандмиз.

Умуман олганда, Осиё чемпионати биз учун муваффақиятли ўтди. Албатта, натижамиз бундан ҳам яхшироқ бўлиши мумкин эди. Камчиликларимиз нималардан иборат эканини жуда яхши биламиз.

Кўнгилдагидек тайёргарлик кўриш учун вақт камроқ бўлди. Осиё чемпионатининг сўнгги босқич тайёргарлиги учун 15 кун етарли муддат эмас.

- Ироқ терма жамоаси қай жиҳатлари билан бизга етарлича ташвиш туғдира олди?

- Бу ўйин медаль учун бўлди. Шунинг ўзиёқ учрашувнинг қай даражада аҳамиятга эга эканлигини кўрсатиб турибди. Ғолиб жамоа медал, мағлуб томон уйига қуруқ қўл билан қайтарди.

Шуни инобатга олган ҳар икки жамоа ҳам бу учрашувга алоҳида тайёргарлик билан келганди. Лекин учрашув чинакамига драматик кўринишга эга бўлди. Кўпчиликнинг фикрича, айнан бронза медали учун кечган учрашув Осиё чемпионатининг энг яхши ўйини бўлибди.   

- Гуруҳнинг ҳал қилувчи ўйинида Японияга имконият бой берилди. Кунчиқар юрт жамоаси айни пайтда биздан кучлими ёки шунчаки рақибларимизга омад кулиб боқдими?

- Ўйлашимча, иккинчи вариант ҳақиқатга яқинроқ. Бу билан Япония биздан кучсиз эди, демоқчимасман. Уларнинг энг катта устун жиҳати, Японияда ҳозир ички чемпионат ўзининг қизғин палласига кирган пайт.

Бизда эса 6 ойдан бери нафақат чемпионат, балки ҳеч қандай расмий ўйинлар ўтказилмаяпти. Бу ўзининг салбий таъсирини ўтказмай қўймади. Ўйин амалиёти кўпроқ бўлган японияликлар шу томондан ҳам бизни мағлуб эта олишди.

- Эрон Осиёнинг тенгсиз жамоаси, бунга ҳеч қандай шубҳа ҳам йўқ. Бу термани мағлуб этишнинг сири нимада?

- Эрон айни пайтда дунёнинг учинчи жамоаси ҳисобланади. Улар Колумбияда ўтган жаҳон чемпионатида муваффақиятли тарзда иштирок этишган эди. Ўйлашимча, Эрон даражасига етишимиз учун ҳали анча вақт керак.

Бунинг учун футзал мактабларини очишимиз лозим. Кучли рақобат юзага келган тақдирдагина кучли чемпионат ва шунга монанд терма жамоа шаклланади. Мураббий учун футзалчилар танлови кўп бўлиши керак. Эрон аллақачон бу йўлни босиб ўтган. Уларда тизим жуда яхши йўлга қўйилган.

Хитой Тайпейида ўтган Осиё чемпионатининг барча учрашувларида эронлик футзалчилар рақиб жамоаларни йирик ҳисобда мағлуб этишди. Айрим жамоалар Эронга қарши ўйинда олдиндан мағлубиятни тан олиб майдонга тушишди.    

- Ёш футзалчиларимиз терма жамоа ўйинига мослашиб кетишдими ёки бу жараён ҳамон давом этяптими?

- Жаҳон чемпионатидан сўнг тажрибали футзалчиларимиз терма жамоадаги фаолиятларини якунлашди. Уларнинг ўрнини бир гуруҳ ёш футзалчилар тўлдиришди. Терма жамоада муҳит яхши бўлгани учун ёшларнинг мослашиш жараёни қийин кечмади.

Ўтган йили Ашхобод шаҳрида ўтказилган Ёпиқ иншоотлардаги Осиё ўйинлари ҳам ёш футзалчиларимизга яхшигина тажриба мактаби вазифасини ўтаб берди.

- Аввалги Осиё чемпионати билан таққослаганда, бу сафар қайси жамоалар ўз имкониятларидан яхшироқ ўйин намойиш этишди?

- Бу саволга жавоб бериш мушкул. Чунки, икки йил олдин Тошкентда ўтган Осиё чемпионати ЖЧ йўлланмасини бериши билан аҳамиятли эди. Шу нуқтаи назардан жамоалар ҳам ўша қитъа чемпионатига бошқача ҳозирлик билан келишганди.

Ўз ўрнида биз ҳам юқори савиядаги тайёргарликка эга бўлгандик. Хорижий давлатларда бир нечта ўқув-машғулот йиғинлари ва унинг доирасида Португалия, Эрон, Озарбайжон, Қозоғистон каби кучли терма жамоаларга қарши ўртоқлик учрашувлари ўтказган эдик.

Ишончим комил, икки йилдан сўнг ўтказиладиган Осиё чемпионати бу галгисидан шиддат бобида анча ажралиб туради.

- Ўзбекистон футбол ассоциацияси қарорига кўра, янги мавсумдан футзал бўйича мамлакат чемпионати янги форматда ўтказилади. Яъни, жамоалар уй-сафар тизимида учрашувларда майдонга тушишади. Бу ўзгаришга қандай муносабат билдирасиз?

- Ҳозирча бу борада ҳеч нарса дея олмайман. Аввал янги форматдаги чемпионатда ўйнаб кўриш керак. Шу пайтгача битта тур учрашувлари учун бир шаҳарда йиғилиб, 4-5 кун ичида шунча ўйин ўтказишга тўғри келарди. Табиийки, ҳар куни кетма-кет ўйин ўтказганингиздан кейин қайсидир учрашувга келиб чарчоқ ўз сўзини айтарди.

Бу эса натижада акс этиб қоларди. Кутилмаган ўйинларда очко йўқотардик. Эшитишимча, янги тизимда бир жамоа билан икки кун ичида кетма-кет иккита учрашув ўтказасиз.

Кейин бир ҳафта хордиқ чиқариш имконияти юзага келади. Мавсумнинг қолган ўйинлари ҳам шу зайлда давом этаверади. Бир томондан бу ўзгариш яхшидек кўриняпти. Яна ким билади дейсиз?

К.АЛИМОВ суҳбатлашди