Бу галги «уик-энд» оқшомларидан Англия клублари мамлакат кубоги доирасида чорак финал иштирокчиларини аниқлаб олиш учун фойдаланишди. Етакчи бешликнинг қолган вакиллари эса миллий биринчиликлардаги навбатдаги тур учрашувларида майдонга тушишди.

Англия. Савия ўз сўзини айтди

Нуфузи жиҳатидан АПЛ билан баҳслаша оладиган мамлакат кубоги мусобақасининг чорак финал босқичи элита вакилларининг ўзаро қарама-қаршилигига айланса, ажабмас. Нимчорак финалга етиб келган қуйи дивизион жамоалари савия жиҳатидан устунроқ бўлган рақибларига имкониятни бой бердилар. Фақат «Шеффилд Уэнсдей»-«Суонси» ҳамда «Рочдейл»-«Тоттенхэм» беллашувларида ғолиб такрорий ўйиндан кейингина аниқланадиган бўлди. Афтидан, Туриндаги баҳс (ЕЧЛ, «Ювентус»-«Тоттенхэм»-2:2) «тақачилар»ни бироз толиқтириб қўйгандек. Почеттино шогирдлари Рочдейлда ғалабани ушлаб қола билмадилар. Эътиборлиси, захирадан майдонга туширилган Моура ва Кейннинг аниқ зарбаларидан кейин лондонликлар ҳисобда олдинга чиқиб олишганди. Мезбонлар вакили Дэвис қўшимча вақтнинг 3-дақиқасида ҳисобни тенглаштирди. «МЮ» эса Хаддерсфилдда мезбонга ҳеч қандай имконият қолдирмай, сафардан чорак финал йўлланмаси билан қайтди. Ёдингизда бўлса, октябрь ойида «Хаддерсфилд» номдор рақибини мағлуб этиб, қимматли уч очкодан маҳрум этганди. Бу сафар Ромелу Лукаку ҳар икки бўлимнинг дастлабки дақиқаларида биттадан гол уриб, жамоа ғалабасини таъминлади. Биринчи голга Хуан Мата ҳаммуаллифлик қилган бўлса, кейинги самарали узатма Алексис Санчес ҳисобига ёзилди. Шу тариқа бельгиялик ҳужумчининг кубок баҳсларидаги голлари 11тага етди. Чилилик касбдошининг кўрсаткичи ҳам чакки эмас - унинг ҳисобида 16 (8+8) очко бор. Шунингдек, «Челси»-«Халл Сити»-4:0, «Лестер»-«Шеффильд Юнайтед»-1:0, «Брайтон»-«Ковентри»-3:1 ва «Саутгемптон»-«Вест Бромвич»-2:1 ҳисобида ғалабага эришган жамоалар ҳам чорак финал иштирокчисига айланишди.

Испания. «РББ» учлиги ўтмишга айланмоқда

«Мальорка» тарбияланувчиси Марко Асенсиони «Реал»­га ўтганидан кейин мақтовларга кўма бошлашганди: Испания суперкубогида «Барселона» дарвозасига урган иккита голи, «Валенсия»га қарши баҳсда қайд этган «дубл»и унга мунтазам равишда майдонга тушиш имконини бераётгандек туюлганди. Бироқ тез орада Роналду сафга қайтди, Бэйл ва Бензема жароҳатдан фориғ бўлди. Оқибатда, Асенсио захирада қолиб кетди. Тўғри, Зиданнинг асосий умиди юлдузлар триоси - «РББ»дан эди. Лекин мавсум оралиқ маррадан ўтгач, мураббийнинг уэльслик ҳужумчига ва айниқса, ватандошига бўлган ишончи камайиб кетди. Асенсио эса захирадан майдонга тушиб, ўйинларга жон кирита бошлади. Унинг самарали узатмалари туфайли «Қироллик клуби» «Валенсия» (4:1) ҳамда «ПСЖ» (3:1)ни тор-мор этди. Шундан кейин ёш иқтидор соҳиби «Бетис»га қарши бошланғич таркибда майдонга тушиш ҳуқуқига эга бўлди. Таъкидлаш жоизки, Марко устозининг ишончини тўла оқлади - «Бетис» дарвозасини икки марта ишғол этиб, «Реал»нинг Ла-лигадаги 6000-голини урган футболчи сифатида тарихга кирди. Қизиғи, Асенсио ўз голларини икки хил тарзда нишонлади. Бош билан амалга оширилган дастлабки голидан сўнг қўлларини худди соч олаётгандек ҳаракатлантирди. Маълум бўлишича, у бир оғайниси билан баҳс бойлашган, агар Марко шу зайлда гол урса, дўсти сочларини тақир қилиб олдиришга ваъда берган экан. Иккинчи голдан кейин эса ҳужумчи Карвахаль билан ҳамкорликда захира ўриндиғига яқинлашиб, голни у ерда ўтирган Себальос билан нишонлади. «Бетис»нинг собиқ аъзосини маҳаллий мухлислар нохушлик билан кутиб олишган, шу сабабли Асенсио жамоадошининг кайфиятини кўтаришга уринганди.

Қаторасига қайд этилган икки дурангдан кейин «Барселона» «Эйбар» майдонидан 3 очко билан қайтди. Тан олиш керак, бу камтарин жамоа мағлубиятга учраган бўлсада, пешқадамга муносиб қаршилик кўрсата олди. Фақат тер Штегеннинг ишончли ҳаракатлари меҳмонлар дарвозаси дахлсизлигини таъминлади. Совринлар учун курашаётган жамоалар ҳам навбатдаги ғалабаларини нишонлашди. «Атлетико» Мадридда Бильбаонинг «Атлетик»идан устун (2:0) келди, «Валенсия» эса Малагада иродали ғалабага (2:1) эришди.

Германия. Иродали «Бавария»

«Бавария» дарвозабони Ульрайх ўзининг Бундеслигадаги 200-учрашувини «бўрилар уяси»да нишонлади. Бироқ мезбонлар юбилей соҳибини юз хотир қилиб ўтирмадилар - бурчакдан узатилган тўпни Бернатдан қўра баландроқ сакраган Дидави дарвозага тўғрилаб қўйди. Ана шу ягона аниқ зарба мезбонларга кичик устунлик билан танаффусга чиқиб кетиш имконини берди. Чунки, меҳмонларнинг ўйини умуман қовушмади. Афтидан, Хайнкеснинг бошланғич таркибда 8та ўзгаришни амалга оширгани ўзининг салбий таъсирини кўрсатгандек эди. Танаффусдан кейин Арьен Роббен пенальтидан унумли фойдаланолмай, мувозанатни тиклаш имкониятини йўққа чиқарди. Ваҳоланки, у 2012 йилдаги ЕЧЛ финалида қайд этилган омадсизликдан кейин 11 метрли зарбаларни голга айлантиришда хатога йўл қўймаётганди.

Табиийки, шогирдларининг ҳаракатларидан қониқмаган мураббий тегишли «рокировка»ларни амалга ошира бошлади. Шу тариқа Алаба, Левандовски ва Мюллер майдонга туширилди ва иродали ғалабани таъминлашди. Эътиборлиси, қаторасига қайд этилган 13та ғалаба Хайнкеснинг мураббийлик соҳасидаги рекорд натижасидир. Мюллер эса «Бавария» сафидаги ўйинлар сони (422) бўйича Карл-Хайнц Румменигге билан тенглашиб олди.

Дортмунднинг «Боруссия»си ҳам зафарли юришини давом эттириб («Боруссия» М.-1:0), Мёнхенгладбахда қўлга киритилган уч очко эвазига иккинчи ўринга чиқиб олди. Муҳим ғалабани таъминлаган ягона гол яқинда сафга қайтган Марко Ройс ҳисобига ёзилди. «Айнтрахт» эса ўз майдонида «РБ Лейпциг»дан қимматли уч очкони тортиб олиб, 3-поғонага кўтарилди.

Италия. «Рома» «Интер»ни қувиб ўтди

Ҳисобот турида Удинега сафар қилган «бўрилар» дастлабки дақиқалардан ҳужумкорликка зўр беришди. Лекин мезбонларнинг 40 ёшли дарвозабони барча ўринишларни чипакка чиқараверди. Иккинчи бўлимда сўнг­ги ўйинларда сермаҳсуллик намойиш этаётган Денгиз Ундер Биссаррини доғда қолдирди. Ҳакам томонидан қўшиб берилган вақтда Перотти пенальти ҳисобига ғалабани мустаҳкамлади. «Интер» эса Генуяда «Женоа»дан енгилди. Шу тариқа «Рома» «нерадзурри»дан олдинга ўтиб олди. Бир кун кейин майдонга тушган «Лацио» «Верона»ни мағлубиятга учратиб (2:0), учинчи поғонага кўтарилиб олди.

Франция. Етакчиларда навбатдаги ғалаба

«ПСЖ»-«Страсбур» қарама-қаршилигининг эътиборли жиҳати шунда эдики, пойтахт клуби Мадриддаги оғир беллашувдан сўнг майдонга тушганди. Қолаверса, жорий мавсумдаги иккинчи мағлубиятнинг бирини айнан «Страсбур»дан қабул қилганди. Париждаги баҳс ҳам меҳмонларнинг тезкор голи билан бошланди. Бироқ пешқадам тезда жавоб тўпини киритиб, ўзини ўнглаб олди. Шу тариқа 12 дақиқа ичида «Страсбур» дарвозасига 3та гол урилгач, учрашув тақдири деярли ҳал бўлди. Танаффусдан кейин Кавани «дубль» қайд этиб, ҳисобни йирик кўринишга олиб келди. Иккинчи поғонани эгаллаб турган «Монако» ҳам «Дижон»ни йирик (4:0) ҳисобда енгди. «Марсель» эса ўз майдонида «Бордо» дарвозасини бир марта ишғол этган ҳолда, ўз дарвозаси дахлсизлигини сақлаб қолди.

 А.АҲМЕДОВ тайёрлади