Бекободнинг “Металлург-W” жамоаси янги мавсумга янги мураббийлар штаби билан тайёргарлик кўришмоқда.

Футзал бўйича Ўзбекистон XIV миллий чемпионатининг 1-туридан кейин биз жамоа бош мураббийи Аваз Махсумов билан мухлисларни қизиқтирган мавзуда мухтасар мусоҳаба уюштирдик.

Аваз Пархатович, Сизни “Металлург” жамоаси бош мураббийлиги лавозимида кўриб турганимиздан хурсандмиз? Бу жамоага келишингиз қандай содир бўлди?

15 йилдан буён, яьни Тошкент шахар футбол федерацияси маъсул котиби, Ўзбекистон футзал ассоциацияси ижрочи директори, Ўзбекистон футбол ассоциациясининг болалар, ўсмирлар ва оммавий футбол бошқарма бошлиғи ўринбосари ва Марказий Осиё футбол Ассоциацияси бош котиби лавозимларида ишлаган даврларимда хам мени доим футбол мураббийлиги соҳаси жуда қизиқтирар эди. Ушбу йиллар давомида футбол бўйича халқаро “А” ва футзал бйича халқаро Level 3  сертификатларига ўқиб улгурдим, хамда 2006 – 2010 йиллари аёллар футбол жамоаси “Олимпик”, “Семурғ” ва “Бунёдкор” жамоаларида бош мураббий, 2010 – 2012 йиллари футзал бўйича Ўзбекистон миллий терма жамоа бош мураббий ёрдамчиси ва 2013-2015 йилларда эса терма жамоа бош мураббийи бўлиб  фаолият юритдим. Мураббийликка бўлган иштиёқ мени Ўзбекистон футбол Ассоциясидан ўз хохишим билан кетишга чорлади. Икки ой ўтар ўтмас 2018 йил январь ойида “Металлург”профессионал футбол клуби бош директори Маруфалиев Абдуқаҳҳор Турғунович “Металлург” аёллар футбол жамоасининг бош мураббийси лавозимига таклиф қилдилар.

Янги коллективда иш бошлаш, “киришиб кетиш” осон кечмайди. Сизда бу жараён қандай ўтаяпти?

Бу фикрингизга қушиламан, албатта янги коллективга мослашиш осон эмас. Лекин аёллар футболи мен учун янгилик эмас ва кўпчилик футболчи қизлар билан илгари терма жамоада бирга ишлаганимиз сабабли бўлса керак нисбатан осон кечди. Биз футболчилар билан  жамоа олдига қўйилган мақсад ва вазифаларни таҳлил қилган ҳолда икки хафта ичида ишга тўлиқ киришиб кетдик. Албатта жамоада таркиб борасида ўзгаришлар юз берди. Баъзи етук футболчилар жамоани мен келишимдан олдин ва мен келганимдан кейин ҳам тарк этишди. Бу мен учун тасоддиф эмас, футболда учраб турадиган ҳол. Биз улар ўрнига бошқа футболчиларни таклиф қилдик ва ҳозирги кунда жамоа таркибини шакллантириб бўлдик.

Футболнинг йўналишлари кўп ва уларда ўзига хослик мавжуд: болалар футболи, оммавий футбол, катта футбол, аёллар футболи, мини футбол. Айтмоқчи бўлганимиз, аёллар футболи бошқаларидан нимаси билан фарқ қилади? Унинг ёқимли тарафлари ва қийин жиҳатларига тўхталсангиз...

Ўйлашимча аёллар футболи ҳозирги кунда ортиқча фарқ қилмайди, фақат аёлларнинг психологик жиҳатларини эътиборга олмасак. Бу энг асосийси ва қийин жиҳати деб ҳисоблаган бўлардим. Ёқимли тарафлари аёллар жамоаси бу катта мактаб ҳар бир мураббий учун. Чунки мураббий ҳар бир футболчининг характерини ўрганиб чиқиши, шунга яраша муомила қилиши, унга футбол сабоқларини турли усулларда уқтириши лозим бўлади. Бу йўлда турли тўсиқларни енгиб ўтишига тўғри келади, қийинчиликларни бошидан кечиради. Ўз навбатида бу жараён мураббийни изланишга, ўз устида тинимсиз меҳнат қилишга чорлайди.

 “Металлург” жамоаси ташкил этилганидан буён биринчи марта футзал бўйича расмий мусобақада иштирок этаяпти. Ўзбекистон чемпионатидаги илк қатнашувни бекободлик қизлар қандай қабул қилишди?

Бу осон кечмади. Аввало кўпчилик футболчилар биз ҳеч қачон футзал  ўйнамаганмиз ва бу бизга керак эмас деган фикрларни билдиришди. Машғулотлар жараёнида турли қийинчиликларга дуч келяпмиз, лекин мен уларга футзал ўйини қачон ва қандай пайдо бўлгани, ҳозирги кунда унинг футбол ўйинини такомиллаштиришда муҳим аҳамият касб этишини тушинтиришга ҳаракат қилаяпман. Бугунги кунда жаҳоннинг энг машҳур футболчилари – Леонель Месси, Криштиану Роналдуларнинг  футзал тўғрисидаги фикрларини, ҳаттоки уларнинг “Агар мен ёшлигимда футзал ўйнамаганимда бугун футболдаги ютуқларимга эришмаган бўлардим ” деган сўзларини мисол тариқасида келтириш йуллари билан тушунтиряпман. Ҳозир вазият ўзгарди, қизларимизда футзал ўйинига бўлган иштиёқи кўтаринки рухда десам адашмайман.

Мамлакат чемпионатининг 1-турида айни пайтда юртимизнинг энг кучли жамоаси – “Севинч”га йирик ҳисобда имконият бой берилди. Мағлубиятни қандай қабул қилдингиз? Қизларимизга нима етишмади, деб ўйлайсиз?

Албатта бу ўринда мамлакатимизнинг энг кучли жамоаси бўлган “Севинч” футболчиларига офарин дейиш керак. Улар футзал бўйича мамлакатимизнинг ўзгармас чемпиони, 13 марта бош совринга бежизга сазовор бўлмаганликларини юз фоиз исботлашди. Биз мағлубиятни тўғри қабул қилдик. Қизларимиз  камчиликларимиз кўп эканлиги ва айниқса физик ҳолатимизни ўнглашда кўп ишлар қилишимиз кераклигини англаб етдилар.

Учрашувдан кейин ҳакамлик ҳақида турли фикрлар бўлди. Сиз бевосита ушбу ўйин ва умуман ўзбек ҳакамлик мактаби ҳақида нималар дея оласиз?

Ҳакамларга ҳеч қандай эътирозим йўқ. Бизнинг аёл ҳакамларимиз Марказий Осиёда энг кучли ҳисобланади. Мен буни шахсан ўзим Марказий Осиё мусобақаларида гувоҳи бўлганман. Улар нафақат Марказий Осиёда балки доимий равишда Осиё мусобақаларида иштирок этадилар. Мени билишим бўйича Осиёда фақатгина бизнинг мамлакатимизда ҳакамлар мактаби мавжуд ва бу мактабда ФИФА йўриқчиларининг элит рўйхатига киритилган Фарход Абдуллаев ва дунёнинг энг яхши ҳакамлари рўйхатига киритилган Равшан Эрматовлар бўлажак ҳакамларга амалиёт дарсликларини ўтадилар.

Тез орада иккинчи ва учинчи тур учрашувлари бўлиб ўтади. Унга тайёргарлик жараёни қандай кечаяпти? Қизларимизнинг кайфияти қандай?

Қизларимиз кайфияти яхши тайёргарлик аъло даражада. Улар кундан кунга футзал ўйинининг ишқибозига айланиб боришмоқда. Машғулотлар жараёнида тактик фикрлаш, ўйин давомида тез ҳаракат қилиш қобилиятига кўникиб бормоқдалар. Энг асосийси улар бу машғулотларни футбол ўйинида ҳам қўлланиши мумкин эканлигини англаб етмоқдалар.

Аваз ака, энди катта футбол ҳақида ҳам бироз суҳбатлашсак. “Металлург” мамлакатимизнинг амалдаги чемпиони ва Ўзбекистон кубоги соҳиби. Бу йилги мавсумга жамоа қай даражада тайёр?

Расмий машғулотларимизни бошлаганимизга бир ой бўлганини эътиборга олсак, бугунги кунда жамоа 50 фоизга тайёр деб ҳисоблаган бўлардим. Келгуси бир ярим ой ичида қиладиган ишимиз ҳали кўп. Асосийси биз яхши таркибга эга бўлдик. Энди қолган ишларни бир ёқадан бош чиқариб, тайёргарликни юз фоиз даражасига етказган ҳолда жамоа олдига қўйилган олий мақсад ва вазифаларни бажарамиз деган умиддаман.

Бу йўлда мураббийлар штабига, “Металлург” жамоаси қизларига омад ёр бўлишини тилаймиз. Мазмунли суҳбатингиз учун раҳмат.