«ПСЖ» раҳбарияти ёзги трансферлар вақтида яна фаоллашишни режалаштирмоқда. Маълумотларга кўра, парижликлар дарвозабон, чап қанот ҳимоячиси, таянч ярим ҳимоячиси, ҳужумчи ва шунингдек, бош мураббийни ўзгартиришлари мумкин. «ПСЖ» мураббийлик постига Антонио Конте («Челси»), Маурисио Почеттино («Тоттенхэм») ёки «Барселона» собиқ мураббийи Луис Энрикелардан бирини таклиф этмоқчи. Парижликларнинг шорт-листларидан Тибо Куртуа («Челси»), Давид Де Хеа («Манчестер Юнайтед») ва Жанлуижжи Доннарумма («Милан») каби дарвозабонлар ҳам ўрин олишган. «Пари Сен-Жермен» таянч ярим ҳимоя амплуасига Н~Голо Канте («Челси») ёки Фабиньо («Монако»)дан бирини таклиф этиши кутилмоқда. Чап қанот ҳимоячиси вазифасини эса «Ювентус» аъзоси Алекс Сандро бажариши мумкин. Агар жамоани ёзда Эдинсон Кавани тарк этадиган бўлса, унинг ўрнини Роберт Левандовски («Бавария») ёки Гарри Кейн («Тоттенхэм») каби тўпурар ҳужумчилар босиши эҳтимоли мавжуд. Бундан ташқари, «ПСЖ» Неймарни жамоада сақлаб қолиш эвазига, унинг атрофида янги жамоа шакллантиришни ўз олдига мақсад қилиб қўйган.