Ўтган ҳафта «Аугсбург»ни 4:1 ҳисобида мағлуб этган «Бавария» қаторасига 6-марта Германия чемпионлигини қўлга киритди. Умуман олганда, жамоа 28-бор мамлакат чемпиони бўлди.
Эътиборли томони, мюнхенликлар Бундеслига баҳслари якунланишига беш тур қолганида биринчи ўрин масаласини ҳал қилишди.
Қуйида «Бавария»нинг чемпион бўлишида муҳим омил бўлган бешта элемент ҳақида сўз юритамиз.
Гол машинаси
Ҳозирда Роберт Левандовски сайёрадаги энг яхши ҳужумчи бўлса керак. Айнан классик марказий ҳужумчи ҳақида сўз юритяпмиз. Мессига ўхшаш афсунгар ёки Криштиану Роналдудек қанотлардан ҳужум қилишни яхши кўрадиган футболчи ҳақида эмас. «ПСЖ» вакили Эдинсон Кавани ҳам польшалик футболчи сингари ҳаракат қилади.
Лекин Франция чемпионатининг савияси ва «ПСЖ»нинг еврокубоклардаги камтарлиги туфайли уругвайлик футболчини Робертга тенглаб бўлмайди. ЛеванГОЛски Бундеслигада қаторасига икки мавсумда 30тадан гол уришга эришди. Айни пайт унинг ҳисобида 26та гол бор. Олдинда эса бешта тур.
Шунингдек, Юпп Хайнкес еврокубоклардаги муҳим ўйинларга асраш учун футболчига дам беряпти ёки захирада ушлаб турибди. Робертнинг ҳеч қандай «Реал»га кетмаслигига мураббийнинг ишончи комил.
Шунингдек, Германия чемпионати тўпурарлари баҳсида унинг натижасини такрорлашига ишонмоқда. Ҳозирда Хайнкес бу борада учинчи ўринни эгаллаб турибди. Левандовски мураббийининг натижасини такрорлаши учун яна 46та тўп киритса бас.
Ўйин конструктори
Пулни ақл билан сарфлаш ҳақиқий немисча одат. «Бавария» нафақат ишлаб топишни, балки сарфлашни ҳам қойиллатади. Трансфер бозори ақлдан озаётган бир пайтда мюнхенликлар ажойиб қарорлари билан одамни ҳайрон қолдиришади. Мисол учун, Хамес Родригесни «Реал»дан икки йилга ижарага олишди ва бунинг учун 15 миллион евро тўлашди. Ҳайрон бўлманг, сумманинг охирида яна битта нол йўқ. Ҳаттоки, «ўн беш» деб ёзишимиз ҳам мумкин. Ҳозирги бозор билан таққослайдиган бўлсак, бу деярли текин.
Зайниддин Зиданнинг ишончини оқлай олмаган колумбиялик футболчи жанубий америкаликлар учун унчалик маъқул бўлмаган Бундеслигага осонлик билан мослашиб олди.
Унинг тўп узатишлари аниқлиги 90 фоизга тенг. Бу эса даража. Шунингдек, чиройли голлар ҳам урмоқда, голли пасларни беряпти. Айни пайтда самарали узатмалар борасида Хамес Германия чемпионатида етакчилик қилмоқда.
Шартномага кўра, «Бавария» футболчининг трансферини 42 миллион евро эвазига сотиб олиш имкониятига эга. Бундай даражадаги футболчи учун сариқ чақа деса ҳам бўлаверади.
Ламнинг меросхўри
Ламсиз ҳаёт борми? Бавариялик сардор ўтган мавсум фаолиятини якунлаганидан сўнг Германияда шундай саволларни бера бошлашди. Бунга мавсумни ажойиб тарзда ўтказаётган Киммих ижобий жавоб қайтарди. Германия терма жамоаси бош мураббийи Йоахим Лев ҳам яқинда 23 ёшини қаршилаган футболчини ўз ёнига чорлади.
«Штутгарт» тарбияланувчиси ҳисобланган Киммих сўнгги ўн йилликнинг буюк иқтидорларидан биридир. Киммих ёш бўлишига қарамай, янги амплуага тез мослашди. Ламни Хосеп Гвардиола қанот ўйинчисидан таянч нуқтасига кўчирганди. Киммих эса аксинча, таянчдан қанот ўйинчисига айланди.
Бу шунчалик муваффақиятли кечдики, у терма жамоанинг ҳам асосий ўйинчисига айланди. Айни пайт у 10та голли пас билан Бундеслига ассистентлари орасида иккинчи бўлиб турибди. Яқинда шартномасини 2023 йилга қадар узайтирган футболчи камтарлик билан ўз мақсадини ошкор қилди: «Бавария» клуби ва Германия терма жамоасининг етакчиси бўлиш.
Иқтидордан ташқари бу йигит ўта меҳнаткаш. «Бавария»да ҳеч бир футболчи бир ўйинда Киммихчалик югура олмайди. У ўртача ҳар бир учрашувда деярли 12 км. югуради.
Қароқчи чоллар
«Ҳаттоки, болалар жамоасида ўйнайдиган ўғлимнинг машғулотлари ҳам Анчелоттиникидан яхшироқ»,-деганди жамоа етакчиларидан бири Арьен Роббен. «Роббери» дуэтининг иккинчи бўлаги Рибери эса италиялик мураббий унга кўрсатма берганида ўзини алмаштиришларини сўраган.
Албатта, улар билан осон бўлмаган. Лекин Хайнкес бундай характерли инсонлар билан тил топиша олади ва уларни қаҳрамонлик сари етаклай олади. Айнан Хайнкес келганидан сўнг ҳеч ким футболчиларнинг паспортига эътибор қаратмай қўйди.
«Аугсбург» мағлуб этилиб, олтин медаллар нақд қилинганидан сўнг мюнхенликлар вице-президенти Карл-Хайнц Румменигге биргаликда 69 ёшни ташкил қиладиган икки фахрий билан янги шартномалар имзоланишини маълум қилди.
Уларнинг иккиси ҳам клубнинг афсоналарига айланишган. Бу шанба куни 35 ёшини қаршилаган Рибери учун саккизинчи чемпионликдир. Кан, Шолл, Швайнштайгер ва Лам каби футболчилар ҳам 8 мартадан Германия чемпиони бўлишган. 34 ёшли Роббен эса кумуш товоқчани еттинчи бор боши узра кўтарди.
Айни пайт у Голландиянинг энг совриндор футболчиси ҳисобланади. Арьен бу «унвон»ни Голландия, Испания ва Англияда зафар қучган ҳолда Йохан Кройфдан тортиб олди. Ҳозирда Роббен турли чемпионатларда 11 марта чемпион бўлган. Албатта, унда совринларини яна кўпайтириб олиш имкони бор.
Профессор
Мавсумнинг биринчи қисмини эслайсизми? Ностабил ўйинлар, можаролар, мавсумни бўш ўтказаётган Дортмунддан ортда қолиш... Ҳаммаси Юпп Хайнкес келганидан сўнг ўзгариб кетди.
Тўрт йилдан буён нафақада юрган мураббийни ортга қайтариш клуб раҳбариятининг катта ютуғи бўлди. 72 ёшида ҳам футболни ипидан игнасигача тушунишини қария Юпп исботлади.
Уни футболчилар ҳурмат қилишади. Чунки у анча интизомли инсон. Масалан, Аугсбургдаги ўйиннинг финал ҳуштаги янграганидан сўнг жамоанинг олдинги мураббийи Карло Анчелоттини ҳам эсдан чиқармади.
Биринчи бор мураббий «Бавария»ни 29 йил аввал чемпионликка етаклаганди. Бу сафар Хайнкес жамоа билан тўртинчи чемпионлигини нишонлади. Менхенгладбахнинг «Боруссия» клуби футболчиси бўлган даврда ҳам тўрт марта олтин медалларни қўлга киритганди.
Октябрь ойида жамоани қабул қилиб олган Юпп бу тўлиқ қайтиш эмас, балки «Бавария» учун дўстона хизмат деганди. Афтидан, клуб раҳбарлари мураббий билан тўлақонли шартнома тузишни уддалай олишмаган. Ўртада яна бир савол турибди: Хайнкес 2013 йилдаги каби Чемпионлар Лигасида зафар қучса ҳам кетадими?
Маълумот учун
«Бавария» 1900 йилнинг 27 февраль куни ташкил топган. Уй учрашувларини Мюнхендаги «Альянц Арена» (75000 томошабин) стадионида ўтказади. Германиянинг энг совриндор клуби.
Шунингдек, клублар ўртасидаги жаҳон чемпионатида ғолиб чиққан биринчи немис жамоаси.
Ютуқлари:
Германия чемпиони - (28 марта, рекорд): 1931|1932, 1968|1969, 1971|1972, 1972|1973, 1973|1974, 1979|1980, 1980|1981, 1984|1985, 1985|1986, 1986|1987, 1988|1989, 1989|1990, 1993|1994, 1996|1997, 1998|1999, 1999|2000, 2000|2001, 2002|2003, 2004|2005, 2005|2006, 2007|2008, 2009|2010, 2012|2013, 2013|2014, 2014|2015, 2015|2016, 2016|2017, 2017|2018 йиллар.
Германия кубоги соҳиби - (18 марта, рекорд): 1956|1957, 1965|1966, 1966|1967, 1968|1969, 1970|1971, 1981|1982, 1983|1984, 1985|1986, 1997|1998, 1999|2000, 2002|2003, 2004|2005, 2005|2006, 2007|2008, 2009|2010, 2012|2013, 2013|2014, 2015|2016 йиллар.
Лига кубоги соҳиби - (6 марта, рекорд): 1996|1997, 1997|1998, 1998|1999, 1999|2000, 2003|2004, 2006|2007 йиллар.
Германия суперкубоги соҳиби - (6 марта, рекорд): 1987, 1990, 2010, 2012, 2016, 2017 йилларда.
Европа Чемпионлар Лигаси ғолиби - (5 марта): 1973|1974, 1974|1975, 1975|1976, 2000|2001, 2012|2013 йиллар мавсумида.
УЕФА Кубок эгалари кубоги соҳиби: 1966|1967
УЕФА кубоги соҳиби: 1995|1996
Европа суперкубоги соҳиби: 2013 йил
Қитъалараро кубок соҳиби: 1976, 2001 йиллар
Клублар ўртасидаги жаҳон чемпиони: 2013 йил
Клуб раҳбарияти:
Президент: Ули Хёнесс
Клуб фахрий президенти: Франц Беккенбауэр.
Клуб бошқарув раиси: Карл-Хайнц Румменигге.
Бошқаруви раиси ўринбосари: Ян-Кристиан Дресен.
Спорт директори: Маттиас Заммер.
Вице-президентлар: Фриц Шерер, Бернд Раух.
Чемпион таркиби:
Дарвозабонлар:
1.Мануэль Нойер 1986
22.Том Штарке 1981
26.Свен Ульрайх 1988
Ҳимоячилар:
4.Никлас Зюле 1995
5.Матс Хуммельс 1988
8.Хави Мартинес (Испания) 1988
13.Рафинья (Бразилия) 1985
14.Хуан Бернат (Испания) 1993
17.Жером Боатенг 1988
27.Давид Алаба (Австрия) 1992
34.Марко Фридль (Австрия) 1998
Ярим ҳимоячилар
6.Тиаго Алкантара (Испания) 1991
7.Франк Рибери (Франция) 1983
10.Арьен Роббен (Голландия) 1984
11.Хамес Родригес (Колумбия) 1991
19.Себастьян Руди 1990
23.Артуро Видаль (Чили) 1987
24.Корентен Толиссо (Франция) 1994
30.Никлас Дорш 1998
32.Жошуа Киммих 1995
38.Эрдал Озтюрк 1996
72.Далер Додоев 1998
40.Фабиан Бенко (Хорватия) 1998
Ҳужумчилар:
2.Сандро Вагнер 1987
9.Роберт Левандовский (Польша) 1988
25.Томас Мюллер 1989
29.Кингсли Коман (Франция) 1996
41.Милош Пантович (Сербия) 1996
ЖАЪФАРАЛИ тайёрлади
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20