«Касбимни жуда севаман. Мен мураббий ҳам, унинг ёрдамчиси ҳам эмасман. Лекин шунга қарамасдан, футболчилар билан жуда кўп ишлайман. Гарчи машғулот жараёнларида иштирок этмасам ҳам» - мазкур сатрлар «Арсенал»нинг германиялик бош скаути Свен Мислинтатга тегишли.

Ўз вақтида у Томас Тухель билан чиқиша олмай, «Дортмунд»ни тарк этган, «Бавария» таклифини рад этиб, «Наполи» билан деярли келишувга эришган, лекин якунда Лондонга йўл олганди. Мутахассиснинг фикрича, АПЛдаги ижодий муҳит «А» серияга қараганда қизиқарлироқ.

Хуллас, Европа футболига Мхитарян, Левандовски каби кўплаб юлдузларни туҳфа этган скаут энди «тўпчилар» «замбараги»ни созлаш йўлида изланмоқда.

«Боруссия»

«Мислинтат - даҳо! Футбол скаутларининг нима билан машғул эканликларини яхши биламан. Аммо Свеннинг ўз ишига бўлган муносабати тасаввуримни бутунлай ўзгартириб юборди. У ҳар суткада 25 соат футбол ҳақида гапиради, ўз ёрдамчиларига ўзига ишонгандек ишонади.

Асосийси, ўз меҳнатининг самарасига ўта талабчан. Хорижий манбаларнинг маълумотларига эҳтиёж сезса, клуб тилмочларини оёққа турғизади». Ўзининг энг яқин маслакдошига Томас Тухель шундай юксак баҳо берганди. Таажжубки, бу икки малакали мутахассиснинг ҳамкорлиги узоққа чўзилмади.

Бунинг асосий сабаби шуки, бош мураббий таркибни янгилаш борасида тажрибали ўйинчиларга ишонч билдиришни, бош скаут эса келажаги порлоқ ёшларга йўл беришни тўғри, деб ҳисоблашарди. Қисқаси, таркибга оид ҳар бир масала қизғин тортишувлардан кейин ечимини топарди. Лекин испаниялик Оливер Торрес хусусида дуэт келиша олмай қолди.

Тухелнинг фикрича, дортмундликларни оғир вазиятдан 20 ёшли ўқувчилар эмас, фақат тажрибали футболчиларгина олиб чиқа олишарди. Мюнхенда анча зерикиб қолган Марио Гётце мураббий наздида энг муносиб номзод эди. Мислинтат эса Торрес номзодида қатъий туриб олди.

Баҳс бош мураббий фойдасига ҳал бўлди: Йоахим Ватцке ҳам Гётценинг қайтишини маъқуллади. Ваҳоланки, Свен ҳам Дортмундда ўзига яраша нуфузга эга эди.

Якуб Блашиковски, Лукас Пишек, Роберт Левандовскилар унинг ташаббуси билан «Боруссия» сафидан жой олишди, «Сересо Осака»да юрган Шинжи Кагаванинг «МЮ»да ҳам муносиб тўп сура олишини Мислинтат бошқалардан кўра аввалроқ фаҳмлади, Обамеянгни Дортмундга олиб келиш (ва тортиб олиш) ҳам Свеннинг ижоди.

Бундан ташқари, Усмон Дембеле, Крис­тиан Пулишич, Илкай Гюндоган ва Юлиан Вайглларни ҳам у кашф этганди. Шунга қарамасдан, Оливер Торрес масаласида Тухель ҳам, Ватцке ҳам скаутнинг фикрига қўшилишмади ва Свен Дортмундни тарк этди.

«Боруссия»дагилар малакали мутахассис Мислинтатнинг азалий рақиб - «Бавария»га ўтишидан хавотирда эдилар. Бироқ уларнинг бахтига, Свен ўзгача қарорга келди: «Чиндан ҳам, «Бавария» мендан умидвор эди.

Мюнхенликлар бир неча марта қўнғироқ қилишди, ҳатто рафиқамга гул совға қилиб, уни ҳам ўз томонларига оғдиришга уриниб кўришди. Мен бу юксак эътиборни ҳурмат қилсамда, қароримни ўзгартирмадим: тамоман янгича муҳитда ишлашни дилимга тугиб қўйгандим».

«Арсенал»

Германия ОАВнинг маълумотларига кўра, Свен Мислинтат ихтиёрида урғуни ёш иқтидорлар тарбиясига бераётган кўпгина жамоалардан таклифлар бор эди. Бироқ скаут мавсумни ўзи истагандек ўтказа олмаётган Лондон клубини танлади.

Табиийки, ижодий изланишни хуш кўрадиган мутахассис жамоа танлашга футболчиларга қаратадиганидан ҳам жиддийроқ эътибор қаратди.

Биринчидан, у қайсидир буюк мураббий билан ҳамкорлик қилишга бел боғлаганди. Иккинчидан, «тўпчилар»нинг янги спорт директори уни ўз ёнига чорлади - «Барселона»да трансфер масалаларига масъул бўлган Рауль Санльехи Свен билан бирга ишлаш орзусида эди.

Санльехининг «Арсенал» тизимига келиши ва Жон Кроенкенинг (жамоа акциядорларидан бири Стэн Кроенкенинг ўғли) жонланишидан кейин англиялик касб­дошларимиз мутасаддилар трансферлар борасида Арсен Венгерга енгиллик яратишга қарор қилганликлари ва бу масалага Мислинтат масъул бўлиши ҳақида гапира бошлагандилар.

Чиндан ҳам, қишда Свен лондонликларнинг асосий вакили ролини бажаришга киришди. Аввалига у иқтидорли ҳимоячи Мавропаносни «Эмирейтс»га олиб келди. Кейин бир неча раундлик музокаралардан ке­йин Обамеянг «тўпчилар» сафидан жой олди.

Шунингдек, Санчес - Мхитарян, «рокировка»сига ҳам у раҳбарлик қилди. Таъкидлаш жоизки, ана шу келишувлар ўзини тўла оқлаб улгурди - «Арсенал» ҳужум чизиғини Обамеянг ва Мхитарянсиз тасаввур қилиш қийин, Конетантинос эса ёшлар таркибида ишончли тўп сурмоқда.

Бу ёғи нима бўлади?

«Тўпчилар» тизимининг қандай кўриниш олиши бош мураббий пультини бўшатган Арсен Венгернинг қайси лавозимни эгаллашига боғлиқ. Айни пайт Иван Газидис («Арсенал» акциядорларидан бири), Рауль Санльехи ва Свен Мислинтатлар янги лойиҳа устида иш олиб боришмоқда. Янгиланиш бош мураббийдан бошланади.

Газидис Артета, Рожерс ва Жардим номзодлари тарафдори. Санльехи эса Луис Энрикени «тўпчилар» устози сифатида тасаввур қилмоқда. Мислинтат ўз анъанасига содиқ қолган ҳолда Юлиан Нагельсманн номзодини олға сурмоқда - скаут «ботаниклар» билан ҳамкорлик қилишни хуш кўради.

Нима бўлганда ҳам, янги бош мураббий масаласини мутасаддилар мавсум якунланганидан кейин кўриб чиқадилар. Бош скаут эса ҳозирданоқ ишга кўмилиб қолган. У ҳимоя чизиғини муносиб номзодлар билан кучайтириши лозим.

Мутахассис иш режасидаги рўйхатдан (Костас Манолас, Тоби Альдервейрельд, Фабиньо, Тимо Хорн, Бернд Ленно, Калиду Кулибали) хулоса чиқарадиган бўлсак, Свенни қизғин музокаралар кутмоқда.

«Арсенал» менга ижод қилиш, ўзимга мақбул бўлган ёш иқтидор соҳибларини қидириб топиш ва жамоага таклиф этиш имкониятини берди. Умид қиламанки, таркибни савияли ёшлар билан кучайтириб, юксак натижаларга эришиш йўлида жамоага наф келтира оламан», - дейди Свен Мислинтат.

С.РАҲМОНОВ тайёрлади