ОФКдан жаҳон чемпионатига илк марта 5та терма йўл олди. 14 майдан бошлаб барча 32 иштирокчи сингари улар ҳам кенгайтирилган таркибларини эълон қилишди.

Қуйида ҳар бир жамоа мураббийлари тузган рўйхатга назар ташлаб, ундан жой олган футболчилар ҳақида маълумот берамиз ва аввалги мундиалдаги таркибига солиштириб, фарқлар ҳақида сўз юритамиз.

ЭРОН

5-марта жаҳон чемпионатига йўл олган мазкур терма бирор марта гуруҳдан чиқа олмаган. Бу сафар ҳам у ўта мураккаб квартетга тушиб қолди.

Лекин испаниялик функционерлар Эронни мундиалдаги энг айёр ва кутилмаган тактикалар билан тайёрланган жамоа, деб ҳисобламоқдалар.

Эрон терма жамоаси таркиби:

Легионерлар - 14 нафар

Миллий чемпионат вакиллари - 10 нафар

Клуб                                                                 Сони

Истиқлол Т                                                       4 

Персеполис                                                       2 

Сайпа                                                                2 

Зоб-Оҳан                                                          1 

Падидеҳ                                                            1 

Олимпиакос (Греция)                                      2 

АЕК Афина (Греция)                                      1 

Херенвен (Голландия)                                     1 

АЗ Алкмаар (Голландия)                                1 

Амкар (Россия)                                                1 

Рубин (Россия)                                                 1 

Ахмат (Россия)                                                1 

Ноттингем Форест (Англия)                          1 

Маритиму (Португалия)                                 1 

Остерсунд (Швеция)                                       1 

Оостенде (Бельгия)                                         1 

Ал-Садд (Қатар)                                              1 

Ал-Гарафа (Қатар)                                           1 

18 клуб                                                             24

Терма жамоа етакчиларидан бири Масъуд Шожайи 7 ойлик четлатишдан сўнг яна терма жамоага қайтди. Маълумки, ушбу футболчи Грециянинг «Олимпиакос» клуби сафида Исроил жамоасига қарши майдонга тушгани учун терма жамоадан номуайян муддатга четлатилганди.

Эрон давлатининг сиёсий қарашларига кўра, форс спортчиларининг исроиллик спортчилар билан ҳар қандай турнирда баҳс олиб бориши ман қилинган. Мундиал арафасида федерация Кейрушнинг қатъий талаби билан Шожайини афв этди. Масъуд 2006 ва 2014 йилги мундиалларда ҳам иштирок этган.

Терма жамоа сафида энг ёши улуғ футболчилар - Пежман Монтазари, Эҳсон Ҳожисафи, Ашкан Дежага, Ризо Ғучаннажод, Алиризо Жаҳонбахш ва сардор Шожайини инобатга олсак, 2014 йилги таркибдан атиги 6 нафар футболчи қолибди. Дарвозабонлар таркиби тўлиқ янгиланган.

АВСТРАЛИЯ

Австралия бу мундиалга 22та ўйин ўтказиб йўл олди. У «плей-офф» босқичларида Сурия ва Гондурас тўсиғидан ўтди. Гуруҳда Францияга нисбатан бироз қийналиши мумкин, лекин кейинги босқичдан бебаҳра қолиш улар учун катта омадсизлик бўлади. Берт ван Марвейк терма жамоани янги тактика асосида тайёрламоқда.

Австралия терма жамоаси таркиби:

Легионерлар - 21 нафар

Миллий чемпионат вакиллари - 5 нафар

Клуб                                                                          Сони

Вестерн Сидней Уондерерс                                     1        

Сидней ФК                                                                1        

Мельбурн Виктори                                                  1        

Ньюкасл Жетс                                                          1        

Мельбурн Сити                                                        1        

Миллуолл (Англия)                                                 2        

Брайтон (Англия)                                                     1        

Хаддерсфилд Таун (Англия)                                   1        

Халл Сити (Англия)                                                 1        

Астон Вилла (Англия)                                             1        

КПР (Англия)                                                           1        

Герта (Германия)                                                      1        

Бохум (Германия)                                                    1        

Фейеноорд (Голландия)                                           1        

Селтик (Шотландия)                                                1        

Генк (Бельгия)                                                          1        

Бурсаспор (Туркия)                                                  1        

Грассхопперс (Швейцария)                                     1        

Лозанна (Швейцария)                                              1        

Маккаби Хайфа (Исроил)                                        1        

НК Локомотива (Хорватия)                                    1        

Ал-Аҳли (Саудия А.)                                               1        

Сувон Самсунг Блюингз (Ж.Корея)                       1        

Йокогама Ф. Маринос (Япония)                             1        

Урава Ред Даймондс (Япония)                                1        

25 клуб                                                                     26

Тим Кейхилл учта мундиалда гол урган ягона осиёлик футболчи. Бу борада Арьен Роббен ва Робин ван Перси унга шерик футболчилардир. Агарда Россиядаги ЖЧда ҳам у тўп киритишга муваффақ бўлса, жаҳонда ҳам бу борада алоҳида ўринга эга бўлади.

Терма жамоа сардори Миле Йединак (2010, 2014) сўнгги икки мавсум Англия Чемпионшипида ўйнади. Шундай бўлсада, унга сардорлик боғичи ишониб топширилди. Терма жамоанинг яна бир юлдузи Массимо Луонго аслида савияси Англия Премьер-лигасига лойиқлигини исботлаш керак.

2014 йилги мундиалда ҳам таркибда бўлган голкипер Мэттью Райан айни пайт юқори спорт формасида. Демак, Берт ван Марвейк икки устун ораси дахлсизлигидан хавотир олмаса ҳам бўлаверади.

ЯПОНИЯ

«Кунчиқар юрт» вакиллари мундиалга илк марта чиққанларидан бери уни бирор марта ҳам ўтказиб юборишмаган. 2010 йили жамоада чорак финалга йўл олиш имконияти туғилганди.

Япония терма жамоаси таркиби:

Легионерлар - 17 нафар

Миллий чемпионат вакиллари - 10 нафар

Клуб                                                                  Сони

Кашима Антлерс                                               3

Урава Ред Даймондс                                         2

Кашива Рейсол                                                  1

Гамба Осака                                                      1

Санфречче Хиросима                                       1

Серезо Осака                                                     1

Кавасаки Фронтале                                           1

Фортуна Д (Германия)                                     2

Айнтрахт Ф (Германия)                                   1

Боруссия Д (Германия)                                    1

Гамбург (Германия)                                         1

Кёльн (Германия)                                             1

Майнц-05 (Германия)                                       1

Штутгарт (Германия)                                       1

Хетафе (Испания)                                             1

Эйбар (Испания)                                               1

Культураль Леонеза (Испания)                       1

Саутгемтон (Англия)                                        1

Лестер Сити (Англия)                                       1

Марсель (Франция)                                          1

Мец (Франция)                                                  1

Галатасарой (Туркия)                                       1

Пачука (Мексика)                                             1

23 клуб                                                              27

Терма жамоа таркибида 100дан ортиқ ўйин ўтказган 3 футболчи (Шинжи Оказаки, Макото Хасебе, Юто Нагатомо) бор. Бундан ташқари, 2010 йилги мундиалда гуруҳ босқичининг энг фойдали футболчиси бўлган, ҳозирда бироз эътибор марказидан тушиб қолган Кейсуке Хонда (2010, 2014) ҳам ўзига бериладиган имкониятни кутмоқда.

Дарвозабон Эйжи Кавашима ҳам гвардиячилар сингари иккита мундиал кўрган. Янги таркибдаги 5 нафар футболчи терма жамоа сафида 5та ҳам ўйин ўтказмаган.

Ўнг қанот эгаси Хирои Сакаи 2014 йилги мундиалда ҳам иштирок этган, марказга тўлиқ ёрдам беришга улгурмаганди. «Эйбар» вакили Такаши Инуи иккита катта турнирда қатнашган бўлсада, мундиалга ҳозирча бора олмаган.

ЖАНУБИЙ КОРЕЯ

Жанубий Корея терма жамоаси сўнгги 9та жаҳон чемпионатида қатнашган, бу борада ундан яхшироқ натижага фақат Бразилия, Германия, Аргентина ва Испания эга, холос. Ўта барқарор жамоа. Қолаверса, омад ҳам уларга кулиб боқади.

Жамоанинг таркибига кўз ташланса, бош мураббий барибир, синалган гвардияга ишонмоқда. Германияни истисно қилганда, корейслар гуруҳда исталган рақибни енгишга қодирлар.

Жанубий Корея терма жамоаси таркиби:

Легионерлар - 13 нафар

Миллий чемпионат вакиллари - 13 нафар

Клуб                                                                 Сони

Чонбук Хюндай Моторс                                 4 

Сангжу Сангму                                                2 

Инчеон Юнайтед                                              1 

Жежу Юнайтед                                                1 

ФК Сеул                                                           1 

Сеонгам ФК                                                     1 

Ульсан Хюндай                                               1 

Асан Мугунхва                                                1 

Дэгу ФК                                                           1 

Виссель Кобе (Япония)                                   2 

Тоттенхэм Хотспур (Англия)                         1 

Кристал Пэлас (Англия)                                 1 

Суонси Сити (Англия)                                    1 

Верона (Италия)                                              1 

Аугсбург (Германия)                                      1 

Ред Булл (Австрия)                                         1 

Сересо Осака (Япония)                                   1 

ФК Токио (Япония)                                         1 

Саган Тосу (Япония)                                       1 

Гуанжоу Эвергранд (Хитой)                           1 

Тианжин Куанжиан (Хитой)                            1 

21 клуб                                                             26

Миллий жамоа сардори Ки Сунг Йонг 2010 ва 2014 йилги мундиалларда иштирок этган. Жаҳон чемпионатигача терма сафидаги ўйинлари сонини 100тадан ошириб олиши аниқ.

Дарвозабон Ким Сеунг Гю (2014), ҳимоячилар Ким Йонг Гвон, Парк Жу Хо, Ли Йонг (2014), ярим ҳимоячи Ли Чунг Йонг (2010, 2014), Ку Жа Чол (2014), ҳужумчилар Ким Шин Вук ва Сон Хёнг Мин (2014) мундиал ҳавосидан нафас олиб кўришган.

Бош мураббий Шин Тае Йонг терма жамоа сафида ҳозирча майдонга тушмаган 1 ҳимоячи ва 2 ярим ҳимоячини ҳам таркибга қўшди. Демак, у таваккал қилишдан қўрқмаяпти.

Маълумот ўрнида: Жанубий Корея терма жамоаси футболчилари жаҳон чемпионатига чиққани учун ўз футбол ассоциациясидан бонус тариқасида 2,4 млрд. вон (2,24 млн. доллар) олишганди. Саралаш босқичида ҳеч бўлмаса бир марта миллий жамоага чақирилган футболчи ҳам бонус олишга муваффақ бўлган.

КФАнинг маълум қилишича, футболчилар ғалабаларга қўшган ҳиссаси бўйича 4 гуруҳга бўлинди ва энг муҳимларига 75 минг доллар, иккинчи гуруҳдагиларга 56 минг доллар тўланди. Учинчи гуруҳга кирганлар 37 минг доллар, қолганлар эса 28 минг доллардан мукофот пули олишди. Мундиалдаги натижалар бўйича қанчадан мукофот берилиши ҳозирча ошкор қилинмади.

САУДИЯ АРАБИСТОНИ

Саудия Арабистони терма жамоаси 2006 йили Германияда ўтказилган жаҳон чемпионатидан сўнг 2та мундиални ўтказиб юборди. Аёнки, бу галги ЖЧда аввалги мундиалларда ўйнаган футболчилар қатнашишмайди.

Маълумот ўрнида айтиш керакки, 2006 йилги чемпионатда Саудия Арабистони термаси бош мураббийи бразилиялик Маркос Пакета бўлганди.

Саудия Арабистони терма жамоаси таркиби:

Легионерлар - 3 нафар

Миллий чемпионат вакиллари - 25 нафар

Клуб                                               Сони           

Ал-Ҳилол                                       11 

Ал-Аҳли                                         8   

Ал-Шабаб                                       2   

Ал-Наср                                          2   

Ал-Иттиҳод                                    1   

Ал-Иттифоқ                                   1   

Вильярреал (Испания)                   1   

Леванте (Испания)                         1   

Леганес (Испания)                          1   

9 клуб                                             28 

Саудия терма жамоасининг уч вакили Испания Ла Лигасининг 3 клубига жойлаштирилганди. Примеранинг сўнгги турида «Реал Мадрид»га қарши баҳсда «Вильярреал» сафида ўйнаётган Салим ал Доссари захирадан майдонга туширилди.

Учрашувда атиги 37 дақиқа ҳаракат қилган бу футболчи баҳс сўнгида огоҳлантирилди. Бу унинг ушбу клубдаги ягона ўйини бўлди. «Леванте» сафидаги Фаҳад ал Муваллад 2та учрашувда қатнашган бўлса, «Леганес»даги Яҳё ал Шеҳри Ла Лига баҳсларида умуман майдонга тушмаган.

Терма жамоа асосини «Ал-Ҳилол» ва «Ал-Аҳли» вакиллари ташкил этишмоқда. Осама Ҳавсави (терма жамоа сафида 133та ўйин) ва Тайсир ал Жассим (129 ўйин) майдон марказига жавоб беришса, Муҳаммад ал Саҳлави (38та гол) ҳужумда Фаҳад ал Муваллад билан бирга ишлаши керак.

Довудхон АКРАМОВ тайёрлади