Мухлисларни мундиал иштирокчилари билан таништиришда давом этаётган «СЭ»нинг навбатдаги ҳикояси Бельгия терма жамоасининг етакчи ўйинчиси Кевин де Брюйнега бағишланади.
Кўча футболидаги сабоқлар
Айтишларича, муаммолар - болаликдаги бебошликлар. Бу - айни ҳақиқат. Лекин ўта тушкун кайфиятдаги бирёқлама нуқтаи назар. Чунки ҳаёт фақат қора ва оқ ранглардан иборат эмас. Бунга мисол тариқасида замонавий футболнинг ёрқин ижрочиларидан бири бўлган Кевин де Брюйнени кўрсатиш мумкин.
У кўча футболидан нафақат рақиб ҳимоячиларининг оғриқли турткилашларига бардош беришни, балки ажойиб техникани ўзлаштириш имкониятини берган икки оёқда бемалол тўп сура олиш хислатини ҳам мерос қилиб олди.
Фаолиятининг гуркираб ривожланишида Кевин, аввало, ота-онасининг муносабатларини эътироф этади. Кўпчилик тенгдошларининг кучли босим остида қолганликлари, бу эса уларнинг нормал тараққиётига халал берганига Кевин шахсан гувоҳ бўлганди.
Унинг ота-онаси эса, аксинча, фарзандлари олдига ҳеч қандай талаблар қўйишмаганди, бир маромда ривожланиш имкониятини беришди. Бундан ташқари, футбол билан истаганча шуғулланиши мумкинлигини таъкидлашарди. Ана шу оқилона ёндашув Кевиннинг бир маромда ривожланишини таъминлади.
Футбол борасидаги зеҳнининг жадал ўсишига унинг нисбатан барвақт мустақил ҳаётга қадам қўйганлиги ҳам сезиларли таъсир этди. Кевин 13 ёшдан футбол интернатида, 19 ёшдан кейин эса ёлғиз яшай бошлади.
Қандолатчилик сирларини турли қўлланмалардан ўрганган ёш футболчи ўзи учун ҳар хил егуликлар тайёрлашни йўлга қўйди, хорижий тилларга бўлган қизиқиши эвазига инглиз, немис, голланд ва француз тилларини ўзлаштирди. Энди испан тилини ўрганиш ниятида.
Дастлабки синовлар
«Генк»нинг ўз тарихидаги учинчи чемпионлик унвонига эга бўлишига Кевин де Брюйне сезиларли ҳисса қўшди. Табиийки, ёш футболчи ғоят бахтиёр эди. «Челси»дан келган таклиф эса бутун дунёни Кевиннинг оёқлари олдига ташлагандек бўлди.
Бироқ «Стэмфорд Бриж»да ноёб иқтидор соҳиби талаб даражасида тўп сура олмади, балки ўз фаолиятидаги энг мураккаб даврни бошдан кечирди. Бундай қийин вазиятга тушиб қолган аксарият ёш иқтидорлар футболда ўз ўринларини топа олишмаган. Бельгиялик малласоч ҳам уларнинг бирига айланиши ҳеч гап эмасди.
Аммо у нима бўлаётганини тушуна олмай қийналган бўлсада, якунда ижара асосида «Вердер»га ўтишга эришди. Шу тариқа ўзини Германияга танитди, лекин «мусиқачилар» анчайин суст тўп суришди. Де Брюйне эса янада ишончлироқ ўйнай олишига шубҳа қилмас ва «Челси»га қайтиш ниятида эди.
Бироқ Лондонни забт этиш борасидаги иккинчи уриниш ҳам омадсизликка учради. Шунга қарамасдан, бельгиялик футболчи Жозе Моуриньодан хафа эмасди. Португалиялик мутахассис ҳам Кевинга холисона баҳо берди: «Аввалги ва ҳозирги Кевин де Брюйне ўртасида ер билан осмонча тафовут бор!»
Компьютер мия
Ҳозирги юксак савияга эришиш йўлидаги илк қадамларини де Брюйне «Вольфсбург»да амалга оширди. Унинг футболни тушуниш борасидаги ўткир зеҳнига «бўрилар» мутасаддилари муносиб баҳо беришди. Футболчининг ўзи ҳам асосий устунлиги сифатида ақлли миясини эътироф этганди.
«Бўрилар галаси»га қўшилгач, бу мия суперкомпью-тер даражасида ишлай бошлади. Ҳар бир вазиятда қўллаш мумкин бўлган вариантлардан энг мақбулини ажратиб олиш учун сониянинг улушлари кифоя қиларди. Асосийси, Кевин жамоадошлари учун яхши таниш бўлган, рақибларининг хаёлига ҳам келмайдиган вариантларни танларди.
Энг серҳосил мавсумида де Брюйне 21та самарали узатмани амалга оширди. Айтганча, «малласоч» Бундеслиганинг энг яхши ассистентига аталган пул мукофотини ўзи ҳомийлик қилаётган жонажон Фландриядаги болалар турнири ҳисобига ўтказганди.
Зиданнинг оёқлари
Де Брюйнининг техник маҳорати эталон даражасига яқинлашиб қолган. Тўғри, у Месси ёки Роналду қўллайдиган финтлардан фойдаланмайди. Чунки унинг услуби ўзгача. Лекин рақиб ҳимоячиларини доғда қолдирган ҳолда олис масофадан дарвозабон қайтара олмайдиган ажойиб зарбаларни амалга оширишни ҳам уддалайди.
Ҳа, албатта, бельгиялик иқтидор соҳибининг асосий вазифаси - олдинги чизиқдаги жамоадошларини тўп билан таъминлаш. «Манчестер Сити»нинг асосий тўпурари Серхио Агуэронинг айтишича, голларининг аксариятини у Кевиннинг аниқ узатмалари эвазига амалга оширар экан. «У каби сермаҳсул ассистент - ҳар қандай жамоанинг орзуси!», - дейди Серхио.
Бельгия термасининг собиқ бош мураббийи Марк Вильмотс эса шогирдига қуйидагича таъриф берганди: «Кевинда Зиданнинг оёқлари бор. У ўйинни яхши «ўқийди», вазиятга аниқ баҳо беради.
Бошқа ўйинчилар тўпни қабул қилганидан сўнг нима қилиш кераклиги хусусида бош қотирадилар. Кевин эса тўп келишидан аввал уни кимга узатиш масаласини аниқ ҳал қилган бўлади. У - жаҳон миқёсидаги футболчи!».
Янги роль
Барқарор тараққиёт - буюкларга хос сифат. Кевин де Брюйне ўзидаги табиий иқтидорни сайқаллаш билан чекланиб қолмай, янги-янги қирраларни кашф этишга интилади. Унга устозлик қилган кўплаб мутахассислар, жумладан, Мануэль Пеллегрини ҳам Кевиндан чинакам «ўнлик» сифатида фойдаланган.
Футболчи ҳам айнан шу позицияда ўзини худди сувдаги балиқдек ҳис этишини таъкидлаганди. Аммо унинг Бундеслигадаги, айниқса, «Бавария»га қарши ёрқин ўйинлари Гвардиолада ёрқин таассурот қолдирганди: «Ундаги юксак савия, тиришқоқлик ва ақлли ўйин мени лол қолдирганди. Мақсадни Кевинга етказиш учун бир оғиз гап етарли».
Тақдир тақозоси билан таниқли мураббий «Манчестер Сити»да моҳир футболчи билан ҳамкорликни бошлагач, дилига тугиб қўйган режаларини амалга оширишга киришди. Пепнинг талабига кўра, Кевин марказга яқинроқ жойда, баъзан эса таянч ярим ҳимоячиси ҳудудида тўп сура бошлади.
Эътиборлиси, бельгиялик универсал фақат ҳимоя билан ўралашиб қолмасдан, ҳужумкорликда ҳам фаоллиги билан ажралиб туради. Ярим ҳимоячининг эътирофига кўра, у турлича услубда ўйнайдиган жамоадошлари - Давид Сильва, Фернандиньо ва бошқалардан қандайдир янги фазилатларни «ўғирлайди».
Саралар сафида
Тан олиш керакки, ҳатто ихтисосини ўзгартирганидан кейин ҳам Кевин де Брюйне ҳимояланиш (рақиблар узатмаларини илиб олиш, тўпни рақиблардан тортиб олиш) ва ҳужум (аниқ ва самарали узатмалар) жараёнларида юқори кўрсаткичларни қайд этмоқда. Демак, унга дунёнинг энг сара футболчилари сафидан жой бериш ўринли.
Боз устига, Кевиннинг ақлли ўйини кун сайин мукаммаллашиб бормоқда. Аслида иш ҳажмининг ошганлиги футболчидан кўплаб тўсиқларни енгиб ўтишни тақозо этади. Де Брюйненинг маҳорати эса айнан шу тўсиқларни бартараф этиш жараёнида чархланмоқда.
Яқин ўтмишнинг таниқли ҳимоячиларидан бири Гарри Невилл де Брюйнени «МЮ»даги собиқ жамоадоши Дэвид Бекхэмга қиёслаганди. Унинг эътирофича, АПЛнинг энг сара ассистенти йўллаган тўплар керакли манзилга аниқ ва ўз вақтида етиб боради.
Зарбанинг қандай вазиятдан ва қандай масофага узатилаётганининг аҳамияти йўқ. Хуллас, Невиллнинг фикрича, мавсумнинг энг яхши футболчиси Муҳаммад Салоҳ эмас, Кевин де Брюйне!
- Унинг жорий мавсумдаги ҳаракатлари кўпроқ бадиий ижодни эслатади. Тўпни олиб юриш, аниқ узатмалар - чинакам санъат! Тўғри, барчамиз футболчиларни танқид қилишга ўрганиб қолганмиз. Лекин Кевин хусусида бирор-бир салбий фикр билдиришнинг иложи йўқ! - дейди Невилл.
- Майдонда Кевин бажара олмайдиган ишнинг ўзи йўқ. Тўпни тортиб олиш, олға интилиш ёки ҳимояга ёрдам бериш - оддий юмушлар. Керакли пайтда у гол ҳам уради, узатмаларни ҳам амалга оширади. Бор куч-маҳоратини ўйинга сарфлайди. Қисқаси, фаолиятим давомида дуч келган энг яхши футболчилардан бири» - бу эса каталониялик мураббийнинг эътирофи.
Тўғри, Пеп Кевинни Мессига қиёсламади, ҳозирча аргентиналик ҳужумчи тенгсиз! Лекин уни тарбиялаган Гвардиоланинг де Брюйнени энг саралардан бири сифатида баҳолаши - юксак эътироф.
Ҳа, барчамиз футбол юлдузларининг Россия майдонларидаги ўйинларига гувоҳ бўляпмиз. Ҳозир эса барча футболчилар, мураббий ва хизматчиларга омад ёр бўлишини тилаб қоламиз. Албатта, қаҳрамонимиз Кевин де Брюйнега ҳам!
С.РАҲМОНОВ тайёрлади
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20