«Яшил қитъа» шарафини ҳимоя қилувчи Австралия миллий жамоаси жаҳон миқёсида юксак натижаларга эришолмаган. Аммо «соккеруз» таркибида доимо еврофутболда танилган юлдузлар тўп суришган.
Шундайлардан бири - ноёб иқтидор Тим Кэйхилл Россия мундиалига энг ёши катта иштирокчилардан бири сифатида ташриф буюрди. Аллақачон 38 ёшни қоралаб қолган Тим хусусан, Перу термасига қарши кечган 3-тур ўйинида захирадан майдонга тушди, аммо «кенгуру-лар»га ёрдам беромайди.
Шундай бўлсада, АПЛда донг таратган тажрибали ҳужумчини алоҳида эътироф этиш жоиз. Ахир у 4та мундиалда қатнашган кам сонли футболчилар қаторига қўшилди. Демак, Тимнинг 38 ёшига ишора тарзида фаолиятидаги 38та муҳим факт-воқеани келтириб ўтамиз.
1. Кэйхилл футбол билан телевизор воситасида ошно тутинган. У бу борада шундай деганди: «Экрандан чақнайдиган ёрқин шуъла менга болалигимдан таниш. Телевизор орқали АПЛ, ЖЧ ва бошқа мусобақалар ўйинларини тўғридан-тўғри томоша қилардим.
Футбол Австралия вақти билан ярим тунда бошланиб, соат 4:00га қадар давом этгани боис, отамдан рухсат олишим шарт эди. Муҳими, у ҳеч қачон қаршилик қилмаган».
2. Тим айни ўша даврда Англия чемпионатида 2 марта ғалаба қозонган «Эвертон»ни ёқтириб қолган. Унинг таркибида эса Гари Линекер ҳаммани мафтун этганди. Қисқаси, ёш Тим тун бўйи футбол томоша қилиб, кундузи ҳеч нарса бўлмаганидек, мактабга йўл оларди.
3. Акалари Тимни регбига тортишади. Бироқ болакай футбол шайдоси эди. Отаси бу масалада бетараф позицияда туради, онаси эса регбини рад этади. Натижада Тим анчайин хавфсиз ҳисобланган футбол тўгарагига қатнай бошлайди.
4. Кэйхилл 16 ёшга тўлганида, ота-онаси унинг Лондонга бориши ва «Миллуолл» сафидан жой олишини таъминлаш учун қарз кўтаришга мажбур бўлишади.
Шунингдек, акаси ўқишни ташлаб, ишга жойлашади. «Ўша танглик даврини ҳар куни эслайман. Бу ҳаётимдаги чиройли чандиқ бўлиб қолди...», - деганди Тим. Орадан 2 йил ўтиб, ўсмир йигит уйига нақ 5 минг фунт жўнатади. Натижада отаси уй харид қилиш учун дастлабки тўловни амалга оширади.
5. Кэйхилл 2003|2004 йиллар мавсумида Англия кубоги ярим финалида «Сандерленд» дарвозасига гол уриб, «Миллуолл»ни УЕФА кубогига олиб чиқади. Футболчи ўша зарбасини ҳамон эслайди: «Шу голим «Миллуолл»ни дунё футбол харитасига олиб чиқди, мени эса катта саҳнага».
6. Кейинчалик Guardian нашри Кэйхиллнинг «Миллуолл»дан «Эвертон»га 1,5 млн. фунт эвазига ўтишини «10 йилликнинг асосий қаллоблиги» сифатида баҳолади. Ҳужумчи эса Ливерпуль клубига чиндан ҳам, катта манфаат келтирди.
7. «Митти Тим» - «Эвертон» мухлислари австралиялик тўпурарни шу тахаллусга лойиқ кўришган.
8. Австралиялик йигит «Эвертон»даги дебют ўйини чоғи 67 минг мухлис қаршисида қолади ва ўзига аста пичирлайди: «Ҳозир парвоз қиласан ёки чўкиб кетасан! Бошқа вариант йўқ». Муҳими, у биринчи вариантни уддалади.
9. Тим «Эвертон» сафидаги илк голини «Манчестер Сити» дарвозасига урди. Ўшанда қувончдан либосини бошига тортиб олганди. Бу қилмиши учун ҳакамдан сариқ карточка олади, аммо Йозеф Блаттер уни ҳимоя қилганди:
«Рефери қарорига қўшилмайман. Ҳужумчи футболкасини шунчаки, бошига тортди. Агар ечиб ташлаганида, қоидани бузган ҳисобланарди».
10. 2007 йили россиялик Динияр Билялетдинов билан ёнма-ён тўп сурган Кэйхилл УЕФА кубогининг бўлажак соҳиби - «Зенит» дарвозасини забт этди.
Қизиғи, питерликлар кейинчалик айнан «Эвертон» ёрдами билан гуруҳдан чиқишганди - ливерпулликлар сўнгги турда АЗ меҳмони бўлиб, голландларни енгиш асносида «Зенит»га «плей-офф» йўлини очишган.
11. Кэйхилл Австралия термасидаги дебютини 25 ёшида нишонлади. Боиси, у 1994 йили оиласи билан Самоага йўл олган ва у ердаги байрам чоғи 17 ёшли футболчилар ўртасидаги Океания кубоги турнирида маҳаллий терма жамоа сафида бир марта майдонга тушганди.
Хуллас, атиги 11 дақиқалик иштирок Тимга 10 йил давом этган судлашувлар вақти «соккеруз» либосини ки-йиш имконини бермади.
12. «Менда шундай ҳиссиёт туғилдики, гўёки, ҳаётдан кўз юмганману жаннатда юргандекман» - Тим фаолиятидаги энг бахтиёр лаҳзаларни шу тариқа таърифлаганди.
Ўшанда Австралия термаси ЖЧ-2006да японларга 0:1 ҳисобида ютқазаётган паллада Кэйхилл захирадан майдонга тушиб, 84-дақиқада мувозанатни тиклайди ва яна 5 дақиқадан кейин ғалаба келтирувчи голни уради. Бу Тимнинг ЖЧдаги дастлабки голлари эди - «дубль».
13. Тим 2006 йили «Олтин тўп»га даъвогар 50 нафар футболчи сафидан жой олди. Якунда соврин жаҳон кубогини ютган Фабио Каннаварога насиб этди, Тим эса сўровда лоақал 1та овоз олмаган 24 нафар номзод орасида қолди.
Эътиборлиси, Михаэль Баллак, Сеск Фабрегас, Стивен Жеррард, Арьен Роббен, Уэйн Руни, Бастиан Швайн-штайгер, Фернандо Торрес ва Андрей Шевченкога ҳам овоз берилмаганди.
14. Кэйхилл 2008 йили голларидан бирини ғайриоддий тарзда нишонлади - қўлларини кишанланган ҳолда кўрсатганди. У бу ҳаракати билан қамоққа тушган акаси - Шонга ҳамдардлик билдирмоқчи бўлган.
15. Орадан яна 2 йил ўтиб, Кэйхилл бош билан гол уриш бобида Англия чемпионати рекордини ўрнатди. У 170та ўйинда бош билан зарба бериш орқали рақиблар дарвозасини 27 марта нишонга олганди. Яъни ҳар 6,3та учрашувда 1та гол. Таққослаш учун, бўйдор Питер Краучнинг бу борадаги кўрсаткичи 8,59та, Ширерники эса 9,59та ўйинга тенг.
16. Кэйхилл ЖЧ-2010да Бастиан Швайнштайгерга нисбатан «подкат» ишлатиб, қизил карточка олди. «Бир лаҳзада дунё кўзимга қоронғу бўлиб кўринди. Фаолиятимдаги энг аянчли дақиқа.
Ўйиндан кейин Швайни ёнимга келиб, аслида ҳакам қизил карточка кўрсатиб, хато қилганини тан олди. Балки футболнинг бетакрорлиги ҳам шудир - бугун қаҳрамонсан, эртага эса энг омадсиз ношуд!» - деганди Тим бу борада.
17. Бразилия мундиалида эса Тим энг чиройли голлардан бирига муаллифлик қилди. Тўғри, унинг Голландия термаси дарвозасига фантастик зарба орқали урган голи сўровда якуний учликка киритилгани йўқ.
18. Ижтимоий тармоқларни қанча титкиламанг, Кэйхилл ижросидаги симуляцияга дуч келмайсиз. Аммо у бир марта муғомбирлик ишлатишга уриниб кўрган - Рио Фердинанд ёқасидан тортиб, тезроқ туришга мажбурлаганида, ҳаттоки, баҳслашишни ҳам истамаганди. Ўта ноёб кадр!
19. Болагигида йиғлоқи бўлган Тим АПЛда чинакамига чиниқди: «Бундай савияга эришиш жуда қийин. Роналду, Руни, ван Нистелрой, Анри, Робби ва Рой Кин билан ёнма-ён туришнинг ўзиёқ бачкана қилиқлардан воз кечишимни тақозо этарди».
20. Тим футболдаги сайёҳликни оддий ҳол сифатида қабул қилади: «Австралияда туғилиб, Лондон, Манчестер, Ливерпулда, Сидней ва Нью-Йоркда, кейин Шанхайда яшадим. Улкан саргузашт. Турлича маданиятлар, турмуш тарзи, урф-одатларни ўргандим».
21. Кэйхилл - MLS тарихидаги энг тезкор гол муаллифи. У рақиб дарвозасини ишғол қилиш учун атиги 7 сония сарфлаган.
22. Тим Хитойда тўп сурган бўлсада, у ердаги трансферлар тизимини кескин танқид қилганди: «Бу - телбалик. Катта харажатлар ҳаммаси янада ёмонлашишига олиб келади. Футбол бозори шу тарз қизишда давом этса, 200 миллионлик марра тез орада забт этилади. Хитойда пул ва шахсий манфаатлар ҳукмрон. Бу ишлар мамлакатга ёрдам бериши мумкин, лекин футболга эмас»
23. Тим Австралия миллий лигасидаги илк голини 36 ёшида нишонлади. Англия, АҚШ ва Хитой майдонларида тўп сурган фахрий ҳужумчи «Мельбурн дербиси»да ажойиб голга муаллифлик қилганди.
24. Яна «Мельбурн дербиси»: футболчи ўз ўрнини захира вакилига бўшатиб бераётганида қизил карточка билан «сийланди». Сабаби - ўша дамда «Виктория» гол урган ва ҳужумчи рақиб футболчиси ўйиндан ташқари ҳолатда қолганини айтиб, ҳакам билан тортишганди.
25. Голни бурчак байроқчасига боксчилардек зарба бериш орқали нишонлаш - бу Кэйхиллнинг ўзига хос «ташриф қоғозчаси».
26. Тим Осиё кубоги-2015 учрашувларидан бирида трибунада ўтирган ўғли томон ажойиб узатмани амалга оширганди.
27. Тим шон-шуҳратга эҳтиёткорлик билан ёндашади: «Футбол ортидан келадиган манфаат - маблағ, шартномалар, газеталардаги сарлавҳалар ўткинчи. Ҳа, булар ёқимли, лекин футболчиларни тўғри йўлдан оздиради. Шахсан мен шон-шуҳратдан воз кечишга доимо тайёрман. Чунки оилам ҳамиша ёнимда ва шунинг ўзи бахт».
28. Тим турмуш ўртоғи билан болалигида танишган. «Сен менинг энг яқин дўстим, борлиғимсан!» - деган эди у тўй куни маҳбубасига. Ҳозирда жуфтлик 4 нафар фарзандни тарбияламоқда. Кэйхилл дейлик, Бекхэмлар жуфтлиги каби шоҳона ҳаёт шайдоси эмас, аксинча, оддийликни хуш кўради: «Мен учун оила 1-ўринда, ундан кейин эса футбол».
29. Кэйхилл ЮНИСЕФ элчиси сифатида хайрия ишларида фаол ва турли тадбирларга катта маблағ сарфлайди. Бундан ташқари, Foxtel билан ҳамкорликда австралиялик болакайлар учун академия очган. Шахсан ўзи тарбияланувчилар билан тез-тез учрашиб, турли танловлар ўтказади. Танлов ғолиби эса бепул таҳсил олиш ҳуқуқига эга бўлади.
30. Сиднейдаги автомагистрал унинг номи билан аталади. Аввалига трасса унинг қурилишига изн берган Жозеф Кэйхилл шарафига аталган. 2013 йили эса Ироқ термасига қарши кечган ЖЧ-2014 саралаш учрашуви арафасида номи ўзгартирилди - Tim Cahill Expressway. Австралияликлар ўша ўйинда мундиал йўлланмасини нақд қилишди.
31. Учқур автомобиллар - Кэйхилл хоббиси. У вақтида Lamborgini сотиб олиш учун Дэвид Мойесдан рухсат сўраган. Табиийки, мураббий аввалига розилик бермаган, лекин Тим ҳафтада фақат бир марта сайрга чиқишини айтгач, моънелик қилишни тўхтатган.
32. Тим кинофильмлар ишқибози эмас. У асосан футбол томоша қилиш ёки ўзи ўйнашни афзал кўради.
33. Кэйхилл Cahill+ кийим-кечаклар тармоғига эга.
34. Фахрий ҳужумчи ижтимоий тармоқлардан фаол фойдаланади. Унинг обуначилари сони 342 мингдан ошиб кетган.
35. Аллақачон автобиографик асарини чиқарган. Бундан ташқари, болалар учун ўзинининг футболчи бўлиш йўлидаги уринишлари ҳақида асар ҳам ёзган.
36. Тим Австралия термаси сафидаги 100-учрашувини Конфедерациялар кубоги-2017 доирасида ўтказди - Чили жамоасига қарши.
37. Робин ван Перси, Арьен Роббен, Роберто Баджо, Юрген Клинсманн, Лотар Маттеус ва Тим Кэйхилл - булар 3та ЖЧда гол урган юлдузлар.
38. Тим Кэйхилл ЖЧ-2018да 38 ёшли фахрий сифатида майдонга тушди.
Содиқ СОБИР тайёрлади
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20