ПОРТУГАЛИЯЛИК МУТАХАССИС ЖЧ-2018, VAR ТИЗИМИ ВА РОССИЯ ПОЙТАХТИ ГЎЗАЛЛИГИ ҲАҚИДА
- Жаҳон чемпионати — улкан халқаро воқелик, лекин иштирокчи терма жамоалар ижросидаги ўйин сифатини намуна сифатида таърифлаш ўринсиз - бу фикр «МЮ» бош мураббийи Жозе Моуриньога тегишли.
Португалиялик тан олинган мутахассис мундиал пайтида RT жамоаси таркибида фаолият олиб борди. Яъни каналнинг ЖЧ-2018га бағишланган махсус дастурида бошловчилик ролини бажарди.
Хуллас, «Беназир» айнан ўзи ишлаётган RT илтимосига биноан, навбатдаги мундиал таассуротлари билан ўртоқлашди, шунингдек, телебошловчилик ва мураббийлик фаолияти ўртасидаги фарқли жиҳатларга тўхталди.
— Оддий ва табиий савол: телевидение таҳлилчиси сифатидаги ишда энг мураккаб томони нима экан?
— Очиғини айтаман, шахсан мен учун ҳар куни эрталаб соқол олиш ёқмаяпти. Зеро, бунга одатланган эмасдим (кулади).
— Таҳлилий чиқишларингиз оддий мухлислар учун тушунарли бўлиши учун айнан қайси жиҳатларга алоҳида ёндашдингиз?
— Телевидениега келган кўплаб экспертлар дарҳол ўйиндан кейин футбол ҳақида «оғир» муҳокамаларни бошлашади. Улар футболга худди квант физикасидек қарашади, гўё. Бироқ бундай эмас.
Ўйлашимча, ушбу спорт турини ҳамма бирдек тушунадиган даражада таҳлил қилиш керак. Шунга мувофиқ, камера олдида гап бошлашдан аввал ўзимни дастур аудиториясига қўйиб кўраман ва таҳлил чоғи имкон қадар мураккаб терминлардан қочаман.
Энг муҳими - ҳар бир вазиятга объектив қараб, холисона баҳо бериш. Акс ҳолда, томошабин сизни эшитмайди. Яна бир асосий шарт шуки, фикрингиз ўлароқ, мухлислар муайян ҳолатга бошқача кўз билан қарашсин.
— Умуман, футбол статистикаси келажак фани эканлигига ишонасизми?
— Йўқ, статистикага бундай нуқтаи назар билан қарамайман асло. Тушунарлики, турли таҳлилий маълумотлар ёрдам бериши мумкин. Қачон? Қачонки, улардан тўғри хулоса чиқарилса.
Дейлик, ўйин давомида жамоалардан бири 10та, иккинчиси эса 2тагина хавфли вазият яратган бўлса, бу уларнинг асл кучидан далолат бермайди-ку.
Аввало, нега шундай бўлганини ўрганиш талаб этилади. Шундай экан, статистик кўрсаткичларга қаттиқ ёпишиб олиш ярамайди. Улар амалда айтарли ҳеч нарсани англатмайди.
— Деян Станкович бир сафар бутун фаолияти давомида ўйиндан олдин энг яхши сўзларни айнан сиздан эшитганини айтганди. Қайсидир нутқингиз билан алоҳида ғурурланасизми?
— Менимча, Деян футболчилик фаолиятининг энг яхши дамларини менинг қўл остимда ўтказган. Ўшанда «Интер» имкони бор барча совринларни ютганди. Эҳтимол, бу мураббийлик ишимдаги намунали даврдир.
Агар алоҳида битта ҳолатни ажратиб кўрсатиш сўралса, унда мавсум-2009|2010да Киев «Динамо»сига қарши кечган ўйинни эсга оламан. Эсимда, жамоамни фақат ғалаба қониқтирарди. 15 дақиқалик танаффусда чиндан ҳам, футболчиларни руҳий томондан «кўтариш»ни уддалагандим.
Бунда жуда эҳтирос билан гапирганман, фақат тактика эмас, балки ўз ҳисиётларим ҳақида ҳам. Натижада қўшиб берилган вақтнинг сўнгги дақиқасида рақиб дарвозасини ишғол қилиб, ЧЛ «плей-офф» раундига йўл очгандик. Менимча, танаффусдаги нутқим билан шогирдларим кайфиятини бутунлай ўзгартирганман ва бу бурилиш нуқтасига айланиб, якунда турнир ғолиби бўлганмиз.
— Сиз учун қайси вариант қийинроқ: Златан Ибрагимович каби оғир табиатли суперюлдузлар билан ишлашми ёки шундайлар ўрнига иқтидорли йигитларни кашф этишга уриниш?
— Алоҳида характерга эга футболчилар билан ҳамкорликда ҳеч қачон муаммога учраган эмасман. Чунки ўйинчилар мақоми ва маҳоратидан қатъий назар, ҳаммага бир хил муносабатда бўлиб келганман. Клуб мураббийини оила бошлиғига таққослайман.
Ота қайсидир фарзандини ёқтирмаслиги мумкин бўлмаганидек, мураббий шогирдларидан бирини ажратиб қўёлмайди. Ишончим комил, айни шундай муносабат самараси ўлароқ, салоҳият нуқтаи назаридан нисбатан пастда турадиган футболчилар ҳам жамоада ўз ўринлари борлигини ҳис қилишади ва майдонда бемалол катта вазифаларни бажаришади.
— Селекция йўналишидаги иш бўйича умумий қоидаларингиз қандай? Кимнидир кузатишни мураббийлар штаби зиммасига юклайсизми ёки барчасини шахсан ўзингиз баҳолашни маъқул кўрасиз?
— Табиийки, ҳаммасига улгуришни истайман. Бироқ муаммо шундаки, номзодларни обдон кузатиш учун вақт етишмайди. Ахир жамоадаги ишлардан ортиб, мавсум бўйи ўйинларни томоша қилиш учун шаҳарма-шаҳар кезишим имконияти йўқ.
— Клуб эътиборига тушган ўйинчилар билан аввало, қайси мавзуларни муҳокама қиласиз?
— Биринчи навбатда, номзод ўйинчининг тактик чизмаларимга тўғри келиш-келмаслигини аниқлаб олишим зарур. Қолган жиҳатлар эса иккинчи масала.
— Криштиану Роналду, Лионель Месси ёки Килиан Мбаппе каби футболчилардан ҳар доим фантастик ўйин кутишади. Сизнингча, жорий жаҳон чемпионатида ким футбол ихлосмандларини ҳайратга солишни уддалади?
— Ҳали унча танилмаган ўйинчилардан қандайдир «сюрприз» кутиш ўринсиз эканлигини олдиндан айтгандим. Тўғри, тушунарлики, умумэътибор марказида турадиган бундай йирик турнирда 1тагина гол урган футболчи ҳам катта шуҳрат қозониши ҳеч гап эмас.
Бунга ёрқин мисол бор - Негрете. Эсласангиз, у 1986 йили Болгария терма жамоаси дарвозасига «қайчи» усулида бетакрор гол урганди. Мексикалик футболчи айни ўша голи ортидан бирданига чинакам юлдуз мақомини олган, гарчи мундиалгача ҳеч қандай буюк натижа қайд этмаган бўлсада.
— Россия мундиалида янги тактик ечим ва ўзгача ғоялар ҳам кўзга ташландими?
— Суҳбатимиз бошидаги фикримда собит тураман: жаҳон чемпионати тактика ва ўйин сифати бобида энг намунали турнир эмас. Лекин бунда қўрқинчли томони йўқ. Гап шундаки, жаҳоннинг энг яхши жамоалари - бу клублар.
Ахир мураббийлар клубда футболчилар билан мунтазам шуғулланишади, ҳафтада уларни бир неча марта майдонга бошлаб тушишади. Мундиал эса футболни севадиган одамларни бирлаштирадиган ажойиб халқаро воқеликдир. Хуллас, турнирда қандайдир янгилик кўришимиз эҳтимоли жуда паст эди.
— Ҳакамларга ёрдамчи восита - видеоассистент (VAR) тизимига муносабатингиз...
— Янгилик шахсан менга ёқди, тизим чиндан ҳам, ўйинлар давомида кузатиладиган жиддий хатоликларни бартараф этиш имконини берди. Ҳар ҳолда, самараси кўринмоқда ва тизимни ёқлайман.
— Жаҳон чемпионати нафақат спортчилар, балки мухлислар учун ҳам улкан воқеадир. Мундиалдаги фанатлик ҳақида нима дейсиз, қайси ҳолат кучлироқ таассурот уйғотди?
—Ҳаммаси зўр. Одамлар футбол байрамидан хурсандлар, ташкилотчилар профессионал даражада ишладилар. Дейлик, Германия — Мексика ўйинини стадионда томоша қилдим ва ҳар икки жамоа мухлисларига қойил қолдим.
Улар трибуналарда ёнма-ён ўтирганча ўз жамоаларини қўллаб-қувватлашди ва стадионда дўстона муҳит ҳукм сурди. Асосийси шу.
— Москвада қайси диққатга сазовор жойларни томоша қилишга улгурдингиз?
- Бу ерга деярли ҳар йили келяпман. Тўғри, сафарлар чоғи асосан спорт объектлари, аэропортлар ва меҳмонхоналарни кўраман, холос. Лекин Россия пойтахти жуда гўзал шаҳар эканлигини биламан.
Футбол мухлислари кўплигию, уларнинг ҳар қадамда мени таниб, бирга суратга тушишни илтимос қилишлари эса ёқимли бўлди.
Абдуллохон ИСРОИЛХОНОВ тайёрлади
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20