Килиан Санми Мбаппе Лоттен - Франция миллий жамоасининг янги юлдузи ва ЖЧ-2018нинг бош кашфиёти. Умуман, франциялик 19 ёшли супериқтидорни ҳозирдан жаҳон футболининг бўлажак қироли сифатида эътироф эта бошлашди.

Бунга асослар йўқ эмас: Мбаппе гуруҳ раундида Перу термаси дарвозасини ишғол қилди ва Жанубий Американинг ёвқур жамоаси кемасини ғарқ қилди. Кейин «плей-офф»нинг биринчи босқичсида ҳайратомуз ҳаракатланиш асносида «дубл»га эришиб, Лионель Месси ва унинг аргентиналик дўстларини Россиядан «кузатиб» қўйди.

Чорак финалда эса гарчи ўзи гол урмаган бўлсада,  Уругвай термасининг тартибли ҳимоясини «бетартиб» ўйнашга мажбурлади. Унинг яримфинал ва финалдаги кўрсатган ўйинлари ҳам ортиқча таърифга муҳтож эмас.

Бу натижалар таъсирида Мбаппени жаҳон футболининг сара юлдузлари билан таққослаш қайта авж олди. Қизиқ, Пеле ва Марадона каби буюклар ҳам 19 ёшда Килиандек ёрқин нур сочишганми?

ПЕЛЕ. Эдсон Арантис ду Насименту ўз иқтидорини жуда эрта намойиш этиб, 17 ёшидаёқ жаҳон чемпиони бўлган. Пеле ўша ЖЧ-58да 6та гол урганди (чорак финалда - 1та, ярим финалда - 3та ва финалда - 2та). У шу-шу футбол қироли мақомига эга.

Пеле 19 ёшида ҳозирги Мбаппедан зўр бўлганми? ҲА.



МАРАДОНА. 17 ёшли Диего Армандони Аргентинада ўтказилган ЖЧ-78 «заявка»сига киритишмаган. Натижада у Пеле натижасини такрорлаш имкониятидан маҳрум бўлган (ҳар ҳолда, ўша йили аргентиналиклар ғолиб чиқишганди).

Хуллас, Марадона мундиалдаги ғалабани яна 8 йилдан кейин, 25 ёшида нишонлаган.

Марадона 19 ёшида ҳозирги Мбаппедан зўр бўлганми? ЙЎҚ.



КРОЙФФ. «Учар» Йохан Голландия термасида айнан 19 ёшида дебют қилган. Топ-даражага эса кейинроқ эришган - Европа ЧКда илк марта ғалаба нашидасини сурганида, 24 ёшда эди. Мундиалда бўлса, 30 ёшга яқинлашганида жасорат кўрсатган.

Кройфф 19 ёшида ҳозирги Мбаппедан зўр бўлганми? ЙЎҚ.



АНРИ. Тьерри 17 ёшида «Монако»нинг асосий таркибига кира бошлаган ва 3 йилдан кейин жамоанинг «олтин» ютишига ёрдам бериб, Франция чемпионати энг яхши футболчисига аталган совринни қўлга олган.

ЖЧдаги зафарни эса деярли 21 ёшга тўлган пайти байрам қилган.

Анри 19 ёшида ҳозирги Мбаппедан зўр бўлганми? ЙЎҚ.



ЗИДАН. Зайниддин бошида алоҳида кўзга ташланмаган, ўйинида буюклик нишонаси кўринмаган. 24 ёшни қаршилаганидан кейингина «Ювентус» сафига қўшилган ва...

Зидан 19 ёшида ҳозирги Мбаппедан зўр бўлганми? ЙЎҚ.



ПЛАТИНИ. Мишель «Олтин тўп»»ни кетма-кет 3 марта (1983-1985 йилларда) қўлга киритган, лекин 28-30 ёшида. Франция термасидаги дебютига келсак, 21 ёшли Платини илк ўйинидаёқ гол урган, аммо кейинги йили ЖЧ-78да ҳеч қандай каромат кўрсатолмаган.

Платини 19 ёшида ҳозирги Мбаппедан зўр бўлганми? ЙЎҚ.



РОНАЛДО. 17 ёшида ЖЧ ғолибига айланган яна бир юлдуз. Лекин Пеледан фарқли томони шуки, «сўйлоқ» ўша турнирда 1 дақиқа ҳам ўйнамаганди.

Роналдо 18 ёшида Европа томон юриш бошлаган, 19 ёшида Атланта Олимпиадасида кўплаб голлар уриб, бронза медалини ютган. Қисқаси, унинг гипериқтидор эканлиги тайин эди.

Роналдо 19 ёшида ҳозирги Мбаппедан зўр бўлганми? ҲА.



РОНАЛДУ. 18 ёшида «МЮ» ва миллий жамоада дебют қилган Криштиану дарҳол турли даражада совринлар юта бошлади ва кейинчалик Евро-2004да 2та гол уриб, португаллар билан финалда ўйнади, турнирнинг рамзий термасидан жой олди.

Роналду 19 ёшида ҳозирги Мбаппедан зўр бўлганми? ҲА.



МЕССИ. 19 ёшли Лионель мавсум-2006|2007да «Барселона» учун кўп гол урди. У бунга қадар 2 марта Испания чемпиони бўлиш баробарида мамлакат суперкубогини ҳам икки бора ютиш ва ЧЛда зафар қучишга улгурганди.

Месси 19 ёшида ҳозирги Мбаппедан зўр бўлганми? ҲА.

Улуғбек УМАРОВ тайёрлади