Муҳтарам мухлис! Ёдингизда бўлса, ЖЧ-2010 Тони Кроос, Томас Мюллер, Сами Хедира, Месут Озил каби ёш иқтидорларни кашф этганди.
Гарчи ўша мундиалда «қизил фурия» ҳақли равишда ғолиб чиққан бўлсада, футбол дунёси мана шу бўлажак юлдузларга алоҳида эътибор қаратганди.
Жанубий Африкадаги мундиал якунланиши билан Жозе Моуриньодек машҳур мураббий Месут Озил ва Сами Хедирани «Реал»га таклиф қилгани бежиз эмас. Орадан тўрт йил ўтиб, биз тилга олган юлдузлар Бразилияда чемпионлик унвонига эга чиқишди.
ЖЧ-2010да ҳам, ЖЧ-2014да ҳам Лионель Месси ва унинг атрофида жамланган афсунгарлар Йоахим Лёв бошқарган тафаккур машинасига бас келолмагандилар. Таъкидлаш жоизки, Лионель Месси ҳеч қачон маҳоратли шерикларга эҳтиёж сезмаган. Унинг ёнида ҳамиша Серхио Агуэро, Гонсало Игуаин, Анхель ди Мариа каби истеъдодли футболчилар тўп суришган.
Бу футболчиларнинг маҳоратига ҳам бирор мухлис шубҳа билдирмаслигига ишончимиз комил. Сезиб турибсизки, Аргентина терма жамоасининг Лионель Месси байроқдор бўлган бу авлоди энди жаҳон чемпиони бўлишидан бўлмаслиги аниқроқ. Чунки бу авлоднинг олтин даври аллақачон ортда қолиб улгурди.
Биз Александр Гейнрих, Сервер Жепаров, Темур Кападзе, Максим Шацких, Одил Аҳмедов каби футболчилар ансамбли имкониятидан фойдаланиб жаҳон чемпионати финал босқичи йўлланмаси қўлга киритилмаганидан афсусларимиз кўкка ўрлаган бир паллада Аргентина терма жамоаси саккиз йилда учта мундиал ғолиблиги учун курашиб, мақсадига етолмади. Бундан тўрт йил аввал маррага бир қадам қолганда қоқилди.
Қарангки, айни шундай ачинарли аҳвол Неймар ва унинг атрофидаги ажойиб ансамбль тақдирида ҳам такрорланмоқда.
Шундай қилиб, навбатдаги мундиалда ҳам футбол дунёси Месси, Роналду, Неймар сингари даҳоларнинг асл имконларини кўролмади. Бу сафар улоқ Дидье Дешамда, унинг серғайрат жамоасида кетди. Чемпионлик югурганга эмас, балки буюрганга насиб этди.
Мана, яна бир мундиал якунланди. Чемпион аниқланди. Эътибор марказида эса яна Роналду. Эрта-индин Месси ва Неймар фаолиятига дахлдор маълумотлар футбол дунёсини қизиқтириши табиий.
Давраларнинг тўри яна Роналду, Месси, Неймарга аталади, албатта. Истеъдоднинг энг юксак даражаси ҳозир айни шу уч футболчига тегишли эканини барча тан олади. Жаҳон чемпиони бўлганига ишониб-ишонмаган Толиссо ҳамон шу уч даҳо санъатидан ҳайратланса, ажабмас.
Хўш, даҳоларнинг жаҳон чемпиони бўлолмасликлари охир-оқибат мундиал обрўсини тушириб юбормайдими? Бошқача айтганда, ўша даҳолар жаҳон чемпиони бўлиш умидидан воз кечмайдиларми?
Бугун Эрнандес, Павар, Толиссо - жаҳон чемпиони! Неймар, Месси, Роналду эса футбол дунёсида қандай воқеалар юз бераётганидан лолу ҳайрон ҳолда чемпион йигитчаларга боқишмоқда. Нега ундай бўляпти? Сабаб нимада?
Фикримизча, воқеаларнинг бу тарзда ривожланишига бош сабаб футбол тўла-тўкис тафаккурга бўйсунаётганидадир. Тўғри, бирор мухлис Исландия терма жамоасини футбол ўйнашни билмасликда айбламайди.
Бироқ викинглар футболининг даражаси барчага маълум ва бу даражани Аргентина терма жамоаси савиясига тенг қўйиш анчайин кулгили. У ҳолда ЖЧ-2018да турли савиядаги бу икки терма жамоанинг ўзаро дуранг ўйнашини қандай изоҳлаш мумкин?
Назаримизда, энди фусункор дриблинглар воситасида юксак натижаларга эришиш қийин. Кучли мураббийларга тегишли футбол фалсафалари ҳам эндиликда жуда тез эскиради. Маълум маррани забт этган мураббийларда қайта янгиланиш жараёни келажакда кам кузатилади. Жозе Моуриньо ва Хосеп Гвардиола фаолияти бунинг ёрқин мисолидир.
Демоқчимизки, Дидье Дешам Франция терма жамоасининг ҳозирги ёш таркиби билан яна улкан натижа қайд этиши ишонарсиз ҳол ҳисобланади. Мбаппе, Эрнандес, Павар ва Погбалар авлоди учун энди янги ҳаво, янги мураббий даркор! Мураббий бўлганда ҳам, у футболни кучли тафаккур эвазига бошқариши шарт.
Акс ҳолда, «уч-ранглилар»нинг келажаги порлоқ авлоди инқирозга юз тутади. Яна такрорлаймиз: Дидье Дешам ЖЧ-2018ни уч хил ёндашувда ўтказди. Франция терма жамоаси гуруҳ босқичида эҳтиёткор кўринди. Кейин жанговар тусга кирди.
Ярим финал ва финал баҳсларида эса Поль Погба ва Оливье Жиру каби майдонда ўзини эркин тутувчи футболчилар ҳам мураббий тафаккури измида тўп суришгани кўпчиликни ажаблантирди. Бельгия терма жамоаси учинчи ўрин учун кечган учрашувда Дидье Дешам йўлида тўп суриб, инглиз футболчиларини қийинчиликсиз енгди.
Хуллас, биз футболда тафаккур оёқдан устун даврда яшамоқдамиз. Албатта, футбол ҳамиша иқтидорли ижрочиларга муҳтожлик сезаверади. Лекин кучли тафаккур бошқарувисиз энг донгдор итеъдодлар ҳам мағлубликка маҳкумдир.
А.ҲАМИДОВ
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20