Португалиялик юлдуз Криштиану Роналдунинг яқинда «Реал»дан «Ювентус»га ўтганидан хабарингиз бор. Испания солиқчилари билан можародан қутулиш учун у йирик суммадан маҳрум бўлишга ҳам тайёр.
«СЭ» нашри барчаси қандай бошлангани ҳақида маълумот берди.
Суддагииштирок
Криштиану Роналду 2017 йилнинг 31 июлини эслашни унчалик ҳам истамайди. Айнан шу куни унинг солиқларни яшириши борасида Мадрид судидаги биринчи чиқиши бўлганди.
Эслатиб ўтамиз, Португалия терма жамоаси етакчиси ўшанда 2011-2014 йилларда имиж ҳуқуқидан олган даромадлари орқали Испания ғазнасига 14,7 миллион евро миқдоридаги солиқни бермаганликда айбланган. Роналдунинг чиқиши бир ярим соатга чўзилганди.
Бу вақт оралиғида Роналду судга тушунтириш берган. Шунда бир саволга жавоб судьяга аниқдек кўринмади ва футболчига таржимон хизматидан фойдаланишни таклиф қилишди. Криш эса «Йўқ, фақат ўзим жавоб бераман», деганди. Суд жараёни ёпиқ бўлгани боис, 15та мамлакатдан ташриф буюрган 200 нафардан ошиқ журналистлар ташқарида кутиб туришганди.
Жараён якунлангач, Криштиану ташқарига чиқиб ҳаммасини гапириб бериши керак эди. Бироқ барчаси асабий кечгани боис, футболчи фикр билдиришни истамади. У ўз вакили орқали тез орада баёнот беришини маълум қилди.
Баёнот
Тез орада Роналдунинг сўзлари интернетда тарқалди. Marca нашрининг хабар беришича, Криштиану ўзининг айбсиз эканлигини маълум қилди. «Ҳеч қайси мамлакатда солиқ идораларидан ҳеч нимани яширмаганман. Бундай муаммоларга дуч келмагандим. Барча солиқларни тўлаб, даромадларини декларация қилиши лозим.
Мени танийдиганлар яхши билишадики, ўз маслаҳатчиларимдан шуни талаб қиламан. Менга ҳеч қандай муаммолар керак эмас», - деди Роналду. Португалияликнинг айтишича, унга 2010 йили жорий қилинган система бўйича айблов эълон қилишган. Унинг айтишича, 2004 йили «МЮ» юристлари таклиф қилган система орқали солиқ тўлаб келган.
Ушбу схемада оффшор компанияларнинг ҳам иштироки бўлган. Бироқ бу тизим ҳозирги кунда ҳам Англияда ҳеч қандай эътирозга сабаб бўлмайди.
Қонунчиликдаги фарқ
Испания прокуратураси норозилигига сабаб бўлган иккита фарқдан биттаси ҳам шу. Роналдуга қўйилган айбловлардан бири, футболчи Англия солиқ стандартларидан Испания солиқ майдонида фойдаланган. Икки мамлакат қонунчилиги бу борада фарқ қилади. Агар португалиялик футболчи Испания қоидаларига амал қилганида, у катта миқдорда солиқ тўларди.
Демак, 2010 йилдан бошлаб, кимки Испанияда ишласа ва шу билан бирга хорижда даромад олаётган бўлса, солиқ идораларига ана шу даромадининг 52 фоизини тўлаши лозим. Италияга солиштирадиган бўлсак, бундай фойдага максимал солиқ 100 минг еврони ташкил қилади.
Кечиккан декларация
Иккинчи сабаб - солиқ декларациясини топшириш вақти. Роналду 2011, 2012 ва 2013 йилларда имиж ҳуқуқидан олган даромадлари декларациясини 2014 йили топширган. Испаниялик солиқчилар декларацияни ҳар йили тўлдириш кераклигини талаб қилишган. Чунки йилдан-йилга солиқ ставкалари, валюта курслари ўзгариб туради.
Айблов ва келишув
Суд ҳаммасини ўрганиб чиқиб, айбловни ўз кучида қолдирди. Яқинда Reuters агентлиги бир маълумот тарқатди. Унга кўра, 33 ёшли футболчи солиқдан бўлган барча қарзларини тўлайди, икки йиллик қамоқ жазоси жорий қилинган ва солиқларни яширгани учун 3,2 миллион евро миқдорида жаримага тортилган.
Бундан ташқари, у солиқ органларининг харажатлари учун 5,7 миллион, фоизлар туфайли 1 миллион евро беради. Шунингдек, икки йиллик қамоқ жазоси учун кунига 250 евродан тўлайди. Умумий ҳисоблаганда бу Роналдуга 19 миллион еврога тушади.
Айтганча, қамоқ жазоси деганда Криштианунинг панжара ортида ўтириши назарда тутилмаган. Испания қонунларига кўра, иқтисодий жиноят содир этганлар икки йиллик қамоқ жазосига тортилса, у шартли равишда бўлади.
Мендешнинг 11 дўсти
Роналду билан боғлиқ вазият биринчиси эмас. Лекин ўртадаги сумма бўйича энг машҳуридир. Испанияда футболчилар ва мураббийлар солиқ билан боғлиқ муаммоларга кўп дуч келишган.
Уларнинг асосий қисми португалиялик агент Жорже Мендеш ва унга тегишли Gestifute компаниясига бевосита боғлиқ шахслар. Қуйида «Мендешнинг 11 дўсти» ва уларнинг солиқдан қарзлари қанча эканлигини кўришингиз мумкин.
Криштиану Роналду - 14,7 млн. евро (2011-2014)
Радамель Фалькао - 5,6 млн. евро (2012-2013)
Пепе - 3,7 млн. евро (2010-2013)
Жозе Моуриньо - 3,3 млн. евро (2011-2012)
Рикарду Карвалью - 2 млн. евро (2011-2012)
Фабиу Коэнтрау - 1,3 млн. евро (2012-2014)
Анхель Ди Мария - 1,3 млн. евро (2012-2013)
Хамес Родригес, Филипе Луис, Диего Коста, Жексон Мартинесларни солиқчилар текширишмоқда.
Филипе Луис ва Жексон Мартинеслар Gestifute мижози ҳисобланишмайди. Лекин Жорже Мендеш Луиснинг «Атлетико»дан «Челси»га ўтиши ва ортга қайтишида иштирок этган. Шунингдек, Мартинеснинг Мадрид клубидан «Гуанжоу Эвергранд»га кетишида асосий ролни ўйнаган.
Нима қилган тақдирда ҳам Роналду юқорида кўрсатилган суммани беришга мажбур. Бу жаримани тўласагина, хотиржам ухлай олиши мумкин.
Абдуллохон ИСРОИЛХОНОВ тайёрлади
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20