«Барселона» раҳбарияти яқинда «Бордо» ярим ҳимоячиси Малком трансферини эълон қилди. Каталония клуби бразилиялик футболчи учун 41 миллион евро тўлайди. Бу суммага яна 1 миллион евро бонус тўлови қўшилиши мумкин.

Малком эса бирданига 5 йиллик шартнома остига имзо чекди. Қизиғи, олдинроқ унинг «Рома» сафига қўшилиши ҳақида хабар берилганди. Бироқ «Барса» сўнгги паллада Малком йўналишини кескин ўзгартириб юборди.

«Рома» спорт директори Рамон Родригес Мончи Малком трансфери барбод бўлганидан нолимоқда. Зеро, римликлар «Бордо» футболчисини 36 миллион еврога сотиб олишаётганини эълон қилиб улгургандилар. Аммо 24 июль куни бразилиялик футболчи Рим эмас, Каталония томон учди.

Гап шундаки, «Челси» Виллиан учун нақ 70 миллион евро сўрагач, «Барса» ундан воз кечиб, Малком вариантига «ёпишди».

Охир-оқибат, иқтидорли футболчи билан 5 йиллик шартномани расмийлаштириб, каттагина товон пули ҳам белгилади - 400 миллион евро. «Рома» раҳбарияти вакилининг сўзларига кўра, клуб келишувга амал қилинмагани учун «Бордо» билан судлашиш имкониятини кўриб чиқмоқда.

«Малком номзоди бизни тўла қаноатлантирарди, унинг клубимиз таркибини кучайтиришига ишонгандик. Шу тариқа бир ҳафта муқаддам «Бордо» раҳбарияти ҳамда футболчининг агенти билан музокара жараёнига киришиб, якунда барча масалалар бўйича келишувга эришдик.

Ҳаттоки, футболчининг тиббий кўрик учун Римга келишга рухсат олгандик. Қисқаси, барчаси назорат остида эканлиги боис, бутунлай хотиржам эдик.

Орадан кўп ўтмай, «Бордо» президенти қўнғироқ қилди ва футболчи атрофида миш-мишлар тарқалаётгани, шунинг учун трансферни расман тасдиқлаш маъқуллиги билдирди. Мен эса бундай қилиш мавжуд тартибларга тўғри келмаслигини айтдим, аммо у гапида туриб олди.

Якунда французлар расмий баёнот беришди, кейин биз ҳам. Бироқ яна бир соатдан сўнг «Барселона»нинг Малкомга қизиқаётгани ҳақида хабарлар тарқалди. Ҳа, Малкомга бир қатор клублар қатори «Барселона» ҳам даъвогар эканлигидан хабардор эдим.

Шу туфайли трансферни имкон қадар тезроқ расмийлаштиришни истагандим. Кейинроқ футболчининг агенти қўнғироқ қилиб, «Бордо» тиббий кўрик учун берган рухсатномасини қайтариб олганини айтгач, ҳайрон қолдим.

Шунда Франция клуби билан боғландим ва жавобдан ҳайратим янада ошди: «Барселона» сизлардан яхшироқ таклиф жўнатди. Агар футболчидан қуруқ қолишни истамасанглар, суммани оширинглар».

Табиийки, аллақачон келишувга келинганини айтиб, эътироз билдирдим, аммо суҳбатдошим ҳали ҳеч қандай ҳужжат имзоланмаганини рўкач қилди. Мавжуд вазиятни «Рома» президентига тушунтирганимда, у «Барселона»дан яхшироқ таклиф юборишимиз кераклигини айтди.

Мен эса бунга қарши чиқдим, аммо у ўз фикрида қатъий туриб олди. Натижада «Бордо» раҳбарияти ва футболчи агентига «Рома» Каталония клубидан кўпроқ тўлашга тайёрлигини билдирдим. «Бордо» вакили эса тезда расмий ҳужжатлар ва кафолат хати жўнатишимизни сўради.

Соат 23:00га қадар барчасини тайёрладик. «Бордо» президенти агар барча масалалар бўйича келишувга эришсак, сешанба куни ҳужжатларни алмашишимиз ва футболчига рухсат берилишини маълум қилди.

Шу куни эрталаб Малкомнинг шахсий агенти Фернандо Гарсия билан гаплашдим, тушлик пайти «Бордо» президенти билан учрашиб, барчасини тасдиқлашимиз керак эди. Аммо Гарсия билан хайрлашганимдан кейин бошқа агентлар ва «Бордо» раҳбарияти вакиллари янада кўпроқ талаб қила бошлашди, чунки «Барселона» ортга чекинмай, янги таклиф йўллаган экан.

Шунда «Бас» иборасини ишлатдим, чунки аукционда қатнашмоқчи эмасдик. Ахир кечагина таклифни яхшилагандик. Хуллас, барчаси шундай анчли тугади.

Ночорликдан клуб ичида кенгашиб, судга мурожаат қилиш вариантини кўриб чиқдик. Тўғри, ҳеч қаерга имзо қўйилмаган, аммо агентлар ва «Бордо» президенти билан кўплаб ёзишмалар бор.

Мухлисларга нима дейишим мумкин? Рўй берган ишдан афсусдамиз, такрор айтаман, «Бордо» билан тўлиқ келишувга эришгандик, таклифни янада яхшиладик ҳам. Хусусан, президент Паллотта қўлидан келган барча ишни бажарди, аммо аукцион бошлангач, биз тўхтатдик.

Агар кимдир «Рома»га ўтишни истаса, бу яхши, аммо ўзини бозорга соладиган футболчининг бизга кераги йўқ.

Мухлисларни «Рома»да ўйнашга иштиёқи баланд, ҳеч бир жиҳатдан Малкомдан қолишмайдиган, аксинча ундан устунроқ бошқа футболчи олиб келишимизга ишонтираман...», - деди Мончи.

«Рома» президенти Жеймс Паллотта ҳам Малком трансфери амалга ошмаганидан афсусда: «Барселона» яхши иш қилмади. Мончи эрталаб Малкомнинг агенти билан гаплашган ва трансфер масаласида келишувга эришганди.

Ҳуқуқшунослар билан маслаҳатлашдик, энди «Бордо»ни жавобгарликка тортишга уриниб кўрамиз. Кеча «Барселона» биздан кечирим сўради, аммо узрни қабул қилмадим. Клуб бу қилмиши учун Мессини берган тақдирдагина уни кечиришим мумкин...

«Барса» билан ҳамкорликни тўхтатиш? Йўқ. Бу клуб бизникидан каттароқ. Келажакда ҳамкорликни давом эттирамиз, лекин қатъий тартибда». Хуллас, «Рома» вакиллари жазавада...

А.АҲМЕДОВ тайёрлади