Бугунги «Атлетико» испан футболининг гранд жамоаси эканини ҳатто азалий рақиблари ҳам тан оладилар. Бироқ яқин ўтмишда у «ўртамиёна» мақомидаги жамоаларнинг бири эди.
Диего Симеоне эса футболчи сифатида омадсизликларга шоҳид бўлди. Аммо жамоа салоҳиятига шубҳа қилмагани боис, қачондир уни топ-клуб даражасига олиб чиқа олишига ишонч ҳосил қилди.
Табиийки, бунинг учун Диего ўз фаолиятини мураббийлик соҳасига кўчириши ва устози йўл қўйган хатоларни такрорламаслиги талаб этиларди. Симеоне бу мураккаб вазифани аъло даражада уддалади.
«ДАДА, ҲАММАСИ ЖОЙИДА БЎЛСА, ҚАЙТИБ КЕЛМАЙСИЗМИ?»
Ўша кунни яхши эслайман. Битта қўнғироқ ҳаммасини ўзгартириб юборди. «Атлетико» вакиллари мен билан мулоқот қилиш истагини билдиришди. Улар мени бош мураббий лавозимига таклиф этишмоқчи эдилар.
Ўшанда мен кенжа ўғлим Жулиано билан Аргентинанинг курорт шаҳарчаси-Мар-дель-Платада дам олаётгандик. Барда ёнма-ён ўтирар эканмиз, 8 ёшли болакайни янгиликдан хабардор қилдим: «Мени Мадриднинг «Атлетико»сига таклиф этишяпти, нима дейишга ҳайронман»
Жулиано ўйланиб қолди. Бир оздан сўнг сўз қотди: «Сиз Фалькаога устозлик қиласизми? Месси, Роналдуларга қарши ўйнайсизми?» Бу саволларга тасдиқ ишорасини бердим. Ўғлим қўлидаги кулчани сутга ботирар экан, яна саволга тутди: «Дада, агар ҳаммаси жойида бўлса, қайтиб келмайсизми?»
Бу масалага 2 хил ёндашиш мумкин. Бир томондан,Мадридда ишларим юришиб кетгани яхши. Чунки мен айнан шу мақсадда бораман. Лекин у ҳолда болаларимнинг қандай улғайишаётганларини кўра олмайман.
МУРАББИЙЛИК ОРЗУСИ
27 ёки 28 ёшли пайтимда мураббий бўлишга қатъий қарор қилдим. Машғулотлардан қайтгач, (у даврда «Лацио»да ўйнардим), папкани қўлтиқлаб олар ва худди машғулот ўтаётгандек ҳаракат қилардим. Биласизми, болалар қандайдир ўйин жараёнида бирон-бир образга тақлид қиладилар.
Мен эса кап-катта йигит эдим. Лекин жамоа билан машғулот ўтаётгандек нималарнидир ёзар,кейинги ўйин режасини тузардим). Кечга яқин папкам ҳар хил қоғозларга тўлиб кетарди. Қизиғи шундаки, бу иш менга жуда ёқарди. Мана шу эрмак кейинчалик кучли иштиёққа айланди.
Мураббийликдаги асосий иштиёқ-шогирдлар маҳоратини маромига етказиш. Албатта, ҳаммамиз чемпион бўлишни истаймиз. Аммо мен учун энг аъло «чемпионлик» шогирдларини камолот чўққисида кўриш! Коке, Люка Эрнандес, Анхель Корреа каби футболчилар қуйи дивизионлар машаққатларини енгиб,чинакам профессионаллар даражасига кўтарилмоқдалар.
Ўзимнинг фарқли жиҳатларим хусусида қайсар табиатимни кўрсатган бўлардим- бир ишга бел боғласам, тугатмагунча тинчимайман. Футболчиликдан мураббийликка ўтиш арафасида мен Аргентинада, «Расинг» сафида эдим. Янги лавозим таклифини шу жамоадан олдим. Дастлабки таклифни рад этдим, иккинчисини ҳам. Учинчисига розилик бердим.
Жамоадаги муаммолардан хабардор эдим. Лекин шу билан бирга, унинг салоҳиятини ҳам яхши билардим. Яқин дўстларимга айланган собиқ жамоадошларим билан муваффақиятга эриша олишимни сездим.
Сезгим тез орада жиддий синовдан ўтди - жамоам қаторасига 3та ўйинда битта ҳам гол ура олмай, мағлубиятга учради. Табиийки, мутасаддилар хавотирга тушишди, аммо биз анча кучайганимизни сезиб турардик. Муаммолар чекина бошлагач,ишончимиз орта бошлади.
«МАДРИДГА ҚАЙТИШ
2005 йилда «Атлетико»ни тарк этиш арафасида бу ишим жамоага фақат наф келтиришига амин эдим. Чунки пойтахтдаги нуфузим, мухлису-мутахассисларнинг менга нисбатан ҳурмати мураббийнинг тинчини бузган, у ўзини хотиржам ҳис этолмасди.
Бироқ мен Мадриддан кетган кунимдан бошлаб яна қайтиш тадоригини кўра бошладим. Тўғри, футболчилик билан хайрлашиш ва янги соҳадаги фаолиятни бошлаш ватанимда юз беришини аниқ билардим. Лекин кўнглимнинг бир бурчида қачондир «Атлетико»га асқотишимни ва ҳар қандай қийинчиликларни енгишга тайёр эканлигимни ҳис этдим.
«Атлетико»ни қабул қилган пайтимда футболчиларга қандай мурожаат қилиш хусусида узоқ ўйлаб ўтирмадим. Нутқ учун жарангдор ибора танлаш одатим йўқ. Доимо дилимдагини тилимга чиқараман.
ЕЛдаги зафар зўрларга қарши муносиб курашишга бел боғлаган «Атлетико» учун муваффақиятли муқаддима вазифасини ўтади. Устунлик жамоамиз томонида бўлишига амин эдим. Чунки бу жамоада салкам 6 йил тўп суриб, унинг руҳиятидан яхши хабардор эдим.
«Висенте Кальдерон»даги ҳар бир ўриндиқ, унинг соҳиби, президент унинг ёрдамчилари ва хизматчилар беш бармоғимдек таниш эдилар. Ана шу билимларим тўғри йўналишни топишимда жуда қўл келди.
«Атлетико»дагилар доимо рақобатбардош жамоа тарафдорлари бўлишган. Демак, мен ишончли ҳимоя қўрғони ва тезкор қарши ҳужумлар эвазига қудратли рақибларни ҳам тиз чўктира оладиган жамоани шакллантиришим лозим.
Мадридга келганимда жамоа инқироз гирдобида қолган, чемпионатни 10-поғонада якунлаб, Қирол кубогида «Албасете»дан енгилганди. Бироқ мен мухлислар орзусини рўёбга чиқара олишимизга шубҳа қилмадим. 5 ойлик саъй-ҳаракатларимиз эвазига илк соврин- ЕЛ Кубогини қўлга киритдик. Шу муваффақият жамоанинг асл мақсадини намоён этди.
Ҳа, «Реал» ва «Барселона»дек номдор жамоаларни курагини ерга тегизган ҳолда Испания чемпионлигига эришишнинг деярли иложи йўқ. Ўнлаб йиллар давомида бу 2 гранд ҳукмронлик қилишди, уларнинг таркибларида доимо энг сара ўйинчилар тўп суришди.
Лекин тинимсиз изланиш,барқарорлик ва кучли иштиёқ, шунингдек, айрим ижрочиларнинг юксак маҳорати эвазига биз имкони йўқдек кўринган вазифани уддаладик. Қандай қилиб,дейсизми? Ҳар куни ўзимиз амалга оширган ишларимизга ишониш орқали. Мураббий сифатидаги иккинчи тўлиқ мавсумимда менда ажойиб имконият пайдо бўлди.
Мусобақа давомида асосий рақобатчиларнинг бири- «Реал» қоқилишларга йўл қўя бошлади. Биз «отни қамчилаб», «Барса»га таъқибни кучайтирдик. Шу тариқа якуний турда «Камп Ноу»га йўл олдик.Зафар учун ҳатто дуранг ҳам етарли эди. Хуллас, рақиб майдонидан мағлубиятсиз қайтишимиз олтинга тенг эди.
Финал ҳуштаги янграгач, ёрдамчим Херман Бургос ва мен мириқиб кула бошладик. Тўғри, чемпионликка эришиш мумкинлигини билардик.Бутун мавсум давомида шунга интилдик. Лекин совринни нақд қилганимиздан кейинги қувончни таърифлаб беришга ожизман-ҳиссиётлар гулдастаси!
Шубҳа йўқки, ўша мавсум испан футболи тарихида абадий қолади. Ҳа, футболда бир лаҳза бўлсада хотиржамликка берилиш мумкин эмас. Сен тин олган пайтда рақибинг ишлаётган бўлиши мумкин. Боз устига, бизда 1 нафар футболчи учун 150-200 миллионлаб пул сарфлаш имконияти йўқ.
У супер клубларга хос. Шундай экан, биз ўз вазифамизга ижодий ёндашган ҳолда қандайдир янгилик эвазига мақсадга етишимиз мумкин. Айниқса, таркибни кучайтириш масаласида хатога йўл қўймаслигимиз шарт. Агар бу юмуш сиз учун зерикарлидек туюлган бўлса, демак, сиз ҳеч нарсани тушунмабсиз.
Ибодат қилганимда Яратгандан доимо сабр-қаноат сўрайман.Яъни,ҳеч қачон хотиржамликни йўқотиб қўймаслик ва ўзим ҳис этган нарсаларни шогирдларимга аниқ етказишни. Доимий хотиржамликка эришиш жуда қийин. Аммо биргина хато кўп йиллик изланишлар самарасини пучга чиқаришини ҳам унутмаслик керак.
«Атлетико» менинг ҳаётим! Умримнинг 13 йили у билан ўтди. Мураббийлик фаолиятимда футболчиликдаги хислатларим таъсири яққол сезилиб туради. Италия ва Испания майдонларидаги тажрибаларим эвазига ҳимоявий мураббий мақомини олдим.
Бироқ ўйнаш бошқа, устозлик қилиш бошқа. Футболчи жамоа манфаатларидан ташқари, ўзини ҳам ўйлайди. Мураббий эса ҳаммасига жавобгар. Рақибнинг кучли жиҳатларини йўққа чиқариб, ўз жамоасини мунтазам равишда кучайтириши лозим.
Лекин биринчи навбатда у ҳар томонлама кучли бўлмоғи шарт узун мавсум давомидаги мураккаб вазиятларда футболчиларни руҳлантира олиши, олға етаклаши керак. Керакли иборани керакли пайтда топиш учун мураббий дунёқараши кенг бўлиши,бунинг учун кўп ўқиши, эшитиши талаб этилади.
Мен шундай қиламан,кўплаб саволлар устида бош қотираман. Кейин барча учун манфаатли йўлни танлайман. Мардель-Платада 8 ёшли Жулианога ҳам айни ҳақиқатни айтишдан уялмадим: «Очиғи, нима қилиш кераклигини билмаяпман».
7 йилдан кейин «Атлетико» мен учун ҳаёт мазмунига айланди. У билан иложи йўқ вазифани уддаладим!
Муҳаммад СОДИҚ тайёрлади
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20