Яқинда Москванинг ЦСКА клубидан Франциянинг «Монако» жамоасига ўтган Россия термаси ярим ҳимоячиси Александр Головин «Спорт-Экспресс» нашрига катта интервью бериб, ҳамкасбларимизнинг турли мавзудаги саволларига жавоб қайтарди.

- «Монако», «Челси» ва биринчи босқичда «Ювентус» клубларидан бирини танлаш қанчалик қийин бўлди?

- Танлов оғир эди. 22 ёшда ўзингиз бир қарорга келишингиз қийин бўларкан. Бошқа инсонларнинг маслаҳатига қулоқ тутишга тўғри келади. Улар сизнинг фикрингизни эшитишади. «Монако»га эътибор қаратишимнинг биринчи сабаби, бу жамоада ёшлар билан яхши ишлашади.

Шу боис ҳам ушбу таклифни жиддий ўрганиб чиқдим. «Монако»дан қанча футболчи қандай клубларга ўтганини ўргандим. Шу боис ҳам бу мен учун энг маъқул вариант, деган фикрга келдим.

- Россиялик аксарият футболчилар Европага боришга чўчишади. Сабаби, рус футболидаги шинам жойларини йўқотгилари келмайди. Нима учун бу ҳолат сизда кузатилмади?

- Болалигимда Европада ўйнашни орзу қилганман. Албатта, у пайтлари узоқни кўра олмасдим. Лекин Россиянинг кучли клубида ўзимни кўрсата бошлаганимдан кейин Европада ўйнай олишимга кўзим етди. Шу боис ҳам бу ерда шинам ёки шинам эмаслиги муҳим эмас.

- Олдингизда улкан мақсадингиз борми? Айтайлик, аниқ бир клуб сафида ўйнаш.

- Йўқ. Шунчаки, Европанинг топ-чемпионатларида ўзимни кўрсатишни истайман. ЦСКА сафида ЕЧЛда бир нечта ўйин ўйнаш эмас, балки қитъанинг кучли чемпионатида ҳар ҳафта тўп суришни хоҳлайман.

- Футболдан ташқаридаги орзуларингиз борми?

- Деярли барча орзуларим футбол билан боғлиқ. Футбол секциясига тўрт ёшимда келганман. Кун бўйи майдонда эдим. Топ-жамоаларимиз ўйинларини кузатиб, уларнинг бирида ўйнашни ният қилардим. Бугунги орзум - ўзим ўйнаётган жамоанинг етакчисига айланиш. Ҳеч бўлмаганда, муҳим ўйинчиси бўлиш. Ўз савиямни ошириб, «Монако»га максимал тарзда ёрдам бермоқчиман.

- Айтишларича, сиз учун кўп нарса қилган Леонид Слуцкий «Челси»га ўтишни маслаҳат берибди. Шу тўғрими?

- Леонид Викторович билан ҳамиша яхши муносабатдаман. Айнан сиз айтган нарса эса ёлғон. У менга «Челси»га ўтишни эмас, балки қаерда бахтли бўлсам, ўша ерда ўйнашни маслаҳат берган.

- Яна қайси инсонларнинг маслаҳатига қулоқ тутасиз? Калтандаги биринчи мураббийингиз Александр Плясуновнингми?

- Унчалик эмас. ЦСКА ва терма жамоадаги ёши катта футболчилар - Сергей Игнашевич, Вася Березуцкийларнинг ҳам тавсияларини олдим. Улар менга «Қаерга кетсанг ҳам янглишмайсан. Агар қолсанг, хато қиласан», де-йишди. Лекин ҳеч ким муайян бир клубга ўтишимни маслаҳат бермади.

- Ҳозиргача россиялик футболчи учун бунчалик кўп пул тўлашмаган. Ҳар куни буни ўйламасликнинг иложи бўлмаса керак?

- Қийин эмас. Чунки бу ҳақда умуман ўйламайман.

- «Монако» билан шартнома имзолаганингиздан кейин биринчи кимга қўнғироқ қилдингиз?

- Албатта, ўзим учун энг муҳим бўлган инсонлар - ота-онамга. Улар ҳар қандай қароримни ҳурмат қилишади. Худди бошқа яқинларимдек. Улар фақат бахтли бўлишимни исташади. Ўша кеча ЦСКАнинг ёш футболчилари билан кўришиб, хайрлашдик.

- Жамоадаги бошқа футболчилар билан ҳам хайрлашдингизми?

- Ҳозирча йўқ. Лекин тез орада шундай бўлишига умид қиламан. Умуман олганда, ЦСКА ва терма жамоадагилар муваффақият тилашди.

- «Монако»га ўтгандан кейин ЦСКАнинг ўйинларини кўряпсизми?

- Деярли барчасини кўрдим. «Локомотив»га қарши суперкубок ўйинини ҳам.

- Матбуотда Фалькао билан қўл беришиб турган суратингиз тар-қалди. Айнан у сиз билан саломлашгани муҳиммми?

- Албатта. Сизни шундай номдор футболчи кутиб олганидан фахрланасиз. Боз устига, у рус тилида «Хайрли тонг» деб кутиб олди. Бу ердагиларнинг очиқкўнгиллиги ажойиб.

Ҳаттоки, Фалькао ва Йоветич каби юлдузлар ҳам сизга ёрдам беришга ҳаракат қилишади. Улар машқларни бажараётганимда инглиз тилида тушунтириб туришди. Ҳозирча французчани ўргана олмадим.

- Монакодаги биринчи кунингиз қандай ўтди?

- Кундузги соат 2-3ларда етиб келдим. Менга айтган жойларини кўрсатишди. Барчаси ёқди. Бу ерда ҳамиша ҳаво иссиқлиги хурсанд қилди. Пляжга бориш мумкин. Умуман олганда, бу ерга пляж учун келмаганман.

- Пляжга боришга улгурдингизми?

- Бир марта. Келганимнинг иккинчи куни эди. Аслида, мен сибирликман. Шу боис ҳам пляжлар мухлисиман, деб айта олмайман. Бизда икки ой иссиқ бўлади, холос. Шунга бўлса керак, уни севиб қолмаганман.

- Француз тилини ўрганишни бошладингизми? Ўзингиз ўрганяпсизми ёки ўқитувчи ёрдамидами?

- Рус ўқитувчиси билан. Ҳозирча тўртта дарсда қатнашдим. Бироз қийналяпман. Лекин кейинчалик яхши бўлиб кетишига ишончим комил.

- Инглиз тилини қанчалик биласиз?

- Кўп нарсани тушунаман, лекин унчалик гапира олмайман.

- Монакодаги ҳаётингиз ҳақида гапириб берсангиз. Қаерга жойлашдингиз, шаҳар айландингизми?

- Ҳозирча меҳмонхонада яшаяпман, лекин квартира қидиряпман. Сентябрь ойи бошларида кўчиб ўтсам керак. Ҳайдовчи олиб юради. Афсуски, айни пайт машғулотларга эмас, балки тикланиш машқларига қатнаяпмиз.

Жароҳат олган бошқа йигитлар ҳам бор. Уларни кунига икки марта тикланиш базасига олиб боришади. Овқатланишим ҳам асосан меҳмонхонада. Кечки пайт бош-қа жойларга боришим мумкин. Бироқ жароҳат туфайли бунинг имкони бўлмаяпти. Асосан вақтим базада ёки отелда ўтяпти.

- Кайфият туфайлими?

- Йўқ. Кайфиятим яхши. Дастлабки кунлари жуда сиқилдим. Лекин ҳар кун сиқилаверса, инсон қолипдан чиқиб кетади. Шу боис ҳам бошни кўтариб, юришда давом этиш керак.

- Қай тарзда жароҳат олдингиз?

- Кутилмаган вазиятда. Фалькао билан елкама-елка курашаётгандим. Ўша вазиятда оёғим қайрилиб кетди.

- Станислав Черчесов қўнғироқ қилдими? Россия футболидаги қайси шахслар билан алоқага чиқиб турибсиз?

- Станислав Саламович билан келишимдан олдин гаплашгандим. Жароҳат олганимдан кейин Смолов ва бошқа йигитлар билан суҳбатлашдим. Чалов, Кучаев, Чернов шулар жумласидан. Умуман олганда, бу йигитлар билан кўп алоқада бўламан.

- Монакода рус тилида гаплашадиган диаспора кўпчиликни ташкил қилади. Сизни танишяптими?

- Россиядагидек эмас. Лекин баъзида дастхат сўрашади ва бирга суратга тушишни таклиф қилишади.

- Аввалги йили Чемпионлар Лигаси ярим финалига қадар етиб борган «Монако» Россия клубларидан нимаси билан фарқ қилади?

- Ҳаммаси билан. Кишиларнинг машғулотларга бўлган муносабати, тренажёр залдаги ҳолат, тикланиш машқлари. Ўзимизда тренажёр залда бунчалик машқ кўрмаганман. Машғулотлардан кейин барча футболчилар музда туради. Массажга бўлган муносабат эса ўта жиддий.

- Леонарду Жардимнинг ўзгача эканлигини ҳис қилдингизми? Унинг қайси жиҳатлари ўзгача мураббий бўлишини таъминлайди?

- Леонардунинг машғулотлари қизиқарли эканлигини кўрдим. Жамоа билан атиги икки кун бирга бўлдим. Ана шу муддат ичида ўзимга нотаниш бўлган бир қатор машқлар гувоҳига айландим.

- Жардим интервьюларида сизни мақтаяпти ва асосий таркиб ўйинчиси сифатида кўраётганини айтмоқда.

- Буни эшитиш ёқимли. Мен учун ҳам мураббийни уялтириб қўймаслик муҳим.

- 0:0 ҳисобида якунланган «Лилл»­га қарши ўйинни томоша қилдингиз. Учрашув сизни қайсидир жиҳати билан ҳайрон қолдирдими?

- Фанатларнинг қўллаб-қувватлаши жуда ёқди. Футбол ҳақида гапирадиган бўлсам, унинг рус футболидан фарқ қилиши шундоқ кўриниб турди. Икки жамоа ҳам фақат ҳужумкорлик ҳақида ўйлади.

Ҳеч ким ортга чекиниб олмайди. Шунга бўлса керак, ўйин шиддатли бўлди. Икки жамоада ҳам етарли вазиятлар яратилди. Франция чемпионатини анча кучли, деб ҳисоблайман.

- ЖЧ-2018нинг дастлабки учрашувида 1+3 балл йиғдингиз. Ке-йинги ўйинларда тинмай меҳнат қилган бўлсангизда, балл ололмадингиз. Буни нима билан боғлайсиз?

- Саудия Арабистони бошқа рақибларимиздан фарқли ўлароқ, анча кучсиз. Боз устига, улар очиқ футбол намойиш қилишди. Мисрликлар эса эътиборларини асосан ҳимояга қаратишди.

Ваҳоланки, жамоа ҳужумида Муҳаммад Салоҳдек футболчи бор эди. Испания билан янада қийин бўлди. Улар 120 дақиқа давомида ташаббусга эгалик қилишди.

- Акинфеев пенальтилар сериясида Аспаснинг зарбасини қай-таряпти, сиз чорак финалдасиз. Ҳиссиётлар қандай бўлди?

- Тўғрисини айтсам, деярли ўн дақиқа давомида эс-ҳушимни йўқотдим.

- Хорватияга қарши учрашувнинг «овертайм»ида захирага олишганидан хафа бўлмадингизми?

- Йўқ. Чунки ўша пайт жуда чарчагандим. Майдонда аҳмоқона қарорларни қабул қила бошладим. Шунчалик чарчагандимки, миям умуман ишламай қолди.

- Хорватияга қарши учрашувдан сўнг кўпчилик йиғлади. Сиз-чи?

- Йиғламадим, лекин қаттиқ қай-ғурдим. Ўйиндан кейинги дастлабки уч кунда жуда қийналдим. Аммо мухлислар билан учрашганимиздан ке-йин барчаси ўзгариб кетди. Ўша вазиятда ўзимни анча бахтли ҳис қилдим.

А.Аҳмедов тайёрлади