Испания олий дивизиони ҳисобланадиган Примера клублар ўртасидаги йирик ўртоқлик турнири - Халқаро чемпионлар кубоги ташкилотчиси саналган Шимолий Америка компанияси билан ҳамкорликда янги лойиҳа тузилгани ҳақида хабар берди.

15 йилга мўлжалланган келишувда Ла Лиганинг айрим ўйинларини АҚШ ёки Канадада ўтказиш бў-йича ҳам банд киритилган.

Европа ташқарисида бўлиб ўтадиган учрашувнинг дастлабкиси жорий мавсумга тўғри келади. Унда Примеранинг кучли жамоаларидан бири, албатта, қатнашади.

Миллионлар ўйини Шимолий Америкада ҳам тобора ривожланиб бормоқда. Хусусан, АҚШ миллий термасининг халқаро аренада Европа ва Жанубий Америка грандларига муносиб қаршилик кўрсатаётгани ҳеч кимни ажаблантирмай қўйган.

Йирик чемпионатлардаги юлдузлар фаолиятларини давом эттириш учун МЛСни танлашмоқда, «кўҳна қитъа»нинг номдор клубларига эса Атлантика океанининг нариги томонида турне ўтказиш одат бўлиб қолмоқда.

2026 йили Шимолий ва Марказий Америка аҳолиси учта мамлакат - Канада, АҚШ ва Мексикада ўтказиладиган жаҳон чемпионатида кучли термалар ўртасидаги шиддатли ўйинлар гувоҳига айланиши мумкин. Бунга қадар эса сайёрамизнинг энг яхши футболчилари сафидан ўрин олганларнинг нималарга қодирликларини бевосита стадиондан кузатиш имконига эга бўлишади.

Демак, Примера спорт мусобақалари ва кўнгилочар тадбирлар ташкил этиш билан шуғулланадиган, Халқаро чемпионлар кубоги ўртоқлик турнири ҳуқуқига эга компаниялардан бири - Relevent билан шартнома тузди. 15 йилга мўлжалланган келишувга кўра, Ла Лига доирасидаги айрим ўйинлар АҚШ ва Канада ҳудудида ўтказилиши белгиланган.

«Ла Лига - Шимолий Америка» деб номланувчи ўзига хос лойиҳа футбол маданиятини АҚШ ва Канадада оммалаштиришга хизмат қилади. Бу борада жаҳоннинг энг йирик турнири - Испания чемпионати, клублари ва футболчилари асосий ролни ўйнайди.

Шунингдек, қитъамиз аҳолисида ўзининг ҳаяжонли ва драматик баҳслари, узоқ йиллик тарихи ҳамда ижодий ёндашуви билан донг таратган спорт турини яхшироқ таниш имкони туғилади», - дейилади компаниянинг расмий сайтида берилган баёнотда.

Мазкур келишувнинг ижобий томонлари ҳақида Relevent раҳбари Стивен Росс ҳам алоҳида гапириб ўтди. «Бу ноёб лойиҳа - қитъада футболнинг ривожи йўлида қўйилган навбатдаги катта қадамдир. Ажойиб ҳамкорлик натижасида Шимолий америкалик миллионлаб мухлислар жозибали ва юқори савияли турнир баҳсларидан баҳра олиш имкониятига эга бўлишади», - дейди Росс.

Келишувга кўра, ҳар бир мавсумда «Барселона», «Реал», «Атлетико», «Севилья» ёки «Валенсия» каби клубларнинг биттадан ўйини ушбу қитъада ўтказилиши лозим. Кейинчалик ўйинлар сони яна ортиши мумкин.

Ҳозирча учрашувларнинг қаерда ва қайси санада ўтказилиши тасдиқланмаган, аммо бу воқеа 2019 йил бошларига тўғри келиб, ўйин Майамидаги стадионда ўтказилиши ҳақида гапирилмоқда.

Шимолий Америка компанияси жаҳоннинг энг яхши жамоалари иштирокидаги мусобақаларни ўтказиш бўйича тажрибага эга. Ўтган йили Флоридадаги «Хард Рок Стэдиум» стадионида Халқаро чемпионлар кубоги доирасида машҳур «эль-класико» баҳси ўтказилди.

Шунингдек, «Бавария», «Манчестер Сити» ва «Манчестер Юнайтед» иштирокида ўйинлар бўлди. Маҳаллий аҳоли мазкур учрашувларни зўр қизиқиш билан кузатди. Айнан шу факт янги лойиҳа ташкил этилишида ҳал қилувчи аҳамият касб этди.

Ҳозирча «Барселона» ва «Реал» ўртасидаги ўйинни АҚШ ёки Канадага топшириш борасида музокара олиб борилаётгани йўқ. Буни Ла Лига президенти Хавьер Тебаснинг ўзи ҳам тасдиқлади.

Томонлар маҳаллий мухлисларни Европа футболи билан таништиришдан ташқари, Шимолий америкалик инвесторларнинг Испания чемпионатига қизиқишини ҳам инобатга олишмоқда.

Боз устига, лойиҳа муваффақиятли чиқса, янги ҳомийлик шартномалари имзоланиши, телевизион трансляциялар сони ошиши, шунингдек, ўртоқлик ва кўргазмали ўйинлар ўтказилиши ҳамда АҚШ ва Канадада Европа спорт мактаблари ташкил этилиши учун ажойиб имконият туғилади.

«Ла Лига - Шимолий Америка» лойиҳасини тузиш биз амал қиладиган стратегиянинг халқаро таъсирини кенгайтиришда бош омил вазифасини ўтайди.

Мазкур келишув нафақат Шимолий Америка футболининг ёрқин келажагини таъминлайди, балки Примера ва унда қатнашувчи клубларга ҳам фойда келтиради», - дейди Испания чемпионатининг халқаро ҳамкорлик бўйича бўлими раҳбари Оскар Майо.

Бошқа қитъалардаги таъсир дои­расини кенгайтириш истаги Европанинг йирик чемпионатлари учун янгилик эмас. Бир неча йиллар аввал Англия Премьер-лигасининг муайян жамоаси АҚШ ёки Осиё мамлакатларининг бирида битта ўйин ўтказиши бўйича режа таклиф қилинганди.

Лойиҳа иш-қибозлар норозилиги сабаб бекор қилинган, қолаверса, ФИФА билан бу борада ўтказилган музокаралар ҳам самара бермаганди.

Ўтган йили Тебас Ла Лига мунтазам чемпионатнинг бирорта ўйинини Хитой ҳудудида ўтказишни хоҳлаётгани ҳақида гапирган, аммо бу режа ҳам амалга ошмаганди.

«Барселона» ҳамда «Севилья» ўртасидаги Испания Суперкубоги баҳси Марокашнинг Танжер шаҳрида ташкил этилиши эса ушбу масалада олдинга ташланган катта қадам бўлди.

Ў.УМАРОВ тайёрлади