Майкл Оуэннинг Францияда ўтказилган 1998 йилги жаҳон чемпионатида Аргентина дарвозасига урган голи ёдингиздами? Ўта тезкор 18 ёшли футболчи Бекхэмдан пас қабул қилгач, Айяла ва Чамотни ортда қолдириб, «тўққизлик»ни аниқ нишонга олганди.
Англия якунда ютқазган, Оуэннинг фаолияти эса барча кутгандек бўлмади. Ҳа, 90-йиллар охиридаги футбол жозибасини энди қайтариб бўлмайди. Аммо Майкл ўша пайт фойдаланган бутсаларда тўп суриш имкони туғилмоқда.
Англиянинг Umbro бренди афсонавий Speciali 98 моделини қайта ишлаб чиқди. Ушбу бутса табиий чарм ва классик услубни сақлаб қолган. Нархи – 140 фунт стерлинг.
Ретро-коллекцияга, шунингдек, шорти, иштон, куртка, рюкзак ҳамда футбол тўпи ҳам киритилган.
НАВҚИРОН ОУЭН
Майкл ЖЧ-1998га англиялик ёш суперюлдуз сифатида ташриф буюрганди. Ўшанда унинг «Ливерпуль» асосий таркибига кирганига эндигина бир йил бўлган, шунга қарамай, Оуэн Премьер-лиганинг энг яхши тўпурарига айланганди (у билан бирга «Ковентри»даги Даблин ва «Блэкберн»даги Саттон 18тадан гол уришганди). Шунингдек, бу йигитча мавсумнинг энг яхши ёш футболчиси деб тан олинганди.
Жаҳон чемпионати арафасида Оуэн бош мураббий Гленн Ходдл уни Францияга олиб кетишига ишонган, шунга қарамай, Англиянинг 90-йиллардаги энг ёрқин ўйинчисининг «заявка»дан четда қолганини эшитиб, бироз ҳаяжонланганди.
«Терма жамоанинг 27-28 нафар аъзоси оила аъзолари билан Испаниянинг Ла-Манге шаҳридаги машғулотлар лагерига таклиф этилганди, - дея эслайди Майкл. - Якуний таркиб 23 кишидан ташкил топишини инобатга олсак, кимдир уйда қолишига тўғри келарди. Ҳар биримиз беш дақиқа мобайнида мураббий хонасида бўлдик.
Ростини айтсам, мундиалга боришимга ишончим комил эди. Кейинчалик Гаскойннинг таркибдан тушиб қолгани ҳақида хабар беришди. Пол шундан сўнг хонани «бошига кўтарганди». Натижада кейинги учрашувларни ярим соатга кечиктиришга тўғри келди. Ушбу воқеа барчамизга таъсир қилганди.
Ўшанда ўйлаб қолдик: агар Гаскойнни олишмаган экан, демак ҳеч кимга жой кафолатланмаган. Менинг галим келганида, мураббий шундай деди: «Сен термага олиндинг. Илк учрашувларда бошланғич таркибга киришинг аниқмас, аммо мазкур чемпионатда катта роль ўйнайсан. Ширер ва Шерингем асосий ҳужумчилар бўлишади, бироқ сен ҳам четда қолиб кетмайсан».
Англиянинг Тунисга қарши кечган ЖЧдаги биринчи ўйинида Оуэн беш дақиқа ўйнади. Иккинчисида, Руминия билан баҳсда Майкл яна захирадан майдонга тушиб, гол урди. Инглизлар 1:2 ҳисобида ютқазишди ва Колумбияга қарши учрашувдан олдин Ходдл ўйлаб қолди: вақт келди. Шерингем захирага олиниб, Оуэн ўйинни бошланғич таркибда бошлади.
АНГЛИЯ - АРГЕНТИНА-98
Англияликлар гуруҳда иккинчи ўринни эгаллаб, 1|8 финалда Аргентинага рўбарў келишди. Ушбу термалар ўртасидаги ўйинлар ҳамиша муросасиз руҳда кечган, биргина 1986 йилги мундиалда Марадонанинг қўли ёрдамида гол урганини эслаш кифоя.
Ёки ЖЧ-1966да инглизлар устози Альф Рамсей аргентиналикларни «ҳайвонлар» деб атаб, шогирдларига рақиб футболчилари билан либос алмаштиришни тақиқлаганини ёдга олайлик.
Францияда ўтган мундиалдаги ўйинда ҳисоб 1:1 бўлиб турганида (пенальтидан Батистута ва Ширер тўп киритишганди), 16-дақиқада Майкл Оуэн турнирдаги энг чиройли голни уриб, англияликларни ҳисобда олдинга олиб чиқди. «Бекхэм менга пас узатганида, майдон марказида тургандим.
Ёнимда ҳимоячи турганини кўриб, ўйлаб қолдим: ундан қочиб кетиш керак. Ўнг оёғимда тўпни ўзимга ўнглаб, аргентиналик рақибимни деярли ортда қолдириб, рўпарамга қарадим. Эсимда, ўшанда миямга бир фикр келганди: «Олдинда фақат бир футболчи бор экан!».
У анча ортда турганини кўриб, ҳужум қилишим кераклигини тушундим. Худди қаршимда манекен тургандек туюлди. Тўппа-тўғри ҳимоячи томон интилиб, сўнгра ёнга ҳаракатландим. Ўнг томондан Скоулз келаётганди, бироқ мен тўпга яқинроқ эдим. Дарвоза томон зарба йўллагач, ортга қайтдим ва ўйладим: «Голим ёмон чиқмади!».
Жамоадошларим мени табриклашга ошиқишди. Трибунанинг қайси қисмида ким ўтирганини билмасдим, лекин майдон марказига қайтишим ҳамоно 30 мингдан зиёд мухлис орасидан ота-онамни топдим», - дея эслайди Майкл Оуэн.
Биринчи бўлим охирларида Занетти ҳисобни тенглаштирди, танаффусдан кейин эса Симеонега қарши қўполлик ишлатгани учун Бекхэм четлатилди. Якунда инглизлар ўйиндан кейинги пенальтилар сериясида ютқазишди.
«Мағлубиятдан сўнг кўп кўз ёш тўкилди. Биз яқинларимиз билан кўришгани бордик. Ходдл бошқаларнинг аралашишини хоҳамасада, биз турнирни тарк этгандик ва автобус ёнида қариндошларимиз билан кўришишимиз керак эди. Ота-онамнинг нима дегани ҳамон ёдимда: «Афтидан, сенинг ҳаётинг аввалгидек бўлмайди», - дейди Оуэн.
Майкл термада яна 10 йил тўп суриб, 40та тўп киритди. Аммо Umbro Speciali 98 ёрдамида аргентиналиклар дарвозасига урилган голнинг қиёси топилмади. Ушбу русумдаги бутсалар илк бор 1992 йили чиқарилганди.
Оуэндан ташқари, Евро-96нинг энг яхши тўпурари бўлган Алан Ширер ҳам ушбу спорт анжомини ёқтирарди. Speciali билан футбол ўйнаганимда, уларни мунтазам кийиб юришни хоҳлардим. Ушбу бутсаларни яроқсиз ҳолга келгунча ишлатганман. Speciali - ҳақиқий футбол бутсалари», - дея эслайди Ширер.
Роберто Карлос ўша машҳур ўйинда 35 метр узоқликдан Франция дарвозасини ишғол қилганида, оёғида Umbro Speciali бўлган. Колумбия термасининг собиқ футболчиси, Жанубий Америкада икки марта йил футболчиси номини қўлга киритган Карлос Вальдеррама ҳам 1996-1998 йиллар мобайнида шу русумдаги бутсаларда тўп сурган.
UMBRO ҚАНДАЙ БРЕНД?
Umbro компаниясига 1920 йили Англиянинг Уимслоу шаҳарчасида яшаган ака-ука Харольд ва Уоллес Хамфрилар асос солишган. Дастлаб унинг номи Humphreys Brothers бўлган, аммо тўрт йилдан сўнг ака-укалар брендни Umbro деб аташга қарор қилишди.
«Манчестер Сити» ҳамда «Шеффилд Уэнсдей» айнан Umbro билан 1934 ва 1935 йилларда мамлакат кубогини қўлга киритишгач, мазкур бренд Англияда шуҳрат қозонди.
1966 йили Англияда ўтган жаҳон чемпионатида 16та жамоадан 15таси Umbro либосларидан фойдаланди. Пеле етакчилигидаги Бразилия термаси Umbro билан учта мундиалда зафар қучди: 1958, 1962 ва 1970 йилларда.
Ўтган асрнинг 80-йиллар охири 90-йиллар бошида америкалик ўсмирларга нейлондан тикилиб, турли рангларга бўялган Umbro шортилари ёқиб қолди. Аввалига уларни АҚШ ёшлар лигасидагилар кийишди, сўнгра ундан кундалик кийим сифатида фойдаланадиган бўлишди. Ушбу шортилар компания рамзига айланди.
Аммо 90-йиллар ўрталарига келиб бренд маҳсулотига талаб камая бошлади. Қайсидир маънода, бунга компаниянинг бошқа спорт ва дам олиш турларига мўлжалланган экипировкалар ишлаб чиқаришга катта эътибор қаратгани сабаб бўлди. Шимолий Америка бозори забт этилмади, Европа ва Жанубий Америкадаги позиция йўқотилди.
Бошқа томондан, Adidas, Nike ҳамда Reebok каби фирмалар кучли рақобат туғдиришди. 2007 йилнинг 23 октябрида Nike Umbro фирмасининг 100 фоиз акцияларини 582 млн. долларга сотиб олишини маълум қилди. Аммо Англия брендини қайта шакллантириш «найкчилар»га ҳам насиб қилмади ва 2012 йилда Umbro лицензион ҳуқуқлар бошқаруви билан шуғулланувчи Iconix Brand Group компаниясига 225 млн. долларга сотилди.
******
Ҳозирда Umbro «Эвертон», «Вест Хэм», «Шальке», «Халл» ва Москванинг ЦСКА клублари учун либослар тайёрлаш орқали босқичма-босқич ҳаётга қайтмоқда. Спорт ретроси модалари машҳур бренднинг қайта туғилишида ёрдам берди: шу тариқа классик буюмлар (Оуэннинг бутсаси сингари) яна ишлаб чиқарилмоқда, замонавий дизайнерлар эътибори қозониляпти. Umbro 2017 йили Off-White билан ҳамкорликда кроссовкалар ишлаб чиқара бошлади. Уларнинг нархи 410 доллар қилиб белгиланди.
Жорий йил Umbro компаниясининг ҳамкорлик кўлами кенгайди. Англиялик дизайнер Кристофер Реберн билан биргаликда инглизлар термасининг 1996-2010 йиллар мобайнидаги фаолиятига атаб свитшот, куртка, майка ва шортилар ишлаб чиқарилди.
ЖЧ-2018 ўтказилаётган пайтда Umbro Highsnobiety модалар нашри билан ҳамкорликни йўлга қўйди. Натижада свитшот ва майкалар тикилиб, уларда дунё харитаси, футбол конфедерациялари рамзи сифатида олтита юлдуз тасвирланди. Highsnobiety номи эса инглиз ва кирилл алифбосида ёзилди.
Ў.УМАРОВ тайёрлади
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20