«Манчестер Юнайтед» жорий мавсумни кутилганидан бўшроқ бошлади. Сўнгги пайтларда жамоа бош мураббийи Жозе Моуриньонинг «МЮ»дан кетиши мумкинлиги ҳақида хабарлар урчий бошлади.

Яқинда MUTV канали португалиялик мутахассис билан интервью уюштирди. Қуйида ана шу суҳбатни ўқишингиз мумкин.

- Ёзда «Олд Траффорд» ва маш-ғулотлар базасидаги кийиниш хоналарида ўзгаришлар юз берди. Уларга муносабатингиз қандай?

- Менга жуда ёқди. Эски кўриниши ёмон бўлганди, деёлмайман. Лекин бошиданоқ бизга ўзгаришлар кераклигини таъкидлаганман. Ўлчам туфайли, айниқса, «Олд Траффорд»да буни амалга ошириш қийин бўлаётганди.

Таъмирлаш ишларидан кейин машғулотлар майдонига ташриф буюрганимизда, барчамиз учун ёқимли сюрприз бўлди. «Олд Траффорд»ни биринчи ўйинга базўр тайёрладик.

- Ўзгаришлар мураббийлар штабида ҳам юз берди ва ундан Майкл Кэррик, Киран Маккена ва Стефано Рапеттилар жой олишди. Олдин ўз штабингизни оилангиз эканлигини таъкидлагандингиз...

- Жуда мамнунман. Менга Руи Фариа етишмаяпти. У нафақат ассистент, балки дўст ҳамдир. Биз мураббийлар штабига уч нафар янги аъзони қабул қилдик. Улардан бири ўз ўйинчим бўлган. Шу боис ҳам уни яхши биламан. Тўғри, Кэррик мураббийлик соҳасига энди кириб келди, лекин бу борадаги имкониятлари юқори.

Стефано «Интер»да ёрдамчим бўлган. Киран ёш мутахассис. Унинг катталар жамоасида ишлаш тажрибаси йўқ, шунга қарамай, мураббийлик соҳасида тажрибаси етарли.

- Клуб ҳақида ёлғон гап-сўзлар тарқаётгани жонингизга тегдими?

- Уйдирмаларни ёмон кўраман. Агар одамлар фикримга қўшилишмаса, бу муаммо эмас. Аксинча, уларни ҳурмат қиламан. Чунки бу ўйиннинг бир қисми. Лекин ёлғонни умуман кўтара олмайман. Мана, сиз бу ерда кўп бўлгансиз. Машғулотлар базасида барчаси кўнгилдагидек.

- Фред билан шартнома имзолангунига қадар «Бразилиялик футболчиси бўлмаган жамоа - жамоа эмас», дегандингиз. Энди ихтиёрингизда икки нафар бразилиялик - Фред ва Андреас бор.

- Андреас қисман бразилиялик. У Европа футболига сингиб кетган. Ваҳоланки, унинг келиб чиқиши Бразилиядан. Менимча, Фред майдонда 70-75 дақиқа ҳаракат қилиб, мухлисларга ёқишни бошлади. Ишқибозлар унинг жамоа ва ўйин услубига позитив киришиб кетаётганига гувоҳ бўлишди.

У билан шартнома имзолаганимизда, ўйин динамикасига ўзгартириш киритишини билгандик. Умуман олганда, Фред яхши йигит. Боз устига, жамоага янги мусиқа олиб кирди. Чунки Давид де Хеа ва Эшли Янгнинг саундтрекларини эшитавериб безор бўлгандик (кулади). Ёш футболчилар учун асосий таркибга киришнинг икки йўли бор.

Биринчиси, ёшлар жамоасидан бирданига йўл. Худди Скотт Мактоминей сингари. Иккинчиси, Андреас Перейра каби бошқа жамоаларда ижарада ўйнаб, тажриба тўплаш.

- Академия тарбияланувчилари Андреас ва Скоттдан қандай ўрнак олишлари керак?

- Ёш футболчилар, бошқалардан фарқли ўлароқ, бу ҳақда унчалик ҳам гапирмайдилар. АПЛнинг биринчи туридан ўрин олган «Лес-тер»га қарши учрашувимизда, лиганинг бошқа топ-клублари билан солиштирганда, бизнинг таркибимизда ўз тарбияланувчиларимиз кўп эди.

Пул ҳал қилади, улар сотиб олишади. Бизда эса майдонда Перейра, Погба, Рэшфорд ва Мактоминейлар ҳаракат қилишди. Лингарднинг йўқлиги билинди, у жароҳатдан энди қутулганди. Бугунги кун футболини ҳисобга оладиган бўлсак, бу фантастика. Биз шу йўналишда кетяпмиз.

Ван Гал даврида Рэшфорд, кейин Мактоминей ва мана энди, Перейра. Шу билан бирга скаутлик хизматини янада ривожлантиришимиз керак.

- Футболчиларнинг ривожланиши учун етарли эътибор қаратилмаяпти, деб ҳисоблайсизми? Одамлар таниқли ўйинчилар келишини исташади. Лекин айтайлик, Андреас сингари ўсиб бораётган ёшларни назардан четда қолдиришади.

- Ҳа, ўйлайманки, Андреас яхши ишлади. Агар у ўтган мавсум шу ерда қолганида, ҳозирги ҳолатини бир йил олдин ҳис қилиши мумкин эди. Лекин яна бир марта ижарага кетиш қарори ёмон эмасди. Айниқса, инсоний жиҳатдан. Унинг аҳволи Мактоминей ва Рэшфордникидан фарқ қилади.

Лекин клубдагилар сўнгги уч йилда асосий жамоа учун уч нафар футболчи тайёрлаганимиздан хурсандлар. Айрим клублар ўйинчиларга дебют қилиш учун имкон беришади.

Кейин айнан ўша футболчилар «радар»лардан йўқолиб қолишади. Уларнинг қаерга кетганини ҳеч ким билмайди. Бироқ Скотт, Маркус, Андреас каби йигитлар биринчи жамоа учун рақамлар эмас, балки вариантлардир.

- Мавсум стартидаги мағлубиятсиз сериянгизни давом эттирдингиз. Чемпионатни уч очко, яъни ғалаба билан бошлаш қанчалик муҳим?

- Албатта, бу ажойиб. Лекин мен учун «требл» билан якунланган икки мавсум бошида ғалаба қозонмагандик. Сиз омадли бўлишингиз мумкин, аммо биринчи ўйинингизда ҳар доим ҳам ғалаба қозонавермайсиз. «Порту» ва «Интер» билан юз берган икки ҳолатда ҳам биринчи ўйинларда дуранг қайд этганмиз. Кейин ҳамма турнирларда зафар қучганмиз.

- Сизда ғалабалар фоизи энг яхши кўрсаткич - 62ни ташкил қилади. Бу ҳақда билармидингиз?

- Билмасдим. Бу яхши.

- «Заявка»дан жой олмаган футболчилар билан гаплашиш осонми?

- Йўқ. Улар буни қачондир англаб етишади. Майкл Кэррик тушунишни бошлади, кейинчалик уларда ҳам шундай бўлади. Ихтиёримда ўйнамаётган футболчилар авлоди бор. «Порту»даги шогирдларимнинг барчаси фаолиятини якунлади.

Уларнинг аксарияти телефон ва СМС орқали ёки кўришиб гаплашганимизда, футболчилик даврларида қандай, ҳозир қандай ўйлаётганлари ҳақида гапиришади.

ЖАЪФАРАЛИ тайёрлади