Бу йилги Евровидение танловида Хорватия миллий жамоаси вакили Ведран Чорлуканинг умр йўлдоши қатнашди. Умуман, жаҳон футболи ва асосий мусиқий мусобақа - қўшиқлар танлови ўртасида узвий алоқа бор.

Хуллас, Чорлуканинг ҳамхонаси Франка Евровидение-2018да Crazy композицияси билан Хорватия шарафини ҳимоя қилди ва шунинг баробарида футбол жамоатчилиги назарига тушди. Чунончи, эри уни «Инстаграм» орқали имкон борича қўллаб-қувватлаб турди.

Тўғри, Франкага танловнинг финал раунддига чиқиш насиб этмади. У бунинг учун биринчи ярим финалда 19 нафар иштирокчи орасида кучли 10таликка кириши керак эди. Бироқ хорватиялик хонанда етарли овоз тўплай олмади.

ҚАҲРАМОН - РОНАЛДУ

Бу йил мусиқа оламининг бош мусобақаси Лиссабон шаҳрида ташкиллаштирилди. Чунки 2017 йилги танловда португалиялик Сальвадор Собрал ғолиб чиққанди. У оламшумул натижадан кейин камтарона фикр юритгани билан футбол мухлислари эътиборини қозонди. «Нима, шу билан миллий қаҳрамон бўлдимми? Йўқ, йўқ... Криштиану Роналду - Португалия миллий қаҳрамони ва шундайлигича қолади.

Мен эса шунчаки, осуда яшашни истайман. Албатта, маълум даражада муваффақиятга эришганимдан хурсандман, лекин буларнинг барчаси ўткинчи», - деди Собрал SongFestival нашри мухбирлари билан суҳбатда. Қисқаси, у футболдаги машҳурлик устун эканлигини очиқ-ошкора тан олди.

«ФУТБОЛЧИ» ХОНАНДА

2007 йили Евровидение танловида қатнашган Дмитрий Колдун Беларусь хонандалари орасида энг яхши натижага эришди - 6-ўрин. Унинг Work Your Magic қўшиғи Европада анча оммалашди ҳам.

2015 йилга келиб эса, Колдун Беларусь чемпионати иккинчи лигаси иштирокчиси «Динамо» (Рогачёв) «заявка»сидан жой олди. Лекин рўйхатга ҳужумчи сифатида киритилган хонанда бирор марта майдонга тушгани йўқ. Аниқроғи, у 2та ўйинни захира футболчиси мақомида четда кузатдию, клубдан кетишни ихтиёр этди. 

ДЕ ХЕА ҚАЛЛИҒИ

Ҳозирда таниқли хонанда Эдурне Гарсия Евровидение-2015да Испания номидан куйлаб, якуний ҳисоб-китоб бўйича 21-ўринни эгаллаганди.

Кўпчилик билса керак, Эдурне футболга асло бефарқ эмас. Ахир Испания терма жамоаси дарвозабони Давид де Хеа билан танишганига анча бўлди.

БАРЧАСИГА ЭВРЕБЕ САБАБЧИ...

«Челси» фанатлари норвегиялик ҳакам Том Хеннинг Эвребени ҳалигача кечиришмаган. Зеро, лондонликлар айнан унинг хатолари туфайли 2009 йили «Барселона»ни енголмай, ЧЛ финалига чиқишдан маҳрум бўлишганди.

Қисқаси, «Челси» мухлислари ўша йили Евровидениеда Норвегияга қарши ўзига хос «тарғибот» ишларини бошлашгача боришди. Ҳар ҳолда, Daily Star нашрининг маълумоти бўйича айтсак, жамоа фанатлари англияликларга алоҳида мурожаат йўллаб, Норвегия номидан саҳнага чиққан Александр Рибакка овоз бермасликни сўрашган.

Айтиш жоиз, уларнинг қасос олишга қаратилган бу ҳаракатлари наф келтирмаганди. Яъни танловда айнан Рибак ғолиб чиққан ва Норвегия байроғи баланд кўтарилган.

ПАРОДИЯ

«Арсенал» футболчилари 2015 йили Евровидение танловига пародия шаклида суратга олинган ғалати роликда суратга тушишди. Шу тариқа польшалик дарвозабон Войчех Шесни, испаниялик ярим ҳимоячи Санти Касорла ва чехиялик Томаш Росицки норасмий танлов иштирокчисига айланишди.

МАЙДОНДАН САҲНАГА

Ирландиялик Никки Бирн 2016 йилги Евровидениеда хониш қилди, аммо финал раундига ўтолмади. Эътиборлиси, у ўзини мусиқа оламига уришдан аввал футболчилик фаолиятини бошлашга уринган. Аниқроғи, Никки 1995 йили «Лидс Юнайтед»нинг ёшлар жамоаси сафига қўшилган ва ҳаттоки, маълум ютуқларга эришган. Дейлик, ёшлар ўртасидаги Англия кубоги турнирида ғалаба нашидасини сурган.

Бироқ Бирн кейинчалик катта футболда ўз ўрнини тополмагач, «Лидс» ундан воз кечди. Никки шунда ҳам уринишни давом эттирди, яъни Ирландияга қайтиб, яна 2 йилча футбол ичида қолди. Аммо бу ҳаракатидан самара чиқавермагач, бутсадан воз кечиб, қўлига микрофон олди.

«ЛОКО» МУХЛИСИ

2011 йили Евровидениеда Россия шарафини «Локомотив»нинг ашаддий фанатларидан бири Алексей Воробьев ҳимоя қилди. У «темирйўлчилар» иштирокидаги ўйинлардан олдин тез-тез қўшиқ куйлаши билан машҳур.

Алексей шунингдек, «Локо»нинг собиқ футболчилари - Руслан Нигматуллин ва Дмитрий Буликинни ўз клипларидан бирида роль ижро этишга таклиф қилган. Евровидениедаги натижасига келсак, Воробьев финал босқичига чиққан, аммо атиги 10-ўрин билан кифояланганди.

А.АБДУВАЛИХЎЖАЕВ тайёрлади