Мадриднинг «Реал» клуби ярим ҳимоячиси Дани Себальос Radio Marca вакилларига берган интервьюсида «Қироллик клуби»даги ҳаёти ҳақида гапириб берди.

Суҳбат чоғида жамоанинг собиқ устози Зайниддин Зиданнинг муносабатларидан мамнун бўлмаганини айтиб ўтди.

ЗИДАН ҲАҚИДА

- Мавсум давомида Зиданга бўлган муносабатим ўзгариб борди. Шундай вазият бўлдики, Кроос ҳам, Модрич ҳам жароҳат олди. Лекин Зидан ўйин услубини ўзгартириб, менинг ўрнимга бошқа футболчиларни ўйнатаверди.

Бу ҳолат қалбга бироз оғир ботади. Биз «Барса»дан 15 очко ортда қолгандик ва Чемпионлар Лигасини интизорлик билан кутардик. Аммо мен ўша механизмнинг ҳам бир қисми эмасдим.

ХУЛЕН ЛОПЕТЕГИ ҲАҚИДА

- У ўз услубини сингдиришга ҳаракат қилмоқда. Хулен танлаган йўналиш ўтган йили фойдаланганимиздан кескин фарқ қилади. Унга тўпни яхши назорат қиладиган жиддий жамоа керак. Лопетегига тўп билан кўпроқ муомалада бўлиш ва ҳужумкорлик ёқади.

ЎЗГАРИШЛАР ҲАҚИДА

- Ўтган мавсум мен учун ёмон ўтди. Бироқ юзага келган вазиятдан ўзимга хулоса чиқариб, футболчи сифатида ўсдим. Мақсадим - «Реал» билан совринлар ютиш.

«БЕТИС»ДАГИ ФАОЛИЯТИ ҲАҚИДА

- Қачондир «Бетис»ни нима учун тарк этганимни билиб оласиз. Шунда ёмон йигит эмаслигимга гувоҳ бўласиз. Ушбу жамоанинг ҳамма ўйинларини томоша қиламан, голларини ўша жамоа вакилидек нишонлайман.

Худди шундай ҳолат Серхио Рамос «Севилья»ни тарк этганида ҳам юз берган. У ҳамон андалусияликларнинг иши қандай кетаётгани билан қизиқади, клуб учун қайғуради. Биринчи жамоангиз қон-қонингизга сингиб кетади.

РОНАЛДУНИНГ КЕТИШИ ҲАҚИДА

- Биз ҳамиша аҳил оила бўлганмиз. Унинг «Реал» билан қандай муаммоси бўлганини билмайман. Лекин Роналду иккимизнинг муносабатларимиз яхши эди. Бошқа футболчилар билан ҳам худди шундай.

«Реал»да ҳамиша етук футболчилар тўп суришган. Криштиану жамоадан кетди, шунга қарамай, жамоа ўз йўлида давом этмоқда. Бензема, Асенсио ва Бэйл кабилар «арава»ни тортишмоқда.

Ҳар мавсум 40тадан кўп гол урадиган Криштиану клубни тарк этди. Аммо бошқа футболчиларимиз унинг йўқлигини билдиришмайди.

Ҳ.АТАВУЛЛАЕВ тайёрлади