«Бир ёқадан бош чиқармаслик» Словакия ва Дания терма жамоалари ўртасидаги учрашувда кўриниб қолди. Soccer.ru Дания терма жамоаси билан юз берган можаро ҳақида сўз юритади.

Дания терма жамоаси ЖЧ-2018да 1|8 финалга қадар етиб борди ва бўлажак финалчи - Хорватияга имкониятни бой берди. Гуруҳда эса мусобақа ғолиби Франция билан дуранг ўйнади. Бир сўз билан айтганда, Дания футболида ўсиш кўзга ташланди. Аммо гап пулга бориб тақалганда, ҳаммаси можаро билан тугайди.

Аввалига мазкур жараёнга ҳеч ким жиддий эътибор қаратмади. 1 август куни Дания футболчилар ассоциацияси ва ушбу мамлакат футбол федерацияси ўртасидаги келишув ниҳоясига етди. Одатда, бундай шартномаларни тузиш ёки узайтириш шунчаки амалга оширилади. Ҳаттоки, шундай битимлар бўлиши ҳақида кўпчилик эшитмаган бўлса ҳам керак.

Жамоанинг ЖЧ-2018даги муваффақиятли иштирокидан кейин очкўзлиги тутиб қолган федерация кўпроқ ишлаб олишни истади ва олдинги келишувга ўзгартириш киритди. Футболчиларга янги шартнома таклиф қилинди. Унда шундай банд бор эди: федерация ўйинчилар билан имиж ҳуқуқлари борасида жамоавий эмас, балки индивидуал шартнома тузади.

Мисол учун, реклама келишувларида фақат машҳурроқ Эриксен ёки Шмейхелдан фойдаланиш кўзда тутилади. Албатта, бу қарор футболчилар ассоциациясига маъқул келмади. Биринчидан, ташкилот аъзоларидан бирининг алоҳида бўлиб қолишини истамади. Иккинчидан, бундай келишувлар можарога сабаб бўлиши мумкин эди.

Айтайлик, Эриксен клуби томонидан бир брендни реклама қилади. Терма жамоа эса унинг номидан бошқасини реклама қилиши мумкин. Албатта, бу реклама берувчиларга ҳам маъқул келмайди. Бу сабабларнинг бири, холос.

Федерациядагиларнинг фикрича, футболчилар уларнинг таклифларига рози бўлишарди. Футболчилар эса ўйинлар уларсиз ўтмаслигини тушунишарди. Икки томон ҳам «рақиб»нинг биринчи қадам босишини кутишди.

Орада фақатгина Кристиан Эриксен ассоциация томонидан сўз юритди. У олдинги шартномани бир ойга узайтириш лозимлигини айтди. Шунда терма жамоа Словакия билан ўртоқлик ўйинию, Миллатлар Лигасидан ўрин олган Уэльсга қарши ўртоқлик учрашувларини ўтказиб оларди.

Федерациядагилар эса ўз фикрларидан қайтишмади. Раҳбарлар футболчилар охирида шартларига кўнишларига ишонишди. Бироқ Словакия билан бўладиган ўйинга икки кун қолганда, федерациядагилар футболчиларнинг аҳди қатъий эканини тушуниб етишди.

Натижада хавотир юзага келди. Аммо мағрур хавотир. Федерация ҳам бўш келмади ва ассоциация аъзоларини терма жамоага жалб қилмайдиган бўлди. Албатта, Дания термасига Суперлига ёки терма жамоадан умуман таклиф олмаган футболчилар чақирилса ҳам бўларди. Бироқ кейинчалик бу ҳолат футболчилар ассоциацияси ичида можаро келтириб чиқариши ҳеч гап эмасди.

Хуллас, терма жамоага топ футболчилар билан умуман тўқнаш келмайдиган - иккинчи, учинчи ва тўртинчи дивизион вакиллари жалб қилинди. Шунингдек, мини-футболда тажриба тўплаган ўйин-чилар ҳам чақирилди. Айтганча, футзалчилар анча машҳур ҳисобланишади.

Масалан, дарвозабон Кристофер Хааг футзал бўйича Европа чемпионатида тўп сурган. Демак, Дания терма жамоасининг асосий таркибида мини-футболчи дарвозабон, уч нафар тўртинчи дивизион вакили ва етти нафар учинчи дивизион вакили тўп сурди.

Улар футболдан бўш вақтларида бошқа иш билан шуғулланишади. Ҳар ҳолда, Даниянинг тўртинчи дивизионида ўйнаб, оила тебратиб бўлмайди. Словакияга қарши ўйинда сотувчи (икки нафар), қайиқ станцияси инженери, талаба (икки нафар), қамоқхона қўриқчиси, қурувчи, менежер, блогер (икки нафар) тўп суришди.

Трнавада бўлиб ўтган учрашув чипталарини арзонлаштиришга тўғри келди. Гарчи Дания ярим профессионал таркиб билан ташриф буюрган бўлсада, ўйинни кўриш учун стадионга 5 минг атрофида мухлис ташриф буюрди.

Словакларни жаҳлини чиқарган яна бир жиҳат, ана шундай кучсиз жамоани бор-йўғи 3:0 ҳисобида мағлуб этишгани бўлди. «Қўл учида» терилган терма жамоа Гамшик, Губочан, Куцка, Немец, Вайсс, Шкртел, Мак каби футболчиларга муносиб қаршилик кўрсатишди.

Хуллас, Словакия УЕФАга арз қилди. Лекин ташкилот ҳам ҳайрон. Умуман олиб қараганда, данияликлар ҳеч қандай қоидани бузишмади. Дания терма жамоаси бош мураббийи Оге Харейде ва унинг ёрдамчиси Йон Даль-Томассонлар ҳам нав-батдаги учрашувларда ишлашни хоҳлашмади.

Федерациядагилар норвегиялик мураббий таркибни ўзи йиғмагани учун ишламаслигини айтишди. Шу боис ҳам терма жамоани Йон Йенсен вақтинчалик қабул қилиб олди. 53 ёшли мутахассис Дания футболи афсоналаридан бири деса ҳам бўлади. У Евро-1992 ғолиби, мамлакатнинг саккиз карра чемпиони, «Арсенал»нинг собиқ ўйинчиси.

Йенсен мураббий сифатида ўртамиёна «Херфольге»ни Дания чемпиони қилган ва 2000 йилда мамлакатнинг энг яхши мураббийи, деб тан олинган. Шунингдек, жонажон «Бреннбю» жамоаси билан яна бир марта чемпион бўлган.

Кейинчалик Йенсен Микаэл Лаудрупга «Хетафе»да ёрдам берган ва «Блэкберн»да иккинчи мураббий сифатида ишлаган. Айни пайт Дания иккинчи дивизиони вакили - «Фремад Амагер» жамоасини бошқармоқда.

P.S.: Томонлар барибир, келишиб олишган чоғи, 9 сентябрь куни ўтказилган Уэльсга қарши баҳсда Дания терма жамоасининг асосий таркиби майдонга тушиб, Райан Гиггз бошчилигидаги рақибларини 2:0 ҳисобида мағлубиятга учратишди.

Мазкур ўйинда Кристиан Эриксен «дубль» қайд этди. Эҳтимол, бу ғалаба мавжуд можаронинг якунланганидан даракдир?!

Ж.БОБОХОНОВ тайёрлади