«Ювентус» бош директори сифатида футбол оламида ном қозонган Жузеппе Маротта ўз лавозимини тарк этиши сабабларига тўхталиб ўтди. Унинг айтишича, клуб президенти Андреа Аньелли билан ўртасидаги муносабатлари совуқлашиши сабаб истеъфо беришга қарор қилган. Бу ҳақда Corriere della Sera нашри хабар тарқатди. «Клуб президенти Андреа Аньелли билан ишдаги алоқаларимиз йўқолиб қолди. Бу кишининг ҳафсаласини пир қилади. Қарор қабул қилиб бўлинди ва мен ортиқ «Ювентус» директорлар кенгаши аъзоси эмаслигимни айтдим. Бу қарор айнан «Ювентус»нинг ўз ташаббуси, FIATники эмас», - деди Маротта.
Эслатиб ўтамиз, 2010 йилдан буён «Юве» бош директори вазифасида ишлаб келган 61 ёшли функционер «Наполи»га қарши учрашувдан сўнг ўз лавозимини тарк этишини эълон қилганди. «Ваколатим муддати 25 октябрь куни тугайди ва узайтирилмайди. Мен Италия футбол федерацияси президентлигига номзодлигим ҳақидаги хабарларни буткул рад этаман. Бу мени қизиқтирмайди. Кетишим тафсилотларини кейинроқ маълум қиламан», - деганди Маротта.

Маълумот ўрнида, 2010 йили клуб президенти этиб сайланган Андреа Аньелли бош директор лавозимига Жузеппе Мароттани олиб келганди. Орадан бир йил ўтиб, Маротта «Ювентус»га Антонио Конте бош мураббий этиб тайинланишига эришган, 2012 йилда эса «Юве» 6 йил ичида биринчи марта Италия чемпиони бўлишни уддалаганди. Умуман олганда, Мароттанинг 8 йиллик бошқаруви даврида «кекса синьора» 7 марта Италия чемпионлигини нишонлади. Тажрибали мутахассис 25 сентябрь куни Европада йилнинг энг яхши футбол менежери деб эътироф этилганди.

P.S. «Реал»нинг собиқ бош мураббийи Зайниддин Зидан «Ювентус»да раҳбарлик лавозимига тайинланиши мумкин.Tuttosport нашрининг хабар беришича, «Юве» раҳбарияти 46 ёшли мутахассисни клуб бош директори лавозимига та­йинлаш ҳақида бош қотирмоқда