Афсонавий енгил атлетикачи Усэйн Болт профессионал футболда гол ура бошлади. Австралиянинг «Сентрал Кост Маринерс» клуби сафида тўп сураётган собиқ спринтер «Макартур Юнайтед»га қарши кечган ўртоқлик ўйинининг иккинчи бўлимида рақиб дарвозасини 2 марта ишғол қилди. У аввалига тезкорлиги эвазига ҳимоячилардан ўзиб кетиб, дарвозабонни ҳам алдаб ўтди ва тўрни силкитди. Яна 10 дақиқадан кейин эса, «Макартур Юнайтед» ҳимоячиси ва голкипери хатосидан унумли фойдаланиб, тўпни бўш қолган дарвозага йўллади. Айтиш жоиз, булар Болт учун футбол фаолиятидаги илк голлардир. Ямайкалик юлдуз бунга қадар август ойида «Маринерс»нинг «Сентрал Кост Селект» билан ўйинида ҳам майдонга тушганди. Ўшанда жамоаси 6:1 ҳисобида ғалаба қозонган бўлсада, янги ҳужумчи майдонни голсиз тарк этганди. Умуман, Австралия жамоасидаги уриниш унинг учун профессионал футболга қадам ташлаш масаласида биринчи ҳаракат эмас...
***Болт июнь ойида «Стремсгодсет» жамоаси ўртоқлик ўйинида иштирок этиб, профессионал миқёсда дебют қилди. У Норвегия ўсмирлар терма жамоасига қарши кечган ўша баҳснинг 71-дақиқасида захирадан майдонга тушиб, дарвоза томон бир бора хавфли зарба йўллагани билан эсда қолганди.
***Болт март ойида Дортмунд «Боруссия»си машғулотларида қатнашди. Ямайкалик бундан олдин футбол бобидаги иқтидори билан Лионель Месси ва Криштиану Роналдудан сира қолишмаслигини айтганди. Тўғри, Усейн Дортмунд клуби футболчилари даврасида атиги бир марта шуғулланди ва ўз ҳаракатларини 10 баллик тизимда 7 баҳога лойиқ кўрди, ҳаттоки, ижтимоий тармоқларга видеолавҳалар ҳам қўйди. «Боруссия»нинг собиқ мураббийи Петер Штегер ҳам унга чакки баҳо бермади: «Менимча, Усейнда иқтидор бор, лекин юқори савияда ўйнашни истаса, ҳали кўп ишлаши керак, шубҳасиз. Ҳар ҳолда, футболда мутлақо бошқача жисмоний ҳолатда бўлиш талаб этилади». Ўша вақт Дортмундда ижара шартномаси асосида тўп сурган Миши Батшуайи ҳазил оҳангида Болт билан рақобатлашишдан чўчиётганини айтганди.
***Афсонавий спринтер 2017 йили бир неча хайрия учрашувларида қатнашди. Мисол учун, Unicef томонидан ташкиллаштирилган акцияда Райян Гиггз, Диего Форлан ва Эдвин ван дер Сар билан бирга иштирок этганди.
***Болт ва «МЮ» ўртасидаги муносабатлар - алоҳида мавзу. У 2009 йили Роналдуни югуриш усули туфайли танқид остига олиб, футболчига енгил атлетика бўйича мураббийлик қилишга тайёрлигини билдирди. 2012 йили эса, «Юнайтед» раҳбарияти «Фулхэм»га қарши ўйиндан олдин ямайкаликни жаҳон рекорди билан табриклаб, унга «9,63» (Болт 100 метр масофани 9,63 сонияда босиб ўтганди) рақами туширилган клуб футболкасини тортиқ этди. 2016 йилга келиб, Англия ОАВда «Юнайтед» Болтни машғулотларга таклиф этиши хусусида кўп ва хўп ёзилди. Daily Mail журналистлари ҳаттоки, бир неча кун «МЮ» машғулотлар базаси атрофида навбатчилик қилиб, Усейнни кутишди. Атлетикачи эса кутилмаганда, Франциянинг ҳаваскорлар жамоаси - «Сен-Жан Болье» машғулотларига қўшилиб, ўзаро назорат учрашувида иштирок этди, аммо мунтазам чемпионатда ўйнашдан бош тортди.
Маълумот учун: «Сентрал Кост Меринерс» - Госфорд шаҳри шарафини ҳимоя қиладиган ва Австралия чемпионати олий дивизионида иштирок этадиган клуб. 2004 йили тузилган «Меринерс» қисқа даврда маълум ютуқларга ҳам эришди. Хусусан, 2013 йили лига ғолибига айланди.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20