Флорентино Перес биздан юз чандон ақлли одам. Шунинг учун ҳам унинг миллионлаб пули бор, биз эса телеграм каналчамизга маҳлиё бўлиб ўтирамиз.

Аммо аввал ҳам айтган фикримни яна қайтаришни истардим. Унинг ўрнида Роналдуни "Реал"дан бир йил аввалроқ кетказиб юбориб, Азарга ўхшаш кимнидир аврашга ҳаракат қилардим. Роналду кетса, Хамес, Иско, Бэйл, Мората, Алонсо кабилар билан жамоа шакллантирса бўларди. Барибир ўтган мавсум Реал Ла лигада қийналди, эвазига бу йил анча ўзига келиб олган бўларди. Ҳозир эса Реалда ўша Мората ҳам, Хамес ҳам йўқ.

Ҳозирги "Реал" эса олов гупиллаб ёнган ва кейин ўчирилган тандирга ўхшайди. Анави бечора ва содда Лопатеги эса шу тандир ичида куйиб қолмаслик учун патиллаб юрган хўрозни эслатиб юборяпти. Испания термасини ташлаб келаётганида Мадридда ўзини қандай тасаввур қилган билмадим-у, аммо у ЗИДАН бўшатган ва кетма-кет учта Чемпионлар Лигаси соврини тахланиб турган жойга келаётганди.

Перес эса ростдан ҳам ақлли. Ўтган сафар ёндириб юбориш учун Бенитесни топганди, энди Лопатегини. Уни шундай эълон қилдики, Испания учун тўлаши керак бўлган компенсация ҳам бир четда қолиб кетди, Лопатеги эса ўзини анча машҳур қилиши мумкин бўлган Жаҳон чемпионатидан четда қолиб кетди.