Аёллар жамоалари ўртасидаги Ўзбекистон чемпионати ўз якунига етди. Бу йилги мавсум аввалгиларидан ўзига хос жиҳатлари билан ажралиб турди. Биринчи галда Суперлигада иштирок этаётган клублар учун аёллар жамоаларининг бўлиши мажбурий қилиб қўйилганди. Кейин шу пайтгача «Севинч» жамоасининг яккаҳокимлигига ўрганиб қолгандик. Бу сафар тарих янгиланди. «Бунёдкор-Women» қаршилик футболчиларни ортда қолдириб, ўз тарихида илк бор мамлакат чемпионига айланди. Элвира Гуламова шогирдлари турнирни 75 очко билан якунлашди. «Қалдирғочлар» сўнгги турни ўз майдонларида Ғузорнинг «Шўртан-Lady» клубига қарши ўтказиб, йирик 5:0 ҳисобида ғалаба қозонишди. Маҳлиё Сарикова «дубл»га эришган бўлса, Людмила Карачик, Дилноза Бектемирова ва Насиба Турсунова қолган голларга муаллифлик қилишди. Эътиборлиси, «Бунёдкор-Women» жамоаси дарвозабони Ольга Қаҳҳорова 11 карра Ўзбекистон чемпионига айланди. У «Севинч» клуби таркибида 10 марта мамлакат чемпионати олтин медалларига эга чиққанди. Бу мутлақ рекорд ҳисобланади. Чемпиондан икки очко кам жамғарган «Севинч» кумуш медаллар билан кифояланди. Сўнгги турда айнан вице-чемпионларга ютқазган (0:4) «Металлург» бронза медалига сазовор бўлди. «Бунёдкор-W» - «Шўртан» учрашуви якунлангач, ЎзПФЛ бош директори Омон Ғофуров мамлакатимизнинг янги чемпионига кубок топширди. Шунингдек, «Бунёдкор» чемпион сифатида ПФЛ томонидан 300 миллион сўмга ҳам эга бўлди. Биз учрашувдан сўнг чемпион жамоа сардори Луиза Садировадан интервью олдик.

- Луиза, «Бунёдкор» илк бор чемпионликка эришди. Бу билан «Севинч»нинг гегемонлигига чек қў-йилди. Нима деб ўйлайсиз, Қарши жамоаси бу йил бироз кучсизландими ёки «Бунёдкор» аксинча, кучайдими?

- Менимча, иккинчи вариант ҳақиқатга яқинроқ. «Севинч» ҳалиям жуда кучли. Сўнгги турда кўрдингиз, қаршилик футболчилар учинчи ўринда бораётган «Металлург» клуби майдонида тўп суришларига қарамай, йирик ҳисобда ғалаба қозонишди. «Севинч» ҳам, «Бунёдкор» ҳам чемпионат давомида биттадан мағлубият аламини тотиб кўришди. Фақат асосий рақибимизга битта дуранг ортиқчалик қилди. Акс ҳолда, улар чемпион бўлишарди. Бир нарсани ишонч билан айтишим мумкинки, бу йил жамоамиз сезиларли даражада кучайди. Футболчиларнинг бир-бирини тушуниб ҳаракат қилиши, жамоавий ўйинда ҳам ўзгариш катта. Бу ўз навбатида, клуб раҳбарияти томонидан жамоамизга берилган эътиборнинг маҳсули деб биламан.

- Аслида чемпионлик масаласини ҳал қилиб берган ўйин бундан аввалги турда бўлиб ўтганди. Ўшанда «Севинч» жамоасини кичик ҳисобда (1:0) мағлуб этгандинглар. Ягона голни айнан сиз пенальтидан ургандингиз. Ҳар доим ҳам 11 метрли нуқтага яқинлашаверасизми?

- Ҳа, бунга тайёрман. Лекин бу сафаргиси аввалгиларидан фарқ қиларди. Юзага келган имкониятдан фойдалана олмасак, ўйинда бошқа гол бўлмаслиги ҳам мумкин эди. Шу сабабли ҳам ушбу 11 метрли жарима зарбасининг масъулияти катта бўлди. Шукрки, жамоадошларимни уялтириб қўймадим.

- Чемпионатимизда рақобат ошганми?

- Нисбатан олганда, ҳа. Лекин чемпионлик учун иккита жамоанинг курашаётгани бироз кўнгилни хира қилмоқда. Олдин «Андижанка» жамоаси «Севинч»га жиддий қаршилик кўрсатарди. Бугунга келиб андижонлик футболчилар аввалги даражаларида ўйнай олишмаяпти. Клубда авлодлар алмашинуви рўй берган, ўзига яраша ўзгаришлар бор. «Бунёдкор»нинг чемпионлик пойгасига қўшилиши эса чемпионатимизга қизиқишни бироз бўлса-да сақлаб турди. Яъни, интрига охирги тургача сақланиб қолди. Агар биз «Шўртан» билан ўйинда очко йўқотганимизда, «Севинч» чемпионликни қўлга киритарди.

- Чемпионат формати маъқул кел-яптими?

- Классик форматдаги чемпионат. Уй-сафар тизимида ўйинларни ўтказдик. Ҳаммада бир хил имконият бўлди. Менимча, бу яхши.

- Келаси йилдан нималар кутяпсиз?

- Ҳозирдан бир нарса дейиш қийин. Яқинда матбуотда келаси йилдан Суперлига жамоалари қошида аёллар ва футзал клубларининг фаолияти мажбурий бўлмаслиги ҳақида хабар ўқидим. Агар чиндан ҳам шундай бўлса, бу чемпионат савиясига салбий таъсир қилиши мумкин. Келаси мавсум олий лигада нечта жамоа иштирок этиши ҳозирча маълум эмас. Шуниси аниқки, биз учун анча қийин бўлади. Чемпионлик унвонини ҳимоя қилишимиз керак. Қолган жамоалар, айниқса, «Севинч» биз билан бўладиган ўйинларга алоҳида тайёргарлик билан тушади. Ҳар қандай ҳолатда ҳам чемпионат қизиқарли ўтса керак.

- «Бунёдкор»да ички рақобат кучлими?

- Албатта. Чемпионликка эришишимизда айнан жамоадаги кучли рақобат муҳим роль ўйнади. Кимдир жароҳат олса ёки сариқ карточклари сони бўйича учрашувни ўтказиб юборишига тўғри келса, захирадаги футболчилар ҳам ўйинни кучайтира олишади.

- Футболга қизиқиш сизда қандай пайдо бўлган?

- Мактабда ўқиб юрган кезларим стадионда тўп тепаётган болаларни кўриб, миллионлар ўйинига бўлган қизиқишим ортган. Шундан кейин футбол билан профессионал тарзда шуғулланишни ўз олдимга мақсад қилиб қўйганман. Спортнинг ушбу турини касб сифатида танлаганимдан ҳеч ҳам афсусланмайман. Яшил майдондаги фаолиятим якунланганидан сўнг мураббийлик қилсам керак. Ўзимни бошқа соҳада тасаввур қилолмайман. Юртимизда аёллар футболининг янада ривожланишига ҳисса қўшишни истайман.