«Манчестер Сити»нинг спорт бобидаги ишлари жойида. Дейлик, Хосеп Гвардиола шогирдлари «Манчестер дербиси»да «Юнайтед»ни ишончли тарзда енгишди - 3:1. Айни шу ўйин олдидан «шаҳарликлар»га Football Leaks томонидан жиддий айбловлар сурилди ва ФИФА алоҳида текширув ишларини бошлади. Аниқроқ айтсак, Даниянинг Politiken газетасида чоп этилган мақолада таъкидланишича, «Манчестер Сити» шу мамлакатнинг «Норшелланд» клуби билан қонунга зид шартнома тузган ва африкалик футболчиларни текинга олиш имкониятини ҳосил қилган...

«Учинчи томон» роли

Асосий айбловда гап «қора қитъа»да очилган «Умид ҳуқуқи» академияси тарбияланувчилари ҳақида кетмоқда. Оддий айтганда, Англия клуби ўз мақсади йўлида «учинчи томон» сифатида ҳаракатланган. Яъни 2016-2020 йилларга мўлжалланган келишувга биноан, «Сити» Африка академиясида таҳсил олган футболчиларни «Норшелланд» воситасида сотиб олишни режалаштирган. Бунда Дания жамоасидан трансферлар учун яхши шароит яратиб бериши ва жараённи тезлатиши талаб этилган. ФИФА қоидаларига кўра эса, футболчига «учинчи томон» мақомида эгалик қилиш қонунга зид ҳисобланади.

Хуллас, Англия клубининг данияликлар билан келишуви футболчилар ҳуқуқини «учинчи томон» мақомида назорат қилишга уриниш сифатида баҳоланиши мумкин. ФИФА бундай йўл тутишни 2015 йили тақиқлаб қўйганини алоҳида таъкидлаш ўринли. Тўғри, «Норшелланд» президенти Том Вернон айбловни қатъий оҳангда инкор этиб, клуб футболчиларни қаергадир кўчиб ўтишга мажбурламаслигини таъкидлади. ФИФА вакилларининг маълум қилишларича, айни пайт бу иш атрофлича ўрганилмоқда.

Икки ҳиссадан кўпроҚ маош

«Манчестер Сити» шунингдек, собиқ бош мураббий Роберто Манчинига берилган маош суммасини икки ҳиссадан кўпроқ камайтириб кўрсатган эмиш. Германиянинг Spiegel нашрида Football Leaks маълумотлари асосида ёзилишича, «шаҳарликлар» «Зенит»нинг собиқ устозига Англиядаги иши даврида бошқа клуб воситасида шартномада белгиланганидан икки ҳисса кўп ҳақ тўлашган. Италиялик мутахассис 2009 йили 2 йиллик битимга имзо чеккан ва унга мувофиқ, бир мавсум учун оладиган маоши 1,45 млн. фунт стерлингга тенг эди. Лекин «Сити» амалда Манчинига 3,2 млн. фунт тўлаган. Хуллас, Роберто шундан 1,75 миллионини «Манчестер Сити» соҳибига тегишли Қатарнинг «Ал-Жазира» клубидан олган. Тўлов ҳужжатларида қайд этилишича, қатарликлар шунча суммани Манчинининг маслаҳатчи ролидаги хизматлари учун беришган экан. «Ал-Жазира» шунинг баробарида тўловни Маврикияда рўйхатдан ўтказилган Sparkleglow Holdings оффшор компанияси орқали амалга оширган.

«Сити» футболчиларни ҳам каттагина бонус билан ўз томонига оғдирган:

- Лерой Сане «Бавария» эмас, «Сити»ни танлаши учун унга 3 йил давомида 24,5 млн. фунт миқдорида маош беришни кафолатлашган.

- Илкай Гюндоган ҳамда Серхио Агуэро бир мавсумда фақат маош ҳисобидан тегишлича 9,6 млн. ва 15,7 млн. фунт олишган.

- Раҳим Стерлинг — АПЛнинг энг кўп маош олувчи футболчиси. У янги шартномага кўра, ҳафтасига 300 минг фунт миқдорида иш ҳақи олади.

«Фэйр-плей»дан Қочиш

Айбловларга биноан айтсак, клуб шайх Мансурнинг кенг алоқаларидан Манчинига ҳақ тўлашда молиявий фирибгарлик қилиш билан чекланган эмас. Хусусан, «ҳомийлик» тўловларининг катта қисми ҳам «Сити» хўжайинига тегишли шахсий компаниялардан тушган. Мисол учун, Англия клуби 2013 йили Aabar сармоя гуруҳи билан 15 млн. фунтни ўз ичига олган шартномани расмийлаштирган. Бироқ Aabar якунда жамоа ҳисоб рақамига атиги 3 млн. фунт ўтказиб берган. Қолган 12 «лимон» шайх Мансурга тегишли компания томонидан тўланган. Айнан ўша мавсум Etihad компанияси «Сити»га 8 млн. фунт тўлаган. Ваҳоланки, клуб ҳисоботида 35 «лимон» олингани кўрсатилган. Қисқаси, келишувда қайд этилган 35 «лимон»дан 27тасини Abu Dhabi United Group ўз зиммасига олган. Буниси ҳам жамоа соҳибининг яна бир фирмаси. Орадан 2 йил ўтгач, худди шу ҳолат такрорланган, фақат сумма йириклашган: Etihad ҳужжатларда кўрсатилган 67,5 млн. фунт ўрнига яна 8 «лимон» тўлаган, маблағнинг қолган қисми (59,5 млн. фунт) ADUG гуруҳидан тушган.

«Сити» футболчиларнинг маркетинг ҳуқуқини эса Fordham Sports Management шўъба компаниясига сотган. Ваҳоланки, клуб ўйинчилар образидан шахсий мақсадда фойдаланса, бунинг учун алоҳида гонорар бериши шарт. Хуллас, «шаҳарликлар» ушбу «операция» ёрдамида маркетинг харажатларини анча камайтириб, 30 млн. евро миқдорида қўшимча фойда кўришган. Умуман олганда, шайх Мансур клуб бошқарувидаги дастлабки 4 йил давомида 1 млрд. фунтдан кўпроқ сарфлаган. Реал зарар миқдори эса 233 млн. еврога етганки, бу рухсат берилган меъёр (45 млн. евро)дан нақ 5 баробар кўп. Клуб шу орада «Узун камон» лойиҳасини қабул қилганди. У жамоани операцион харажатлардан қисман ёки тўлиқ озод қилиш ва шўъба корхоналар очиш ғоясини қамраб олганди. Энг қизиғи, ФИФА раҳбари Жанни Инфантино бу каби қинғир ҳаракатлардан хабардор бўлган экан. Таъкидланишича, клубга молиявий «Фэйр-плей» қоидаларини четлаб ўтишда айнан у кўмаклашган. Айтиш жоиз, ушбу жараён «Сити»га нақ 1,8 млрд. еврога тушган. Яна бир томони, Англия клубига нисбатан тегишли жазо чораси белгиланмаган. Аксинча, УЕФА кенгаши барчасини «Сити» эгаларига қўйиб берган. Қисқаси, маъқул чорани танлаш айнан жамоа вакилларига ҳавола этилган. Тўғри, УЕФА якунда, 2014 йилнинг баҳорида «Сити»ни 20 млн. евро миқдоридаги жарима билан «сийлади», қолаверса, харажат миқдорини чеклаб қўйди. Унга кўра, «шаҳарликлар» битта трансферлар бозори давомида футболчилар харидига 49 млн. фунтдан кўп ажратмасликлари керак эди. Лекин мавсум- 2015|2016 якунида ушбу чеклов бекор қилинган. «Бош мақсадим — клубларни бузиш эмас, аксинча, уларга ёрдам бериш, — дея изоҳлади Жанни Инфантино «Сити»га хайрихоҳ бўлгани ҳақидаги хабарларни. — Тан оламан, «ПСЖ», «Манчестер Сити» ва бошқа клублар вакиллари билан кўп учрашганман, уларнинг раҳбарларига тегишли кўрсатмалар бериб турганман. Бундан фақат ва фақат муайян масалаларда ягона мувофиқ йўлни танлашни кўзлаганман. Лекин тушунинглар, якуний қарорни мен қабул қилмайман, бу ҳайъат қўмитаси зиммасидаги ишдир. Хуллас, умумий вазиятга таъсир ўтказиш имкониятига эга эмасдим». Наҳотки, бу Инфантинонинг «ПСЖ» ва «Манчестер Сити» клубларининг молиявий қонунбузарликларига бепарво қараганини англатса? Дарвоқе, «Фэйр-плей» қои-далари тафтиш қўмитаси раҳбари Брайан Куинн яқинда истеъфога чиқди. «ПСЖ» ва «Манчестер Сити»га нисбатан айбловлар бўйича айнан у шуғулланаётганди. Куиннинг айтишича, УЕФА санкциялари ўта енгил экан...

Муносабат Қандай?

«Манчестер Сити» баёноти: ­- Бу масалада ҳеч қандай изоҳ бермоқчи эмасмиз. Тушунарлики, жамоамизга тегишли ҳужжатлар ўғирлик йўли ёки воситачилар аралашуви билан қўлга киритилган. Ҳаммаси ойдек равшан - бу «Манчестер Сити» обрўсига путур етказиш ҳаракатидир...

Хосеп Гвардиола: - Агар қонунбузарлик аниқланса, бизни жазолашади. УЕФА, ФИФА, Англия футбол ассоциация бу борада ўз нуқтаи назарини билдириши керак. Бордию, клуб ноҳақ бўлиб чиқса, барчасини қабул қиламиз. Лекин айни ҳолатда шахсан мен клуб позициясини тўла қўллаб-қувватлайман ва раҳбарларга ишонаман.

Жозе Моуриньо: - «Манчестер Сити» ва молиявий «Фэйр-плей» қоидалари борасида маълум фикрга эгаман, лекин уларни тилга чиқармаганим маъқул...