Ҳозир аксарият футбол мухлисларини «Реал»нинг Ла-лига, «МЮ»нинг АПЛ, «Бавария»нинг Бундеслига турнир жадвалида эгаллаб турган ўрни ажаблантирмоқда. «МЮ» ва «Бавария»га нисбатан балки бу ажабланиш тўғридир. Чунки ҳар икки жамоа ЕЧЛда ғолиб чиқмаганига анча бўлди. Айниқса, Жозе Моуриньо жамоаси бу борада мухлисларидан қарздор. Шу маънода очко сув ва ҳаводек зарур бўлган «МЮ»нинг аутсайдерсифат «Кристал Пэлас» билан ўз майдонида нурсиз дурангга розилиги, албатта, мухлисларга ёқмайди. Лекин «Реал» масаласида мухлислар ажабланишмаса ҳам бўлаверади. Обидхонга айтар сўзимиз ҳам шу: хафа бўлишга ҳожат йўқ.
Айримлар ўйлаганидек, «Эйбар»нинг ғалабаси тотализаторга ҳам боғлиқ эмас. Дадил ва улкан уч қадамдан сўнг «Реал» шунчаки, нафас ростламоқда. Зидан ва Роналду кетмаганда ҳам, бизнингча, жамоада шундай тин олиш кузатиларди. Эътибор бердингизми, биз «депсиниш» сўзини ишлатмадик. Негаки, «Реал» депсинмаяпти, балки ўзи истамаган ҳолда «дам олиш» жараёнини бошдан кечирмоқда. Табиийки, бу ҳолат ғалабаларга кўниккан футболчиларнинг ўзларига ҳам ғалати туюлмоқда. Ҳамма гап жамоада кузатилаётган «тўхташ» жараёнини эътироф этиш ва маълум муддатдан кейин уни енгиб ўтишда. Кетма-кет уч йил пухта айланган шукуҳлар учун мухлислар пича сабр қилишса, арзийди. Оққан дарё яна оқади. «Реал» шундай улкан дарёки, унинг узоқ вақт тўхтаб қолиши ақлга сиғмайди. Фақат тушунмоқ керакки, ҳар қандай вазиятда жамоа шу жараённи бошидан ўтказади. Ҳар қанча профессионал ҳисобланишмасин, «Реал» таркибидаги катта истеъдодлар аввало, инсонлар. Ва улар ҳам бошқа инсонлар каби иштиёқ энергиясидаги бўшлиқни тўлдиришга мажбурдирлар. Ҳа, жамоа уч йил мобайнида Зиданнинг талабига бўйсуниб, жуда катта иштиёқ энергиясини сарфлаб юборди. Мураббий сифатида ғалаба иштиёқида ёнган Зидандаги кучли энергия жамоани уч йил юқори мақом ва босимда ушлаб турди. Олқишлашга ва ҳавас қилишга муносиб бардош бу! Бошқача айтганда, таранг тортилган пружина, ниҳоят, дастлабки ҳолига қайтди. Бугунги руҳий ҳолатида «Реал»ни наинки «Эйбар», балки исталган кучсиз жамоа ҳам ютиши мумкин. «Эйбар» тактик устунлик эвазига ғалаба қозонгани ҳақидаги гап-сўзлар ҳам ортиқча. Қанақа тактика? Ўйин услуби масаласида «Эйбар»нинг «Реал»дан устун бўлиши - фантастик ҳодиса! Бундай бўлиши мумкин эмас ва яқин йиллар ичида кутилмайди ҳам бу каби воқеа. Демоқчимизки, «Эйбар» «Реал»ни мағлуб этадиган даражада кучли ўйнамади, аксинча, «Реал» «Эйбар»га ғалаба қозониш имконини берди. Фикримизча, «Реал»нинг айни чоғдаги аҳволини шу мазмунда тушунган маъқул. Шунинг учун ҳам, «Эйбар»нинг йирик ҳисобдаги ғалабаси «Реал» учун фожиа саналмайди. Жамоани Соларидан кўра кўпроқ вақт даволайди.
Умуман олганда, Лопетеги «Реал»га қандай бемаврид келган бўлса, шундай бемаврид истеъфога чиқарилди. Вақт ўтиб, ҳаммаси жой-жойига тушарди. «Реал» руҳиятидаги тарангликни бошқаришга мураббийнинг маҳорати аралашолмайди. Шундай экан, Соларига ҳам «қутқарувчи» сифатида қараш ўринсиз. «Эйбар»га қарши кечган ўйин - бунинг исботи! Таъкидлаш жоизки, «Манчестер Сити» ва «Ливерпул»нинг ҳужумкор «квартет»лари қанчалар фусункор бўлмасин, тажриба ва маҳорат бобида «Реал» таркибидаги гигантлар билан, барибир, бўйлашолмайди. Сане ва Манедаги абжирлик Жезус ва Фирминьодаги ажойиб дриблинг умумий футбол контекстида «Реал» мақомига тенглаша олмайди. Таъбир жоиз бўлса, «Манчестер Сити» ва «Ливерпул»да «Реал»даги каби пурвиқорлик етишмайди. Серхио Агуэро Гвардиола, Муҳаммад Салоҳ Юрген Клопп қўл остида тўп сураётган «Реал» мақомига муносиб футболчилардир. «Реал» академизми кўзгусидан қаралса, «Сити» ва «Ливерпуль» ўйинидаги қизғинлик анчайин ғариб кўринади.
Муҳтарам мухлис! Биз ҳам бошқалар каби Гваридола ва Юрген Клопп услубига ҳурмат билан қараймиз. Улар қўл остидаги жамоалар ўйинини мириқиб томоша қиламиз. Бироқ куч ва имконлар тарозисида тортилганда, «Реал» анчагина устун эканлигини тан олиш даркор. «Манчестер Сити» сафарда тиришқоқ «Вест Хэм»ни пийпалаб ташлаган, «Вест Хэм»дан ҳам кучсизроқ «Эйбар» «Реал»ни мағлубиятга учратган бўлса ҳам, биз шу ҳақиқатни айтишимиз даркор. Зеро футбол ҳақиқатлари бир-икки ўйин натижаси билан ўзгариб қолмайди. «Альянс Арена»да «Бавария» билан басма-бас гол урган «Фортуна» Бундеслига етакчиси мақомига даъвогарлик қилолмагани каби, Жанубий Корея термасидан 0:4 ҳисобида учралган мағлубият футболчиларимиз маҳоратини асло камайтириб қўймайди. Қисқаси, ўша куни футболчиларимиз футбол ўйнамасликлари керак эди ва ўйнашмади. «Реал» ҳам «Эйбар»га қарши ўйин чоғи худди шундай таассурот уйғотди. Мажбуран майдонга тушишнинг оқибати - шу! Тақвимни ўзгартириб бўлмайди ёки бировга «Биз бугун ўйнолмаймиз!» дейиш уят, маломат. Отилаётган маломат тошларидан ҳимояланиш эса азоб, машаққат. Шундай ўйинлар бўлганки, улардаги ҳафсаласизлик учун «Реал» ҳам, бош жамоамиз ҳам етарлича айбланган. Ўзимиз ҳам холис танқиддан тийилмаганмиз. Аммо бош жамоамиз ва «Реал»нинг бу сафарги мағлубиятига ҳам ўша танқидий кўз билан қараш адолатсизлик ҳисобланади. Гоҳо одам теп-текис йўлда бирдан қоқилиб, йиқилади. Йиқилганни тепмаслик, аксинча, унинг оёққа туришига кўмаклашиш - инсоний вазифа. Бугун бош жамоамизга ҳам, «Реал»га ҳам шундай инсоний муносабат зарур. Шу, холос. Бошқа барча гап-сўзлар иккинчи даражали. Майдонда бир жамоа ўйнамаган баҳслар футбол меъёрлари билан баҳоланмайди. Аксинча, ўйнолмаслик изтироби сабаб қийналаётган футболчилар руҳан қўллаб-қувватланади....
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20