Икки йиллик танаффусдан сўнг «Андижон» яна кучлилар сафида ўйнайди. Жорий мавсум Про-лига олтин медалларини қўлга киритган андижонликлар тўғридан-тўғри Суперлига йўлланмасига эга чиқишди. Жамоа чемпионат якунланишига икки тур қолганда ушбу имтиёзга расман эга бўлди. Бу ўзига хос тарихий воқелик «Истиқлол»га қарши кечган драматик учрашув (2:1)да кузатилди. Хабарингиз бор, охирги турда «Машъал» ўз майдонида «Андижон»ни йирик ҳисобда (4:1) таслим этди. Агар «Истиқлол» билан баҳсда андижонликлар очко йўқотишганида, ҳозир вазият мутлақо ўзгача кўриниш оларди. «Андижон» Про-лигада 32та ўйин ўтказиб, 18та ғалаба, 9та дуранг ва 5та мағлубият қайд этди. Тўплар нисбати - 57-29. Про-лигада «Сурхон» энг кўп гол урган жамоа бўлди - 62та. Лекин жанубликлар 53 очко жамғариб, 4-ўрин билан кифояланишди. «Андижон» ва «Машъал» бир хил - 63тадан очко жамғаришди. Ўзаро ўйинлар статистикаси водийликларда яхши бўлгани учун Муборак жамоаси ўтиш турнирида қатнашади. Жорий мавсум бу икки клуб ўзаро тўрт бор тўқнаш келишди. «Андижон» икки, «Машъал» бир учрашувда зафар қучган. Битта ўйин дуранг билан якунланган. Биз яқинда «Андижон»нинг етакчи футболчиларидан бири Иброҳим Отахоновдан интервью олдик.

- Иброҳим, аввало, Про-лигадаги ғолиблик билан табриклайман...

- Табрик учун раҳмат. Мавсум биз учун мураккаб ўтди. Якунда асосий рақибимиз «Машъал» билан бир хил очко тўплаганимиз ҳам фикримга исбот бўлади. Шунга қарамай, олдимизга қўйилган вазифани аъло даржада бажардик. Бу йилги чемпионатимиз аввалгисидан анча фарқ қилди. Ўйинлар қизиқарли ва муросасиз тарзда кечди.

- Нимаси билан қизиқарли бўлди?

- Биринчи галда кутилмаган натижалари билан. Иккинчидан, Суперлигага бериладиган йўлланмалар учун 4-5та жамоа кураш олиб борди. Ке-йин Про-лигада ўз вақтида элитада ўйнаган «Машъал», «Андижон», «Сурхон», «Динамо» каби жамоаларнинг қатнашгани ҳам чемпионатга бўлган қизиқишни оширди.

- Про-лига савияси ошганми?

- Биз жуда қийин ўйинлар ўтказдик. Керагидан кўп очко йўқотдик. Лекин асосийси - Суперлига йўлланмаси учун курашган жамолардан очко олишга эришдик. Чемпионат савиясини ошириш учун ҳали кўп ислоҳотлар олиб бориш керак. Биринчи галда, лигада бақувват ҳомийга эга клублар бўлиши, майдонларнинг ҳолатини яхшилаш лозим. Шунда Про-лигага қизиқиш янада ортади.

- «Истиқлол» билан ўйин ҳақида нима дея оласиз?

- Мазкур учрашув қийин ўтишини билардик. Чунки «Истиқлол»да ҳам Суперлигага тўғридан-тўғри чиқиш имконияти сақланиб қолганди. Ўзига хос кичик дербида ғалаба қозонганимиздан хурсандмиз. Бу муваффақият бизга элита эшикларини очди.

- Ўйинни бошқарган ҳакамларга эътирозлар бўлди. Майдонда ҳаракат қилган футболчи сифатида бунга қандай муносабат билдирасиз?

- Тўғри, ҳакамларга эътироз билдирилди. Лекин Шерзод Қосимов белгилаган пенальти 100 фоиз бор эди. Ҳеч ким мағлуб бўлишни хоҳламайди-ку! Шундан кейин эътирозлар кўпа-йиб кетди. Шахсий фикримни билдираман, ҳакамнинг қарори ўйинга таъсир ўтказмади.

- Про-лигадаги ҳакамликнинг савияси қай даражада? Футболчилар тилида айтганда, «чопишлар» бўлмадими?

- ЎФАда ҳакамларни назорат қиладиган бўлим бор. Менимча, улар бу саволга аниқ жавоб бера олишади.

- Про-лига ҳам Суперлига каби янги форматда ўтказилди. Бу футболчиларга маъқул келдими ёки аввалги тизим яхшироқмиди?

- Менимча, бу йилгиси қизиқроқ бўлди. Фақат битта ёмон томони - «В» гуруҳида ўйнаган жамоаларда Суперлигага чиқиш имконияти кескин паса-йиб кетди.

- Про-лига клублари майдонларининг сифати қай даражада? Кийиниш, ювиниш хоналарида шароитлар яхшими?

- Олдингиларидан яхши, лекин ҳали талаб даражасида эмас.

- Қайси клуб стадионларининг чими талабга жавоб бермайди?

- «Норин», «Орол», «Хоразм» каби жамоаларда муаммолар бор. Айниқса, Нукусдаги сунъий қопламали майдонда ўйнаш жуда қийин бўляпти.

- «Андижон» стадионининг майсаси талабга жавоб берадими?

- Майдонимиздаги чим бошқа жамоларникидан яхшироқ. Лекин Суперлиганинг талаблари анча жиддий. Клуб раҳбарияти «Соғлом авлод» стадионида бу борадаги ишларни бошлаб юборган. Ўйлайманки, янги мавсумда сифатли майдонда ўйнаймиз.

- Бутун мавсум давомида жамоани қўллаб-қувватлаган мухлислар ҳақида нима дея оласиз?

- «Андижон»нинг барча мухлисларига раҳмат айтмоқчиман. Уларнинг қўллаб-қувватлашлари натижасида уй учрашувларида ғалабаларга эришдик. Суперлигада ҳам ишқибозларни хушнуд этишга астойдил ҳаракат қиламиз.

- Жамоа Суперлигада иштирок этишга тайёрми? Ёки таркиб сезиларли даражада кучайтирилиши керакми?

- Менимча, сафимизга янги футболчилар келиб қўшилади. Катта эҳтимол билан барча чизиқлар кучайтирилади. Албатта, бу масалани бош мураббий ҳал қилади.

- Иброҳим, сизни билганлар бироз қўпол ўйинчи дейишади. Ҳакамлар томонидан кўп огоҳлантириласиз. Бу характер билан боғлиқ ҳолатми ёки бошқа сабаблари борми?

- Майдонда бор кучим билан ҳаракат қиламан. Шунга бўлса керак, баъзида кераксиз жойда ҳам қўполлик ишлатиб қўяман. Лекин майдон ташқарисида оғир-босиқман.

- Мураббийлар бу ҳақда ўзингизга ҳам айтишадими?

- Ҳа, «Бўлар-бўлмасга қизишавермагин», дейишади.

- «Андижон» билан қанча муддатга шартнома имзолагансиз? Келаси йили ҳам «бургутлар» шарафини ҳимоя қиласизми?

- Мавсум бошида «Андижон» билан бир йиллик шартнома тузганман. Албатта, келаси йили ҳам шу клубда ўйнайман.

- Гарчи Муборакдаги сўнгги ўйин ҳеч нарсани ҳал қилмасада, «Андижон»нинг йирик ҳисобда ютқазишини кўпчилик кутмаганди. Бу хотиржамликка берилиш оқибатими?

- Шундай деса ҳам бўлади. Лекин муддатидан олдин Суперлигага чиқиш вазифасини бажарганимиз учун мураббийлар ўйин амалиёти кам бўлган футболчиларни майдонга туширишди. Асосий таркиб ўйнаганида, натижа бошқача бўларди.

- Про-лигада келишилган ўйинлар кўп бўлди, дейишяпти...

- Бундай гап-сўзлардан анча узоқдаман. Бизга қўйилган вазифа - Суперлига йўлланмасини қўлга киритиш эди ва буни уддаладик.

- Суперлигада кечаётган кураш ҳақида қандай фикрдасиз?

- Чемпионат янгича форматда ўтказиляпти. Биринчи босқичдан кейин очколар олиб ташланди. Шу ҳолат жуда қизиқ бўлди. Айрим жамоаларнинг зарарига ҳам ишлади. Телевизорда кўп ўйинларни томоша қилдим. Ўтган йилги чемпионат билан таққослаганда, савия бирмунча ошгандек кўринди. Айниқса, иккинчи олтилик жамоалари орасида кураш анча қизиди.

- Терма жамоамиз ўйинларини кўрдингизми?

- Албатта. Шу кунгача олтита учрашув ўтказилди. Ҳар хил натижа қайд этилди: ютқаздик, ютдик, дуранг. Янги мураббий келганидан кейин миллий жамоада янги футболчиларни синаб кўришни бошлади. Ўйинларда ҳар хил таркибни майдонга туширди. Шу сабабдан ҳам ўртоқлик баҳсларида натижа биринчи даражага чиқмади. Жанубий Кореяга қарши кечган сўнгги ўйинни олсак, футболчиларимиз жуда суст даражада ўйнашди. Табиийки, ҳисоб ҳам шунга яраша бўлди.

- Йирик ҳисобдаги мағлубиятимизнинг асл сабаблари нимада бўлди?

- Футболчи сифатида фикр билдирсам, асл сабаби - жисмоний жиҳатдан тайёр эмаслигимиз. Рақибга кучимиз етмади.

- Эктор Купернинг имзоси кўринмади. Мураббийнинг хатоси ҳам борми?

- Унинг тактикасига ҳали йигитларимиз тўлиқ мослашиб олишмади. Аргентиналик мутахассис жамоамизни ҳозирча фақат ҳимоявий тактикада ўйнатяпти.

- Бу кетишда термамиз Осиё кубогида натижага эриша олармикан?

- Қитъа биринчилигида зафар қучиш учун бор куч билан ҳаракат қилиш керак. Мусобақагача ҳали вақт бор. Мураббий ва футболчилар зиммаларидаги вазифани шараф билан уддалашади, деган умиддаман.

- Гуруҳдаги рақиблар ҳақида нима дея оласиз?

- Япония, Уммон ва Туркманистон. Гуруҳдан бемалол чиқишимиз керак. Осиёда ўз ўрнимиз бор. Агар ўйинимиз қовушса, футболчиларимиз исталган кучли рақибни мағлубиятга учрата оладиган салоҳиятга эгалар.

- Иброҳим, энди сизга блиц-саволлар билан мурожаат қиламан. Фаолиятингизда эслашни истамайдиган ўйин борми?

- Ҳа, бор. Ўз майдонимизда «Нефт-чи»га имкониятни бой берганмиз. Ўшанда ҳам «Андижон» шарафини ҳимоя қилардим.

- Нима учун эслашни истамайсиз?

- Бу учрашув 2015 йилги мавсумга тўғри келганди. Ўшанда ўз мухлисларимиз кўз ўнгида 0:4 ҳисобида ютқазгандик.

- Аксинча, қайси ўйинни кўп эслайсиз?

- «Андижон» - «Пахтакор» баҳсини кўп ёдга оламан. Адашмасам, мазкур учрашув 2012 йили бўлиб ўтганди. Ўшанда 2:1 ҳисобида зафар қучганмиз.

- Фаолиятингиздаги энг омадли мавсум ва аксинча?

- Ҳозирча 2010 йилги мавсум энг омадлиси бўлиб турибди. Чемпионатни 5-ўринда якунлагандик. Омадсизи эса 2016 йилга тўғри келади: элитани тарк этгандик.

- Қайси жамоага ишқибозлик қиласиз?

- «Барселона» мухлисиман.

- Футболчилардан-чи?

- Хавининг ўйинларини ўзгача иштиёқ билан томоша қиламан.

- Қайси таомни хуш кўриб истеъмол қиласиз?

- Кўпроқ ош ейман.

- Севимли автомобилингиз?

- ВMW.

- Қайси шаҳарга боришни истайсиз?

- Насиб қилса, Маккага!

- Севимли рақамингиз борми ёки бу сиз учун аҳамиятсизми?

- Бор, «13».

- Биринчи мураббийингиз ким?

- Дилшод Азимов. Ушбу мутахассисдан умрбод миннатдорман.

- Миллионлар ўйини бўйича таҳсил олган илк таълим даргоҳингиз?

- Андижон болалар футбол мактаби.