Европа Чемпионлар Лигасининг 1|8 финалида Амстердамнинг «Аякс» жамоаси Мадриднинг «Реал»ига қарши баҳс олиб боради. Ана шу клубларнинг собиқ ўйинчиси ҳисобланган Уэсли Снейдер айни пайт Қатарнинг «Ал-Гарафа» клуби шарафини ҳимоя қилмоқда. Яқинда Испаниянинг Marca нашрига интервью берган голландиялик футболчи собиқ жамоаларининг тўқнашуви борасида фикр билдириб ўтди.

- ЕЧЛнинг 1|8 финалидан ўрин олган «Реал» - «Аякс» учрашуви борасида қандай фикрдасиз?

- «Реал»га қарши ўйнаш «Аякс» учун ажойиб имконият. Айни пайтдаги «Реал» олдинги йиллардагидек кучли эмас. «Аякс» - ёш жамоа. Лекин шунга қарамай, улар ажойиб ўйин намойиш қилишмоқда. Айниқса, ўз майдонларида - Амстердамда. «Реал» учун Голландияга ташриф осон кечмаслиги аниқ.

- «Реал»ни жуфтликнинг фаворити деб ҳисобламайсизми?

- Тўғри, ҳар нима қилганда ҳам мадридликлар фаворит бўлиб қолишаверади. Агар «Аякс» дастлабки учрашувда яхши натижа қайд этадиган бўлса, «Реал» муаммоларга дуч келиши мумкин. «Қироллик клуби»нинг тўп назоратини яхши кўрадиган жамоаларга қарши ўйинларини кўрдик. Бир сўз билан айтганда, бу «Аякс»га ўзини кўрсатиши учун яхши имконият. Лекин амстердамликлар ЕЧЛнинг охирги уч йилдаги ғолибига қарши ўйнаётганларини унутмасликлари лозим.

- Шу боис ҳам «Аякс»да кейинги босқичга чиқиш учун яхши имконият бор, деб ҳисоблайсизми?

- Тўғрисини айтсам, ҳа. «Реал» Европа майдонларида мутлақо бошқача ўйин намойиш қилади. Лекин кейинги босқичга чиқиш учун «Аякс»да яхши имконият бор.

- Шу ўринда айтиш жоизки, Мадриддагилар ҳам қуръа уларга «Аякс»ни рўбарў қилганидан хурсанд бўлишди...

- Албатта. Чунки улар «Аякс»ни олдинги йиллардаги «Аякс» деб ҳисоблашмоқда. Бироқ амстердамликлар анча ўзгаришган. Боз устига, «Реал»нинг оддий мухлиси Голландия футболини кузатмайди ва «Аякс» ҳақида билмайди. Мен эса уларни биламан. Бу юқори савияга чиққан клуб.

- Сўнгги пайтларда Маттейс де Лигт ва Френки Де Йонглар ҳақида кўп гапирилмоқда. Улар Европанинг гигант клубига қарши ўйнашга тайёрларми?

- Бу ўйин улар учун ҳақиқий синов вазифасини бажаради. Ушбу футболчиларнинг даражалари юқори. Ишончим комилки, уларни ёрқин келажак кутиб турибди. «Реал»га қарши ўйин орқали бу иқтидор соҳибларининг қандай даражада эканликларини билиб оламиз. Юқорида айтганимдек, улардан ажойиб ўйинчилар чиқишига ишонаман.

- «Реал»нинг Криштиану Роналдусиз бўш ўйин кўрсатаётганига ажабландингизми?

- «Реал»нинг Роналдуга боғланиб қолганини билардим. Чунки у ҳамиша муҳим роль ўйнаган. Шу боис ҳам мадридликларнинг бўш ўйин кўрсатаётганлари мен учун сюрприз бўлмади. Роналду ҳар доим жамоани олдинга тортиб юрган. У кетганидан кейингина Мадрид жамоасининг Криштиануга боғланиб қолганига гувоҳ бўляпмиз. Агар Роналду ҳозир «Реал»да ўйнаётган бўлганида, «Аякс»нинг кейинги босқичга чиқиш имкониятлари пасайиб кетарди.

- «Реал» яна қайси футболчилардан чўчиши керак?

- Ҳаким Зиеш ҳозирда ажойиб формасига кирган. Шунингдек, Душан Тадич бор. Албатта, Де Лигт ва Де Йонг ҳам. Шунингдек, менга Николас Тальяфиконинг ўйинлари ёқади. У худди Марсело сингари тез ҳаракат қилади. Бугунги «Аякс» умуман бошқача. Жамоа сафида Дейли Блинд ёки Клас-Ян Хунтелар каби тажрибали футболчилар бор. Тўғри, таркибда жаҳон даражасидаги суперюлдузлар йўқ. Лекин шу даражага чиқа оладиган ажойиб футболчилар тўп суришмоқда.

- Ҳозир ҳам «Реал»ни ЕЧЛ фаворити деб ҳисоблайсизми ёки уч йиллик ғалабалардан сўнг тахтни бошқаларга бериш вақти келдими?

- Улар ҳамиша фаворитдирлар. Аммо бунинг учун энг аввало, «Аякс»дан ўтиб олишлари керак. Ҳақиқат шундаки, «Аякс» «Сантьяго Бернабеу»да муаммога дуч келиши мумкин.

- 2007-2009 йилларда «Реал»да ўйнагансиз...

- Ушбу жамоадаги фаолиятим орқали яхши таассуротларга эга бўлганман. Бир неча ҳафта олдин у ерга «Ривер Плейт» ва «Бока Хуниорс» ўртасидаги учрашувни томоша қилишга боргандим. Ўшанда дўстларим Серхио Рамос, Марсело ва Чендо билан учрашдим. Жамоа ва Мадридни яхши кўраман. У ерда жуда бахтли эдим.

А.Аҳмедов тайёрлади