Ўтган якшанба куни қизиқ ва ғалати ҳолатга тушдик. Газетамизнинг қўлингиздаги сонини душанба куни тонгда босмахонага топширишимиз керак эди. Терма жамоамизнинг ОК-2019 нимчорак финалидаги ўйини эса соат 19:00да. Бундай ҳолатда нима қилиш керак? Газета мухлисларга етиб борган вақтда натижа барчага маълум бўлиб улгуради-ку. Биз эса энг муҳим паллада фақат миллий жамоамиз ҳақида ёзишни истаймиз. Аммо бунинг иложи йўқ. Газета белгиланган вақтда, яъни ўйиндан аввал чоп этилиши шарт. Узоқ тортишувдан сўнг 1|8 финалнинг дастлабки баҳсларини томоша қилиш, кейингина ёзишга келишдик...
Катта қизиқишнинг сабаби Вьетнам ва Таиланд терма жамоаларинг нимчорак финалга тайёргарлигини кузатиш эди, албатта. Ажабланарли томони, кўпчилик негадир вьетнамликлар ғалаба қозонишларини истади. Таиланд ва Хитой миллий жамоалари ўртасидаги тўқнашувда эса ўзбекистонлик аксарият мухлислар бетараф қолишди. Айримлардан шу икки хил муносабат сабабини сўраганимизда, деярли бир хил жавоб эшитдик: «Таиланд - Хитой баҳсини маҳорат, Иордания - Вьетнам учрашувини эса шижоат бошқаради! Биз иштиёқ тарафдоримиз!» 1|8 финалнинг илк ўйини дарҳақиқат, тахминларни тасдиқлади. Биз эса мухлисларни қўллаб-қувватлаш учун қуйидаги шеър-тўртликни битдик:
Ўйна! Имконинг бор, неки боринг бер,
Кураш! Имконингдан ўйнагин ўзиб.
Агар майдон ичра тўкилмаса тер,
Ўзим қулоғингдан қўяман чўзиб!
Шеър кўпчиликка ёқди. Кайфият кўтарилди. Гарчи вьетнамликларни эркалаш ва олға ундаш учун ёзилган бўлса-да, мухлислар шеърни дарров ўзимизнинг терма жамоага нисбатан ўзлаштиришди. Нима ҳам дердик, мухлис ҳамиша ҳақ!
Яна эслатамиз: буларнинг барчаси биз учун муҳим саналган ўйиндан бир кун аввал юз берган воқелик. Вьетнам терма жамоаси ишончни оқлади. Иштиёқ, жонбозлик, рақибга босим ўтказиш, уни бир сония ҳам тинч қўймаслик каби хислатлар вьетнамлик футболчилар ҳаракатида бор бўйича кўзга ташланди. Оддий ифода этсак, Вьетнам терма жамоаси иложсиздек, имконсиздек туюлган ишни амалга ошириш учун охиригача курашди. Учрашувнинг иккинчи бўлимидан вьетнамликлар шундай тезликда ҳаракатлана бошлашдики, натижада иорданиялик бақувват футболчилар ўйинидаги мувозанат бузилди. Улар ўзлари кўниккан ритмда тўп сура олишмади. Ҳаттоки, Иордания термасининг рақибларга ҳамиша юқоридан қаровчи тажрибали ва моҳир дарвозабони Амир Шафий ҳам шошганидан ўзини йўқотиб қўйди. Қисқаси, Вьетнам терма жамоасининг ғалабаси ва жуда оз имконлардан унумли фойдаланиб, чорак финалга йўл олиши - футболчиларимиз учун чинакам ибрат! Тезлик ва югуриш, рақиб тилини осилтириб қўйиш мана шундай бўлади. Тўғри, терма жамоамиздан ҳозирча бу каби ҳаракат ва маромни кутиш ноўрин. Балки футболчиларимиз табиатига бундай реактив тезлик, тезюрар машина каби ҳаракатланиш ҳеч қачон сингмас. Ҳар ҳолда, бу ўйинолди орзулари. Ҳозир натижаси ҳаммага маълум учрашувда жамоамиз бундай ҳаракатланмагани аниқ. Лекин ғалаба қозониш учун бошқа бир муҳим жиҳат - иштиёқ ҳам борлигини унутмайлик. Шу иштиёқ кўзга ташланмагани учун Таиланд миллий жамоаси ўйиндаги устунликни сақлаб қололмай, хитойлик футболчиларга имкониятни бой берди.
Эътибор беринг, биз футбол тили билан сўзламаяпмиз. Чунки терма жамоамиз узоқ вақтдан буён талаб қилинаётган футбол кўрсатишга энди-энди киришди. Хусусан, Япония терма жамоасига қарши кечган учрашув мухлисларда ижобий таассурот уйғотди. Гарчи ғалаба қозонилган бўлса-да, жамоамизнинг уммонлик футболчиларга қарши баҳсдаги ҳаракати мухлисларга ёқмаганди. Бахтимизга захирадан майдонга тушишган Шомуродов - Алибоев - Ҳамдамов триоси ўйинни қутқарди. Марат Бикмаев ва Сардов Рашидов эса мухлислар асабини бузиб, қонларини қайнатадиган ўша эски ва «таниш» қовушимсиз ҳолда тўп суришди. Ҳаммасини ҳаяжон иллати билан боғлаган соддадил Эктор Купер бу икки футболчига Япония термасига қарши учрашувда ҳам ишонч билдирди. Афсуски, на Марат, на Сардор ва на Фозил Мусаев ишончни оқлади. Аён бўлдики, бу йигитларларнинг ўйинга муносабати Отабек Шукуров - Элдор Шомуродов - Жавоҳир Сиддиқов - Достон Ҳамдамов квартети табиатига тушмайди. Нисбатан ёшроқ футболчиларимизда иштиёқ яққол сезилмоқда. Айрим «ака»ларда эса жонбозлик кўзга ташланмаяпти. Назаримизда, бу ҳол истак билан боғлиқ эмас, шекилли. Негаки, биз танқид қилаётган футболчилар ҳам терма жамоамиз билан ғалаба қозонишни, соврин эгаси бўлишни жуда-жуда ҳоҳлашади. Бироқ хоҳиш ва иштиёқ уйғунлашмаса, бундан не наф?! Ҳозир бор гапни айтадиган пайт. Терма жамоамиз навбатдаги босқичга қадам қўйгани учун ҳам гуруҳ босқичидаги мағлубият учун мухлислар футболчиларимизни айблашмаяпти.
Қаранг, футбол оммаси «Ливерпул»ни учрашувнинг сўнгги дақиқасига қадар қийнаб, мағлубиятга учраган «Кристал Пэлас»ни роса олқишлади. Муҳаммад Салоҳ жамоасининг 3-голини урганида, артистлик қобилиятидан бебаҳра қолмаган Юрген Клопп жим турди, аниқроғи, у қувончдан сакролмади. Чунки Лондоннинг камтар жамоаси ҳаддан зиёд иштиёқ билан тўп сураётганди. Бундай вазиятда Юрген Клопп каби мураббийлар ҳам тик туришади, воқеалар ривожини охиригача сабр билан кутишади. Бизнингча, Эктор Купер ҳам шу йўлдан бормоқда. У асл натижани тоқат билан кутишга тайёр. Келинг, уни қўллаб-қувватлайлик. Ўйлаймизки, терма жамоамиз Эктор Купер раҳбарлигида катта режанинг чорак фоизини бажаришга улгурди, яъни жаҳон чемпионати финал босқичи йўлланмасини қўлга киритишга интиладиган янги таркиб шаклланиш жараёни якунига етмоқда. Мана, Элдор Шомуродов, Отабек Шукуров, Жавоҳир Сиддиқов каби футболчилар ўзларини аста-секин асосий таркиб аъзоси сифатида ҳис қилишмоқда. Энди бу туйғу Икром Алибоев, Даврон Ҳошимов, Одил Ҳамробеков, Азиз Турғунбоев каби йигитларда ҳам мустаҳкамланиши даркор. Ҳамкасбимиз Гулчеҳра Муродова терма жамоамиз ўйинини кузатиб, «Купер қориган хамир энди кўпчибди. Нонни ясашга ва ёпишга ҳали эрта!» - деди аёл ижодкорларга хос ўхшатиш билан. Маъқуллашга арзийдиган хулоса, тўғрими!
Мазмунан янгича ўйнаётган терма жамоа муборак, азиз мухлислар! Чинакам катта ғалабалар ҳали олдинда...
Муҳаммад ВАЛИ, "ИнтерФУТБОЛ" газетаси
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20