Юлдузлар ёғдуси кўзингизни қамаштириши ҳеч гап эмас. Маълумки, УЕФА ҳар йилнинг рамзий терма жамоасини мухлислар ўртасидаги сўров воситасида аниқлайди. Европа футбол уюшмаси расмий сайтидан фойдаланувчилар илк рамзий жамоани 2001 йили танлашган эди. Интернет мисли йўқ суръатда жаҳон бозорини эгаллагани сари йиллик сўров иштирокчилари сони тобора ошиб, бугунги кунда деярли 9 миллион кишига етди. Олдинлари энг яхши мураббий ҳам аниқланарди, бироқ кейинроқ бу йўналишдаги сўров тўхтаб қолди. Тушунарлики, умумэътироф ҳар қандай футболчи учун чинакам мукофот саналади. Шундай экан, йилнинг рамзий терма жамоасига тушиш - катта шараф. Тўғри, баъзан элит жамоа таркиби бўйича кучли эътирозлар янграши мумкин. Лекин бундан умумэътироф аҳамияти пасайиб қолмайди. Мана, УЕФА талқинидаги барча рамзий терма жамоаларни эсга олсак, ўз-ўзидан ўтмишнинг ширин хотиралари уйғонади. Турли авлод вакилларини қўмсаяпсизми, унда марҳамат, қуйидаги мақола билан танишиб чиқинг.

2001 йил жамоаси

Сантьяго Канисарес («Валенсия») - Космин Контра («Алавес»|«Милан»), Сами Хююпя («Ливерпуль»), Андерсон («Бавария»|«Барселона»), Биксант Лизаразю («Бавария») - Дэвид Бекхэм («МЮ»), Патрик Виейра («Арсенал»), Зайниддин Зидан («Ювентус»|«Реал»), Кили Гонсалес («Валенсия») - Тьерри Анри («Арсенал»), Давид Трезеге («Ювентус»)

Бош мураббий: Жерар Улье («Ливерпуль»)

Эсласангиз, ўша мавсум УЕФА кубоги финалида «Ливерпуль» ва «Алавес» клублари чинакамига «голлар отишмаси»ни кўрсатганди. «Валенсия» эса ЧЛ финалида «Бавария»га имкониятни бой берган. Дэвид Бекхэм, Патрик Виейра ва Тьерри Анри АПЛда нур сочган бўлсалар, Давид Трезеге «А» серияда бош тўпурар бўлган. Зайниддин Зидан аксинча, Италиядан Испанияга йўл олганди. Умуман, қизиқарли таркиб: Франциядан 5 нафар футболчи, лекин нақ 7та терма жамоа вакили.

2002 йил жамоаси

Рушту Режбер («Фенербахче») - Карлес Пуйоль («Барселона»), Алессандро Неста («Милан»), Кристиан Киву («Аякс»), Роберто Карлос («Реал») - Кларенс Зеедорф («Милан»), Михаэль Баллак («Бавария»), Зайниддин Зидан («Реал»), Дэмьен Дафф («Блэкберн») - Тьерри Анри («Арсенал»), Роналдо («Реал»)

Бош мураббий: Шенол Гюнеш (Туркия термаси)

Нима, 2002 йили интернет фақат Туркия, Руминия ва Ирландияда ривожланганмиди? Шенол Гюнеш ва Рушту Режбер - ЖЧ-2002 кашфиётлари ва бронза медали эгалари. Кристиан Киву («Аякс») ва Дэмьен Дафф («Блекбэрн») эса камтарин клубларда назарга тушишган. Тўғри, Карлес Пуйоль ўрнида Кафу бўлиши мумкин эди. Шунингдек, Лусио, Зе Роберто, Оливер Кан ҳам рамзий жамоага муносиб ўйнашганди.

2003 йил жамоаси

Жанлуижи Буффон («Ювентус») - Пауло Феррейра («Порту»), Алессандро Неста («Милан»), Паоло Мальдини («Милан»), Роберто Карлос («Реал») - Луиш Фигу («Реал»), Дэвид Бекхэм («Реал»), Зайниддин Зидан («Реал»), Павел Недвед («Ювентус») - Тьерри Анри («Арсенал»), Рууд ван Нистелрой («МЮ»)

Бош мураббий: Жозе Моуриньо («Порту»)

УЕФА кубоги эгаси - «Порту»дан Жозе Моуриньо ва Пауло Феррейра эътироф этилган. Фанатлар бу сафар ҳимояга классик ижрочилар - Алессандро Неста, Паоло  Мальдини ва Роберто Карлосни қўйишган. Марказда яна Зайниддин Зидан, унинг ёнида Павел Недвед, Дэвид Бекхэм ва Луиш Фигу - ажойиб тўртлик. «Реал»дан 4 нафар вакил борлиги диққатга сазовор.

2004 йил жамоаси

Жанлуижи Буффон («Ювентус») - Кафу («Милан»), Рикарду Карвалью («Челси»), Алессандро Неста («Милан»), Эшли Коул («Арсенал») -  Криштиану Роналду («МЮ»), Манише («Порту»), Роналдиньо («Барселона»), Павел Недвед («Ювентус») - Тьерри Анри («Арсенал»), Андрей Шевченко («Милан»)

Бош мураббий: Жозе Моуриньо («Челси»)

Евро-2004 чемпионлари - грекларга жой топилмаганию, уларнинг устозлари Отто Рехагель назардан четда қолгани ғалати. Лекин Жанлуижи Буффон, Кафу, Алессандро Неста, Павел Недвед ва Тьерри Анри ўз жойларида. Рамзий жамоага илк марта кирган «Олтин тўп» соҳиби Андрей Шевченко, шунингдек, Криштиану Роналду ҳамда Роналдиньо эса таркибни даҳшатли кўринишга келтиришган! Ҳаттоки, Эшли Коул ва Рикарду Карвалью номзоди ҳам эътироздан холи.

2005 йил жамоаси

Петр Чех («Челси») - Кафу («Милан»), Жон Терри («Челси»), Карлес Пуйоль («Барселона»), Паоло Мальдини («Милан») - Луис Гарсия («Ливерпуль»), Стивен Жеррард («Ливерпуль»), Роналдиньо («Барселона»), Павел Недвед («Ювентус») - Самуэль Это~О («Барселона»), Андрей Шевченко («Милан»)

Бош мураббий: Жозе Моуриньо («Челси»)

ЧЛнинг Истанбул финали рамзий жамоага икки нафар футболчи тақдим этди - Луис Гарсия ва Стивен Жеррард. Тўғри, ҳал қилувчи баҳсда аламга ботган «Милан»дан ҳам 3 нафар вакил танланган, лекин уларнинг ҳар бири афсона. Павел Недвед яна таркибда, Карлес Пуйоль эса ўнг қанот эмас, марказий ҳимоя эгаси. Тўғри, мухлислар Петр Чех ўрнига Ежи Дудекни қўйишса бўларди.

2006 йил жамоаси

Жанлуижи Буффон («Ювентус») - Жанлука Замбротта («Барселона»), Фабио Каннаваро («Реал»), Карлес Пуйоль («Барселона»), Филипп Лам («Бавария») - Стивен Жеррард («Ливерпуль»), Сеск Фабрегас («Арсенал»), Кака («Милан»), Роналдиньо («Барселона») - Тьерри Анри («Арсенал»), Самуэль Это~О («Барселона»)

Бош мураббий: Франк Райкаард («Барселона»)

Бир томонда - кўзни қамаштирган «Барселона», иккинчи тарафда матонатли Италия термаси. Мухлисларга қойил, улар ана шундай ҳолатда ҳам, Сеск Фабрегас ҳамда Кака ижросидаги жиддий ўйинлардан кўз юмишмаган. Ҳа, фақат Франческо Тоттининг четда қолганига бироз ачиниш мумкиндир...

2007 йил жамоаси

Икер Касильяс («Реал») - Дани Алвеш («Севилья»), Алессандро Неста («Милан»), Жон Терри («Челси»), Эрик Абидаль («Лион») - Криштиану Роналду («МЮ»), Стивен Жеррард («Ливерпуль»), Кака («Милан»), Кларенс Зеедорф («Милан») - Златан Ибрагимович («Интер»), Дидье Дрогба («Челси»)

Бош мураббий: Алекс Фергюсон («МЮ»)

Криштиану Роналду таркибга қайтади, Дани Алвеш ва Златан Ибрагимович илк марта эътирофга лойиқ бўладилар. «Милан»нинг ЧЛдаги ғалабаси самараси ўлароқ, Алессандро Неста, Кларенс Зеедорф ва Кака («Олтин тўп» лауреати) ҳам элит гуруҳдан жой олишган. Дидье Дрогба эса рамзий жамоага биринчи ва охирги марта кирганди.

2008 йил жамоаси

Икер Касильяс («Реал») - Серхио Рамос («Реал»), Жон Терри («Челси»), Карлес Пуйоль («Барселона»), Филипп Лам («Бавария») - Криштиану Роналду («МЮ»), Хави Эрнандес («Барселона»), Сеск Фабрегас («Арсенал»), Франк Рибери («Бавария») - Лионель Месси («Барселона»), Фернандо Торрес («Ливерпуль»)

Бош мураббий: Алекс Фергюсон («МЮ»)

Янги кўринишдаги ҳужум чизиғи - Лионель Месси ва Фернандо Торрес. «Реал» ва «Барселона»дан вакил кўплигида Испания термасининг Европа чемпионатидаги зафари улуши ҳам бор, албатта. Умуман, «қизил фурия»нинг 6 нафар футболчиси кўп овоз олганида ажабланадиган томони йўқ. Шундай тиғиз ҳолатда Жон Терри ва Филипп Ламга ҳам эътибор қаратилган экан, улар чиндан ҳам, зўр ўйнашган.

2009 йил жамоаси

Икер Касильяс («Реал») - Дани Алвеш («Барселона»), Жон Терри («Челси»), Карлес Пуйоль («Барселона»), Патрис Эвра («МЮ») - Криштиану Роналду («МЮ»|«Реал»), Хави Эрнандес («Барселона»), Кака («Милан»|«Реал»), Андрес Иньеста («Барселона») - Лионель Месси («Барселона»), Златан Ибрагимович («Интер»|«Барселона»)

Бош мураббий: Хосеп Гвардиола («Барселона»)

Хосеп Гвардиоланинг илк ғалабаси. 11 нафар футболчидан 9 нафари «Реал» ва «Барселона»га боғлиқ бўлгани - ажойиб факт. Дарвоқе, «Барса» дейлик, Патрис Эврани сотиб олиш ҳаракатини якунига етказганидами, Жон Терри ягона «бегона» футболчига айланарди. Андрес Иньестани илк бора эътироф этишгани ҳам диққатга сазовор ҳолат.

2010 йил жамоаси

Икер Касильяс («Реал») - Майкон («Интер»), Жерар Пике («Барселона»), Карлес Пуйоль («Барселона»), Эшли Коул («Челси») - Криштиану Роналду («Реал»), Хави Эрнандес («Барселона»), Уэсли Снейдер («Интер»), Андрес Иньеста («Барселона») - Лионель Месси («Барселона»), Давид Вилья («Валенсия»|«Барселона»)

Бош мураббий: Жозе Моуриньо («Интер»|«Реал»)

Испания термаси - жаҳон чемпиони, «Интер» - ЧЛ ғолиби. Бу сафар элит таркибнинг 8та жойи «Реал» ва «Барселона» аъзолари томонидан банд этилди. Майкон ҳамда Уэсли Снейдернинг жамоага киришгани - бу ЧЛ маҳсули. Тўғри, голландиялик футболчи ЖЧ-2010да ҳам алоҳида кўзга ташланган эди.

2011 йил жамоаси

Икер Касильяс («Реал») - Дани Алвеш («Барселона»), Жерар Пике («Барселона»), Тьяго Сильва («Милан»), Марсело («Реал») - Арьен Роббен («Бавария»), Хави Эрнандес («Барселона»), Андрес Иньеста («Барселона»), Гарет Бэйл («Тоттенхэм») - Лионель Месси («Барселона»), Криштиану Роналду («Реал»)

Икер Касильяснинг кетма-кет 5-марта дарвозага лойиқ кўрилиши. «Реал» ва «Барселона»дан яна 8 киши. Гарет Бэйл ва Арьен Роббен - жамоанинг янги аъзолари. Эътиборлиси, ушбу рамзий термага тушганлардан биргина Тьяго Сильва Мадрид ва Барселона клубларига бегоналигича қолди.

2012 йил жамоаси

Икерь Касильяс («Реал») - Серхио Рамос («Реал»), Жерар Пике («Барселона»), Тьяго Сильва («ПСЖ»), Филипп Лам («Бавария») - Месут Озил («Реал»), Хави («Барселона»), Андреа Пирло («Ювентус»), Андрес Иньеста («Барселона») - Криштиану Роналду («Реал»), Лионель Месси («Барселона»)

Бутун жаҳондаги мухлислар анъанани сақлаб қолишди - «Реал» ва «Барселона»дан яна 8 киши. «Бегоналар» - Андреа Пирло, Филипп Лам ва Тьяго Сильва. Евро-2012да ғалаба нашидасини сурган Испания термаси эса 5 нафар вакилга эга бўлди. Ёш ва истиқболли Месут Озил ҳам шу ерда.

2013 йил жамоаси

Мануэль Нойер («Бавария») - Серхио Рамос («Реал»), Давид Алаба («Бавария»), Тьяго Сильва («ПСЖ»), Филипп Лам («Бавария») - Месут Озил («Арсенал»), Гарет Бэйл («Реал»), Марко Ройс («Боруссия» Д.) - Франк Рибери («Бавария»), Криштиану Роналду («Реал»), Златан Ибрагимович («ПСЖ»)

ЧЛ финалига «Бавария» ва «Боруссия» Д. клубларининг чиқиши таъсири билиниб, рамзий жамоа таркиби анча ўзгарди. Яъни Мануэль Нойер, Филипп Лам, Давид Алаба, Марко Ройс ва Франк Рибери «Реал» ва «Барселона» вакилларини бироз четга суришди. Тўғри, шунда ҳам «Мадрид»нинг 3 нафар футболчисига жой топилди (Месут Озил «Арсенал» сафини тўлдиришга улгурганди), «Барса»дан эса ҳеч ким «рамз»га киролмади. Шуни назарда тутсак, нодир йил...

2014 йил жамоаси

Мануэль Нойер («Бавария») - Серхио Рамос («Реал»), Давид Алаба («Бавария»), Диего Годин («Атлетико»), Филипп Лам («Бавария») - Арьен Роббен («Бавария»), Тони Кроос («Реал»), Анхель ди Мария («МЮ») - Лионель Месси («Барселона»), Криштиану Роналду («Реал»), Златан Ибрагимович («ПСЖ»)

Анхель ди Мария Аргентина терма жамоасида жуда зўр ўйнашдан ташқари, баҳорда «Реал»га катта ёрдам берди, аммо «МЮ»га ўтиб хато қилди. Диего Годин илк марта элит таркибга киритилди. Лионель Месси ва Криштиану Роналду яна бирга.

2015 йил жамоаси

Мануэль Нойер («Бавария») - Серхио Рамос («Реал»), Давид Алаба («Бавария»), Жерар Пике («Барселона»), Дани Алвеш («Бавария») - Андрес Иньеста («Барселона»), Поль Погба («Ювентус»), Хамес Родригес («Реал») - Неймар («Барселона»), Криштиану Роналду («Реал»), Лионель Месси («Барселона»)

«Ювентус»дан бир киши - Поль Погба, «Бавария»дан одатдагидек, Мануэль Нойер ва Давид Алаба. «Барселона» Дани Алвеш, Жерар Пике, Андрес Иньеста, Лионель Месси ва янги делегат - Неймар ҳисобига рамзий жамоадаги мавқеини тиклади.

2016 йил жамоаси

Жанлуижи Буффон («Ювентус») - Леонардо Бонуччи («Ювентус»), Серхио Рамос («Реал»), Жерар Пике («Барселона»), Жером Боатенг (Бавария) - Андрес Иньеста («Барселона»), Тони Кроос (Реал), Лука Модрич («Реал») - Криштиану Роналду («Реал»), Антуан Гризманн («Атлетико»), Лионель Месси («Барселона»)

Евро-2016 рамзий жамоага маълум маънода таъсир қилди. Дейлик, Леонардо Бонуччи ва Жанлуижи Буффон рўйхатга тушишди. Ҳимояга марказий позицияда ўйнайдиган 4 нафар футболчининг қўйилгани ғалати. Шунинг натижасида Серхио Рамос ва Жером Боатенг қанотларга «жўнатилди». Қитъа чемпионати финалчиси - Франция термасидан эса биргина Антуан Гризманн танланди.

2017 йил жамоаси

Жанлуижи Буффон («Ювентус») - Марсело («Реал»), Жоржо Кьеллини («Ювентус»), Серхио Рамос («Реал»), Дани Алвеш («ПСЖ») - Эден Азар («Челси»), Лука Модрич («Реал»), Тони Кроос («Реал»), Кевин де Брюйне («Манчестер Сити») - Криштиану Роналду («Реал»), Лионель Месси («Барселона»)

Овоз бериш жараёнида 9 миллион киши иштирок этди. Таниш манзара - ЧЛ ғолиби «Реал»дан яна 5 нафар вакил. Бельгия футболи Кевин де Брюйне ва Эден Азар мисолида кўзга ташланди. «Барселона»нинг рамзий жамоа таркибига қўшган ҳиссаси кескин пасайди. Яъни биргина Лионель Месси кирди. Хуллас, сон эмас, сифат тантанаси...

2018 йил жамоаси

Марк-Андре тер Штеген («Барселона») - Марсело («Реал»), Рафаэль Варан («Реал»), Виржиль ван Дейк («Ливерпуль»), Серхио Рамос («Реал») - Эден Азар («Челси»), Н~Голо Канте («Челси»), Лука Модрич («Реал») - Криштиану Роналду («Ювентус»), Лионель Месси («Барселона»), Килиан Мбаппе («ПСЖ»)

Марк-Андре Тер Штеген муносиб амплуадошларини ортда қолдирди. Серхио Рамос ўнг тарафга сурилди, Виржиль ван Дейк ва Рафаэль Варан ўз жойларида, худди Марсело каби. Яна мундиалнинг 4 нафар қаҳрамони бор - Н~Голе Канте, Эден Азар, Лука Модрич, Килиан Мбаппе.

Йилнинг рамзий терма жамоасига энг кўп тушган футболчилар

1). 13 марта: Криштиану Роналду

2). 10 марта: Лионель Месси

3). 8 марта: Серхио Рамос

4). 6 марта: Икер Касильяс, Карлес Пу-йоль, Андрес Иньеста

5). 5 марта: Жанлуижи Буффон, Дани Алвеш, Тьерри Анри, Филипп Лам, Жерар Пике, Хави

6). 4 марта: Алессандро Неста, Жон Терри, Златан Ибрагимович

Йилнинг рамзий жамоасидаги

улушдорлик (клублар бўйича)

1). 49та ўрин - «Реал»

2). 47та ўрин - «Барселона»

3). 20та ўрин - «Бавария»

4). 18та ўрин - «Ювентус», «Милан»

5). 11та ўрин - «Челси»

6). 10та ўрин -  «МЮ», «Арсенал»

Йилнинг рамзий жамоасидаги

улушдорлик (мамлакатлар бўйича)

1). 42та ўрин - Испания

2). 24та ўрин - Бразилия

3). 20та ўрин - Франция

4). 17та ўрин - Португалия, Германия

А.АҲМЕДОВ тайёрлади.