Бу мавсумдаги «Ливерпуль» - росмана машина. Бундан атиги 1-2 ой муқаддам АПЛ ғолиблигига асосий даъвогар сифатида фақат «Манчестер Сити» эътироф этилган бўлса-да, эндиликда фаворит - Юрген Клопп жамоаси. Аслида «қизиллар»нинг олдинги чизиғи ўтган мавсумда ҳам сермаҳсул ўйин кўрсатган, Муҳаммад Салоҳ хоҳлаган пайтида исталган жамоа дарвозабонини доғда қолдира олганди. Аммо ван Дейк каби ишончли қалқони бўлмаган ва ношуд дарвозабонлар билан ҳимояланган жамоага ҳужумдаги самаралардан баҳраманд бўлиш насиб этмаганди.
Дарҳақиқат, Миньоле ва Кариус топ-клубнинг 1-рақамига лойиқ эмасдилар. Лорис Кариуснинг ЕЧЛ финалидаги қўшалоқ «қовуни» («Реал» - 1:3) мухлислар хотирасидан мустаҳкам жой олганига шубҳа йўқ. Ана шу омадсизлик мутасаддиларни дарвоза чизиғига муносиб қўриқчи топишга ундагани аниқ: «Рома»нинг бразилиялик кипери Алиссон учун 67 млн. фунт сарфланди, Кариус эса «Бешиктош»га «сургун» қилинди. Алиссон «қизиллар» либосидаги илк иштирокидан бошлаб 67 «лимон»ни оқлашга киришди. АПЛнинг ортда қолган 22 турида Алиссон 12 учрашувни «қуруқ» якунлади, 10та ўйинда 10 марта ўз дарвозасидан тўп олиб чиқди. Бу нафақат АПЛ, балки топ-чемпионатлар ичида ҳам энг юксак кўрсаткичдир! Албатта, ютуқда «мудофаа вазири» Виржиль ван Дейк етакчилигидаги «аскарлар» ҳиссаси салмоқли. Бироқ моҳир дарвозабон бўлмаса, ҳеч қайси жамоа шунча ўйинни «қуруқ» ўтказа олмайди.
Тўғри, бразилиялик посбоннинг камчиликлардан холи эканига кафолат бера олмаймиз. Ахир у ҳам миллиардлаб кишилардан бири. Буни Алиссоннинг ўзи ҳам инкор этмайди. Гарчи у оёқларида тўпни аъло даражада бошқариб, аниқ узатмалар бўйича касбдошлари орасида етакчилик қилаётган бўлсада, «қовун» туширган ҳоллари оз бўлсада учраб туради. 4-тур доирасидаги «Лестер»га қарши беллашувда посбон циркчиларга хос финтни намойиш этиб, якунда рақиб ўйинчисига гол совға қилганди. «Ҳа, мен тез-тез қалтис ишларга қўл уриб тураман. Юрагида муаммолари бор мухлисларга эҳтиёткорликни маслаҳат бераман», деганди Алиссон Англиядаги фаолияти арафасида. Ўшанда ливерпуллик ишқибозлар Миньоле ва Кариус «томоша»ларини эслаб, қўрқиб кетишганди. Лекин тез орада уларда Алиссонга ишонч пайдо бўлди.
Хуллас, «тулкилар»га гол ҳадя этган «цирк» такрорланмади. Бразилиялик посбоннинг дунёда тенгсиз эканлигини статистик кўрсаткичлар ҳам тасдиқлайди. Бартараф этилган зарбалар фоизи бўйича Алиссон билан баҳслаша оладиган дарвозабон Европада йўқ. Лотин Америкаси футболининг савияси пасайиб кетганини ҳисобга олсак, Алиссонни дунёда тенгсиз дейиш муболаға бўлмайди. Алиссоннинг устунлигини етакчи чемпионатлар жамоаларининг дарвозабонлари рейтинги ҳам тасдиқлади. Одатда, зарбаларни бартараф этиш борасида «митти» жамоалар посбонлари ғолиб чиқишади. Чунки улар қўриқлаётган дарвоза томон ҳужумлар кўп уюштирилади. Бироқ бу гал номдор жамоалар вакиллари - «Атлетико»дан Ян Облак ва «Ливерпуль» посбони Алиссон барчадан ўзиб кетишди. Эътиборлиси, Алиссон Облакни ҳам сезиларли даражада ортда қолдирди.
Энди айтинг-чи, бразилиялик дарвозабоннинг энг зўр эканлигини исботлаш учун яна қанақа далил керак?
У.УМАРОВ тайёрлади.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20