Қайднома

Қидирув

Андрей Канчельскис: «Моуриньо вақтида кетди, аммо у барбир қайтади»

Андрей Канчельскис: «Моуриньо вақтида кетди, аммо у барбир қайтади»

  31.01.2019 13:39
  0
  417
Андрей Канчельскис: «Моуриньо вақтида кетди, аммо у барбир қайтади»

Ўтган чоршанба куни Россия футболидаги энг омадли легионерлардан бири, 90-йиллардаги «Манчестер Юнайтед»нинг етакчи ярим ҳимоячиси Адрей Канчельскис ўзининг 50 ёшлик таваллуд айёмини нишонлади.

Шу боис, «ССФ» сайти журналистлари дарров «Навбаҳор» устози билан алоқага чиқиб, уни табриклаш асносида ўзларини қизиқтирган баъзи саволларга жавоб олишди.

МАНЧЕСТЕР ВА ЛИВЕРПУЛДАН БЎЛГАН ҚЎНҒИРОҚ

- Авваламбор, самимий қутловларимизни қабул қилиб олинг! Айтингчи, 50 - бу сизга нимани англатади?

- Очиғини айтсам, бу рақамнинг мен учун ҳеч қандай ўзгача хусусияти йўқ. Юбилейга одатий бир кундек ёндашиб, камтаргина нишонлаяпман. Бунинг устига, ҳозир «Навбаҳор» клуби билан Қримдаги йиғиндаман ва юбилей ҳақида ўйлашга ортиқча вақтнинг ўзи ҳам йўқ. Мия эса фақат машғулотлар, тез орада бошланадиган Ўзбекистон чемпионати ҳақидаги фикрлар билан банд.

- «Навбаҳор» раҳбариятидагилар сизни табриклашдими?

- Албатта! Қолаверса, каттакон торт олиб келишди. Жамоамиз тасвирчиси эса бу кичик тадбирни суратга олиб, мухлисларга тортиқ қилди. Уларга эътибор учун катта раҳмат, дейман.

- Яна кимлар қўнғироқ қилишди?

- «Манчестер Юнайтед»дан табрикнома олдим. Шунингдек, «Эвертон»дагилар ҳам каминани эслашди. Бир-иккита россиялик журналистлар, агентлар қўнғироқ қилишди. Умуман, телефонимга жуда кўплаб бегона рақамлардан хабарлар келибди. Аммо афсуски, машғулотларга телефонимни олиб кетмаганим учун уларнинг аксариятига ўз вақтида жавоб қайтара олмадим.

- Мураббийлик фаолиятингизда танаффус юзага келганди. Айтинг­чи, «Навбаҳор»дагилар сизни қандай топишди?

- Мени қандай топишганига унчалик эътибор қаратмади-у, аммо энг муҳими, Наманган клуби ўз вақтида жуда машҳур бўлган. Мухлислар-чи?! Бунақасини фақат орзу қилиш мумкин: улар қайноқ, жўшқин, мағлубиятни асло ёқтиришмайди. Уй ўйинларимиз ҳар гал 20-25 минг мухлис гувоҳлигида ўтади. Бу эса табиийки, бизни чексиз қувонтиради. Ишқибозлар ҳатто, футболчиларнинг машғулотларини ҳам катта эътибор билан томоша қилишади. Шунақа пайтларда беихтиёр «Фиорентина»ни эслайман. Чунончи, Италияда ҳам мухлислар клуб билан бирга яшашарди. Биласизми, бир сафар италиялик тиффозилар кетма-кет мағлубиятлардан сўнг биз билан очиқчасига гаплашиб олиш учун клуб базасига келишганди. Ўшанда Штефан Эффенберг саросимада уйига қочиб қолган. Бечора қаттиқ қўрқиб кетганди. Умид қиламанки, Наманганда мухлисларга ёқадиган ўйин кўрсатамиз ва аҳвол бу даражага етиб бормайди, ҳеч қачон.

«НАВБАҲОР» ВА УНИНГ РЕЖАЛАРИ

- «Навбаҳор» олдига қандай вазифа қўйилган?

- Ўтган чемпионатда биз учинчи ўринни эгаллагандик. Демак, бу йил энг камида кумуш медалларни қўлга киритишимиз лозим. Бу эса клубга қитъа ареналари сари йўл очади. Шунингдек, Ўзбекистон Кубоги баҳсларида ҳам энг юксак натижа учун курашамиз.

- Жамоанинг баъзи ўйинчилари Осиё кубогида иштирок этишди. Ўзбекистон терма жамоаси эса турнирда муносиб қатнашиб, фақат пенальтилар сериясидагина Австралияга мағлуб бўлишди.

- Ҳа, чиндан ҳам амирликларга борган таркибда бизнинг дарвозабонимиз ва битта ярим ҳимоячимиз бор эди. Осиё чемпионати улар учун катта тажриба бўлиши аниқ. Тез орада яна учун нафар футболчимиз Олимпия терма жамоаси йиғинига йўл олади. Зеро йигитчалар, чиндан-да, иқтидорли. Таркибимизда яна тўрт нафар легионер ҳам бор. Бундан ортиғига лимит йўл қўймайди.

- Машғулотлар Евпаторияда бўл­яптими?

- Худди шундай. Дастлабки йиғинни Наманганда ўтказиб, катта ҳажмдаги жисмоний юкламаларни деярли якунлаб олгандик. Бу ерда эса бошқа йўналишларда ишлаяпмиз. Бир нечта ўртоқлик ўйинлари ўтказиб, қисқа танаффус қиламизда, сўнг Туркияга жўнаймиз. Хуллас, ҳаммаси режа асосида кетяпти.

- Ўзи Қрим варианти қандай пайдо бўлди?

- Нега энди бўлмаслиги керак эди? Бу ердаги машғулотлар базаси жуда ажойиб. Боз устига, дўстларим ҳам мени бу ерга бир неча бор таклиф қилишганди. Майли, буниси муҳим эмас. Асосийси - керакли манзиллар бир-бирига жуда яқин, майдонлар ҳолати зўр, ҳаво ҳам илиқ - 10 даража атрофида. Дарвоқе, молиявий жиҳатдан ҳам Қрим варианти жуда қулай.

- Қрим атрофидаги можаролар сабаб УЕФА жазосига йўлиқишдан қўрқмайсизми?

- Биз бу масалани сафардан аввал яхшилаб ўйлаб кўрганмиз. Ахир биз бу ерда ҳеч қандай расмий турнирда қатнашмаймиз. Шундай экан, УЕФА санкцияларидан қўрқишга ҳожат йўқ.

 

КОКОРИННИ ЖАЗОЛАШ

- Россия футболига бефарқ эмаслигингиз аниқ. Айни пайтда «Зенит» Дохада йиғин ўтказяпти. Севимли футболчингиз Александр Кокорин эса Павел Мамаев билан қамоқда ўтирибди...

- Шахсий фикримни айтаман: Кокорин қамоқда ўтириши эмас, футбол ўйнаши керак. Ихтиёр менда бўлганида, иккала футболчига каттакон, дейлик, икки миллион евродан жарима солиб, пулларни болалар уйлари ёки интернатларга ўтказиб берардим. Уларни ҳибсга олишдан кимга наф тегади?! Катта жарима эса йигитларни кўзини очиб қўярди. Ҳа, Кокорин ва Мамаевлар катта хато қилишди, аммо унутмаслик керакки, камчилик ҳаммамизда ҳам бор. Энг ёмони шуки, улар қамоқда қанча кўп ўтиришса, тикланиш жараёни шунчалик ортга сурилаверади.

- Кокориннинг «қўйлар подаси» ҳақида айтган гапларини эшитдингизми?

- Э, қўйсангизчи... Ахир бу эҳтиросга берилган пайтда айтилган сўзлар-ку... Қолаверса, Кокорин бутун рус халқини назарда тутмаган. Афтидан, у вазиятни бўрттириб кўрсатганлар ҳақида гапирган. Бизникилар «пашшадан фил ясаш»га жуда уста бўлиб кетишган...

СУЛЬШЕР ВА МАҚТОВ

- Ўз вақтида «МЮ» учун кўплаб голлар уриб, икки марта АПЛ чемпиони бўлгансиз, турли совринлар ютгансиз. Хўш, клуб тарихига алоқадор инсон сифатида Жозе Моуриньонинг кетишига нима дейсиз?

- Моуриньо озроқ дам олмаса бўлмасди. Чунки у жуда ҳиссиётларга берилувчан шахс. Бахтга қарши, сўнгги пайтларда унинг ишлари юришмай қолди. Бир муаммо ортидан иккинчиси чиқиб келавергани сабабли, аҳвол ўнгланмас даражага етиб борди. Менимча, қисқа танаффусдан кейин у яна мураббийликка қайтади. «МЮ» билан хайрлашув эса ўз вақтида юз берди.

- «Қизил иблислар»нинг янги мураббийи ҳақида фикрингиз қандай?

- Тўғриси, мен Сульшер билан таниш эмасман. Дейлик, норвегиялик клубга келганида, мен бошқа жамоа­да эдим. Ҳа, ҳозирги «МЮ» Сульшер билан кетма-кет ғалаба қозоняпти. Ўйин сифати ҳам чакки эмас. Аммо хулоса чиқаришга ҳали эрта. Сульшернинг асосий ютуғи шундаки, у жамоадан оғир руҳий босимни олиб ташлади. Моуриньо вақтида «қотиб қолган» Погба ва бош­қа юлдузларни қайтадан кашф қилмоқда. Бироқ «МЮ»нинг асосий ўйинлари ҳали олдинда. Агар клуб ЕЧЛдан эрта чиқиб кетса ёхуд бу турнирга АПЛ орқали йўл ололмаса, ҳозирги муваффақиятлар тезда унутилиб кетади.

- Лекин раҳбарият «маҳаллийлаштирилган» хорижлик мутахассисни танлаб, тўғри йўл тутди...

- «Маҳаллийлаштирилган» деганингиз нимаси?! Сульшер - норвегиялик. Бу сизга Брайан Робсон, Стив Брюс ёки Марк Хьюз эмас. Аммо «МЮ» ишқибозлари чиндан ҳам уни ёқтиришади. Клубда у аввалги обрўсидан фойдаланмоқда ва асосийси, бу наф келтиряпти. Хуллас, айнан унинг мураббийликка таклиф этилишида ортиқча таваккал йўқ эди.

ГЛАЗГО ВА ФЛОРЕНЦИЯДАГИ ДЎСТЛАР

- 14 ёшли Пиняев ҳақида эшитдингизми? Россиялик бу йигитча тез орада «МЮ» академиясига қабул қилиниши кутилмоқда.

- Бундан жуда хурсандман. Зеро «МЮ» академияси - Европадаги энг яхшиларидан бири. Ҳар қандай ёш футболчи учун орзулар мамлакати.

- «МЮ»дан ташқари бошқа собиқ клубларингиз билан ҳам алоқадамисиз?

- Албатта, лекин имкониятга қараб. Дейлик, яқинда Глазгога сафар қилиб, ўйинни томоша қилдим, «Рейнджерс»даги оғайниларим билан суҳбатлашдим. Флоренцияга эса охирги марта ўтган йили боргандим.

- Европада сизга мураббийликни таклиф қилишмаяптими?

- Очиғи, Шотландиянинг бир клубидан таклиф олгандим. Бироқ келиша олмадик. Албатта, бу «Рейнджерс» эмасди...

Исроил РАҲИМОВ тайёрлади


Манба: www.interfutbol.uz


InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.

Оммабоп мақолалар

Хабарингиз борми

Чемпионатлар

тўлиқ жадвал »
  • ЎФФ ва ПФЛнинг янги раҳбарияти олиб бораётган ислоҳотларга қандай баҳо берасиз?


«ИнтерФУТБОЛ» газетасининг расмий сайти.
Гувоҳнома № 0149. Берилган санаси: 25.06.2008 Муассис: «ИНТЕРФУТБОЛМЕДИА» МЧЖ.
Бош муҳаррир: Аҳадхон АБДУҲАМИТОВ.
Таҳририят манзили: 160400, Косонсой шаҳри,Чорбоғ кўчаси, 17-уй.
Электрон манзил: info@interfutbol.uz