Ўтган йили АГМК жамоаси сафида Ўзбекистон кубогини қўлга киритган Лутфулла Тўраев янги мавсумни «Бунёдкор»да бошлайди. Бошқача айтсак, тажрибали ярим ҳимоячи собиқ клубига қайтди ва «қалдирғочлар» билан расман шартнома тузди. Маълумки, айни пайт «Бунёдкор»ни мавсумга Вадим Абрамов тайёрламоқда, бунгача клубни бошқарган Миржалол Қосимов эса аксинча, АГМК устози сифатида ОЧЛ «плей-офф» учрашувига ҳозирланмоқда. Миржалол Қўшоқович Олмалиққа борганидан сўнг кутилганидек, таркибда сезиларли ўзгаришларни амалга оширди. У хусусан, Тўраев хизматига эҳтиёж сезмади. Шу тариқа ярим ҳимоячи яна собиқ клуби сафига қўшилди. Хўш, Лутфулла янги мавсумдан нималар кутмоқда?
- «Бунёдкор» машғулотларида иштирок этаётганингиздан хабаримиз бор эди. Мана, энди шартнома расмийлаштирилди...
- Ҳа, чиндан ҳам, «Бунёдкор» таклиф этган келишув остига имзо чекдим. Битим бир йилга мўлжалланди. Яна собиқ жамоам сафида эканлигимдан хурсандман, албатта.
- Қизиқ, АГМКдан ўз хоҳишингиз билан кетдингизми ёки Миржалол Қосимов Олмалиққа бош мураббий сифатида борганидан кейин шундай қарорга келдингиз?
- Очиғини айтсам, АГМК билан шартномам якунига етган эди. Миржалол ака Олмалиқда иш бошлагач, бафуржа гаплашиб олдик ва якунда шартнома муддатини узайтирмасликка келишдик. Яъни бу масала икки томонлама розилик билан ҳал этилди.
- Нима деб ўйлайсиз, «Бунёдкор» янги мавсумда етакчиларга муносиб қаршилик кўрсата оладими?
- Албатта, нега кўрсатолмас экан?
- Лекин жамоада сезиларли ўзгаришлар бор. Деярли янгиланган таркиб юқори вазифаларни бажаришга қодирмикан?
- Тўғри, кўплаб етакчи футболчилар бошқа клубларга ўтиб кетишди. Бунинг натижасида жамоа анчагина кучсизлани ҳам рост. Лекин шу билан бир қаторда ўтган йили бошқа клубларда ижара асосида ўйнаган футболчилар «Бунёдкор»га қайтишди. Бундан ташқари, ҳали селекция ишлари давом этмоқда. Демак, таркибни кучайтира оладиган футболчилар сафимиздан жой олишлари мумкин.
- Клубнинг молиявий ҳолати ҳақида нима дея оласиз? Вазият ижобий томонга ўзгарганми?
- Тўғриси, ўтган йили жамоанинг молиявий аҳволи қандай бўлганини билмайман. Ҳозир эса вазият анча мўътадил, ҳаммаси рисоладагидек.
- Бир ойча аввал «Бунёдкор»нинг Суперлигадан олиб ташланиши ҳақида турли миш-мишлар урчиганди...
- Ҳа, шу мазмундаги турли гап-сўзларни эшитдим. Матбуотда ҳам ёзишди. Билмадим, «Бунёдкор»ни қанақасига ёпиб юбориш мумкин? Ҳалигача буни ақлимга сиғдиролмаяпман.
- Вадим Абрамов билан клубдаги фаолиятингиз юзасидан гаплашдингизми?
- Албатта. Бу борада ҳаммаси жойида. Жамоадан шунча футболчи кетганига қарамай, Вадим Карленович «Бунёдкор»ни рақобатбардош клубга айлантириш ниятида. Умуман олганда, бу мураббий билан ишлаш мароқли.
- Собиқ клубингиз АГМК ОЧЛ саралашида иштирок этади. «Истиқлол»га қарши кечадиган ўйиндан нималар кутяпсиз?
- Осон бўлмайди, бу аниқ. Лекин учрашувнинг Олмалиқда ўтказилишини инобатга олсак, АГМК кичик устунликка эга. Менимча, Миржалол Қосимов жамоаси бу босқичдан бемалол ўтади. Фурсатдан фойдаланиб, АГМКга омад тилайман. Жамоа хорижда йиғин ва ўртоқлик учрашувлари ўтказиб қайтди. Таркиб сезиларли даражада кучайтирилди. Ҳозирги таркиб билан катта вазифаларни бажарса бўлади.
- Яна бир жамоамиз - «Пахтакор» гуруҳ босқичига чиқа олармикан?
- Ҳозирги кунда «Пахтакор» таркиб бўйича Ўзбекистоннинг энг кучли клуби бўлса керак. Лекин бошқа томондан, шу кучли футболчиларни ўйната билиш ҳам лозим. Шота Арвеладзе бошчилигидаги мураббийлар штаби жамоавий ўйинни шакллантира олса, «Пахтакор» ОЧЛ гуруҳ босқичига чиқиш вазифасини муаммосиз бажаради. Шахсан мен бунга ишонаман.
- Суперлигада клублар сонини ошириш ёки қисқартириш ҳақида гап-сўзлар пайдо бўлди. Бу борада шахсий фикрингиз қандай?
- Тўғриси, бу ҳақда аниқ маълумотлар эшитмадим. Шу боис дангал фикр билдиришдан тийиламан.
- Азиз Турғунбоев можаросини эшитгандирсиз...
- Ҳа, билдим. Ўзбек футболи учун яхши бўлмади.
- Куни кеча Испания кубоги ярим финалида «Барселона» - «Реал» учрашуви бўлиб ўтди. Ўйинни кўрдингизми?
- Ҳа, кўрдим. Дунё футбол мухлислари иккига бўлиб қўядиган тўқнашув. Лекин аввалги йиллардаги «Эль-класико» шиддати сезилгани йўқ. Ҳар ҳолда, бу жамоаларнинг аввалги тўқнашувлари бошқача бўларди.
- «Класико»га Роналду етишмаяптими, шундайми?
- Худди шундай. Роналду ва Месси қарама-қаршилиги «Эль-класико»га қизиқишни янада оширарди. Криштиану «Ювентус»га ўтиб кетганидан кейин «Реал» ва «Барселона» жамоалари ўртасидаги учрашувларга эътибор бироз пасайди. Ўйинларда жозиба ҳам йўқолди. Бу шахсий фикрим.
Камолиддин АЛИМОВ суҳбатлашди.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20