12 йилдан буён Мадриднинг «Реал» клубида фаолият олиб бораётган Марсело Испания матбуотига интервью берди. Суҳбат чоғида у Криштиану Роналду, «Ювентус»га ўтиши ҳақидаги гап-сўзлар борасида фикр билдирди.

Криштиану ҳақида

- Нафақат Криштиану, балки унинг оиласи ва қаллиғи билан ҳам муносабатларим яхши. Биз 9 йил бирга тўп сурдик, кетишидан афсусланишим одатий ҳол. Кикони ҳам соғинаман, у билан кийиниш хонасида бирга ўтирардик. Ҳозир Бэйл билан бирга ўтираман. Лекин у инглиз тилида мулоқот қилади. Унга «Hello, hi, good wine» деб қўяман.

Роналду кетишини айтгани ҳақида

- Чемпионлар Лигаси финалидан олдинги машғулот пайтида у ёнимга келиб «Жамоадан кетаман», деганди.

«Ювентус» ҳақида

- «Ювентус» буюк тарихга эга ажойиб клуб. Лекин менинг «Реал» билан шартномам бор ва бу ер менга ёқади.

Совринлар учун кураш ҳақида

- Учта турнирда кураш олиб бор­япмиз. Энг қийини - Ла Лига. Лекин биз Чемпионлар Лигасини ажойиб тарзда бошладик ва Қирол кубоги финалига чиқиш имкониятга эгамиз.

Ортиқча вазни ҳақида

- Буни хабар сифатида қабул қилмайман. Чунки ҳаммаси ёлғон. Менимча, журналистлар футболчиларнинг асабига тегиш учун шундай нарсаларни ўйлаб топишади. Ахир ошиқча 7 кило билан ўйнашнинг иложи йўқ-ку.

Ҳозирги ҳолати ҳақида

- Бахтлиман ва ўзимга бўлган ишонч ортди. Футболда, клубда қийин даврни бошдан кечирдим. Лекин ишлашда давом этдим ва жамоадошларимга ёрдам бердим. Ҳозир эса ўзимни яхши ҳис қиляпман. Жисмоний ҳолатим ҳам ажойиб.

Ўзининг даражаси ҳақида

- Даражамни ҳамиша бир хил ушлаб туришим осон эмас. Агар бутун фаолиятимга эътибор қаратсангиз, ҳозир даражам одатдагидан бироз пастроқ эканлигига гувоҳ бўласиз. Чунки жорий мавсум 2 ой ичида 3 марта жароҳат олдим. Аввалги йиллардаги формамни тиклаб олиш учун эса кўпроқ майдонга тушишим керак.

Танқидлар ҳақида

- Жамоада 12 йилдан буён фаолият олиб бораётган бўлсам, бирор марта танқидлар борасида муаммоларга йўлиқмаганман. Чунки ўйинимни қачон кучайтиришим ва нима қилишим кераклигини яхши биламан. Менга тан­қидлар таъсир ўтказмайди. Одамлар истаганларини гапиришлари, ёлғон хабарларни тарқатишлари мумкин. Бироқ мен ҳамиша бундай хабарларни ўқиганда кулиб қўяман. Чунки бу - футбол.

Танқидларнинг таъсири ҳақида

- Юқорида айтганимдек, танқидлар менга таъсир ўтказмайди. Лекин оиламга... Мисол учун, бир-иккита яхши ўйиндан кейин ҳам менга нисбатан танқидлар ёмғирини ёғдириб юборишди. Аслида, бундай нарсалар учун бошқаларни умуман ёмонлашмайди. 15 йилдан буён профессионал футболдаман, демакки, бундай нарсаларга ўрганиб кетганман.

Ҳимоядаги муаммолар ҳақида

- «Реал»да фаолиятимни бошлабманки, бир хил гап эшитаман: ҳимояланишни билмаган юта олмайди. Лекин бу мавзуни ҳамиша кўтаришади. Ўтган 12 йил ичида «Реал»нинг ўйин услуби бир неча бор алмашди. Мен эса ҳамиша мослашганман.

Ҳимоядаги роли ҳақида

- Кўпчиликнинг фикрича, ҳимояда Рамос ёки Варандан яхши ўйнашим керак. Лекин бунинг иложи йўқ. Мен латералман. Тўғри, ҳимояланишим керак. Аммо менинг устун тарафим - ҳужум. Ўз хатоларимни кўраман ва уларни тўғрилашга ҳаракат қиламан. Бугун ғалаба қозонасиз, эртага мағлуб бўласиз. Футболда ҳар қандай натижа қайд этилиши мумкин.

Мотивация ҳақида

- Ҳеч қачон ўзимни асосий таркибнинг доимий ўйинчиси ҳисобламаганман. Ўз позициямдаги жойимни эгаллаш учун ҳамиша ишлайман. Ҳар куни машғулот ўтказиш ва футбол ўйнаш учун уйғонаман. Олдинлари бунданда ёмон кунларим бўлган. Худди 2014 йилги ЕЧЛ финалидаги каби. Ўшанда асосий таркибга кирмаганим учун жуда жаҳлим чиққанди.

Ўз ўйини ҳақида

- Жамоага бу йил кўп нарса беришим мумкинми? Нафақат бу йил, балки кейинги ва ундан кейинги мавсумларда ҳам фойда келтиришга тайёрман. Ўзимга бўлган ишонч ортгани сари ишлар юришаверади. Позициямни қачон алмаштираман? Агар керак бўлса, шундай қиламан. Лекин ҳамиша чап қанот латерали бўлиб қолавераман.

Зиданнинг кетиши ҳақида

- Ҳайрон бўлгандим. Кўпчилигимиз унинг кетишини хаёлимизга ҳам келтирмагандик. Ҳаммаси яхши кечаётганди. Бироқ унинг сафимизни тарк этиши биз учун шок ҳолат бўлган. Зидан билан муносабатларим ажойиб эди. У ҳамиша ишларим билан қизиқиб турарди. Зизу мен учун жуда муҳим шахс эди. У ҳақиқий профессионал. Уни нафақат совринлари, балки инсонийлик хислатлари учун ҳам ҳурмат қиламан. Зидан мени ҳимоя қиларди, мен эса унинг учун боримни беришга тайёр эдим. Ҳатто жароҳат олсам ҳам охиригача ўйнашга ҳаракат қилардим.

Жамоадаги ёшлар ҳақида

- Жамоадаги ёшлар - бу инқилоб эмас, балки тажриба билан уйғунлашувдир. Совринларни қўлга киритиш учун улар ёшлик қилишмайди. Биз ҳар қандай рақибни мағлуб этишимиз мумкин ва янада кўп совринларни қўлга киритиш истагидамиз. Айнан шу жиҳат кучимизга куч қўшмоқда.

Винисиус ҳақида

- Ҳамиша кулиб юради, унга қўлимдан келганича ёрдам беряпман. Гарчи эндигина 18 ёшга кирган бўлсада, анча ақлли. Боз устига, босимга бардош беряпти.

Клубдан кетиши билан боғлиқ миш-мишлар ҳақида

- «Реал»дан кетиш? Бу ҳақда умуман ўйламаганман. Бошқадан кўра ўзимга кўпроқ ишонаман. Шундай экан, ҳеч қаерга кетиш ниятим йўқ. Агар қачондир «Реал»дагилар мени кўришни исташмаса, шунда кетишим мумкин. Аммо ўша кун келмаслигини истайман. «Ювентус»дан таклиф тушганми? «Юве»да Недвед ўйнаган пайтларида жамоа ўйинларини кузатиб борардим. Недвед билан ҳатто футболка алмашганман. Бироқ ҳозир менинг «Реал» билан шартномам бор ва Мадридда қолишимдан хурсандман. Трансфер ҳақидаги миш-мишлар қаердан пайдо бўлаётганини билмайман. Қандайдир музокаралар бўлганида, мен билардим.

А.ҲАМИДОВ тайёрлади.