Осиё Чемпионлар Лигаси-2019 иккинчи саралаш босқичи доирасидаги АГМК - «Истиқлол» учрашувида олмалиқликлар юксак ирода кўрсатиб, тарихий ғалаба, шу билан бирга, кейинги босқич йўлланмасини қўлга киритишди. Ҳа, Миржалол Қосимов бошчилигидаги «кончилар»нинг халқаро миқёсдаги илк ўйинлари шундай муваффақиятли якунланди. Бироқ АГМКни олдинда янада жиддийроқ синов - Саудия Арабистонининг «Ал-Наср» клубига қарши сафар учрашуви кутиб турибди. Мазкур баҳсда «Истиқлол»га қарши ўйинда йўл қўйилган хатолар такрорланишига йўл қўймаслик даркор, зеро рақиб анойилардан эмас. АГМКнинг 4:2 ҳисобидаги ғалабаси билан якунланган учрашувда майдон эгаларининг биринчи голига жамоа ярим ҳимоячиси Дилшод Жўраев муаллифлик қилди. Ўйиндан сўнг ушбу иқтидорли футболчи билан боғланиб, суҳбат қурдик. Мавриди келганда айтиб ўтиш жоизки, бу учрашувда Жўраев ўзининг халқаро майдондаги илк голини урди.
- Авваламбор, қўлга киритилган муҳим ғалаба билан табриклайман. Ўйин хусусида фикрларингиз...
- Раҳмат. Учрашув қийин кечишини олдиндан тахмин қилгандик. Зеро, «Истиқлол» ҳурматга лойиқ жамоа. Мазкур ўйин биз учун ижобий якун топганидан хурсандмиз. Стадионга ташриф буюрган ишқибозларга ҳам алоҳида миннатдорчилигимни билдираман.
- АГМК клуби ва бош мураббий сиз учун бегона эмас. Шуни инобатга олсак, жамоага киришиб кетишингиз нисбатан осонроқ бўлгандир?
- Мослашиш жараёни қийин кечмади. Миржалол Қўшоқович катта футболдаги устозим ҳисобланади. Қолаверса, таркибда аввалги жамоаларда бирга ўйнаган кўплаб ўйинчилар борлиги сабабли адаптация жараёни менга қийинчилик туғдирмади.
- Иккинчи бўлимда АГМК футболчилари ҳаводаги курашларда аъло даражада ҳаракат қилишди. Бу борада машғулотларда алоҳида ишланганмиди?
- Дарҳақиқат, ўйинларга тайёрланиш пайти стандарт вазиятлар ва тўпни юқоридан етказиб бериш устида кўп ишладик ва изланишлар ўз самарасини берди. Режа ва тактикага тўхталадиган бўлсам, бу мураббийимизнинг меҳнати маҳсулидир. Биздан талаб қилинадиган нарса - майдонда биринчи рақам остида тўп суриш.
- Жасур Ҳакимовнинг майдонга туширилиши ўйинни тубдан ўзгартириб юборди. Бунга аввалдан тайёргарлик кўрганмидинглар?
- Бу олдиндан ўйланган режа эмасди. Барчаси ўйин давомида юз берди. Тактикани ҳам ўша вазиятдан келиб чиқиб ўзгартирдик. Ҳисоб 1:2 бўлиб турган вақтда мураббий тажрибасидан келиб чиқиб режа тузди ва уни амалга ошириб, ғалаба қозонишимизга сабабчи бўлди.
- «Истиқлол» клуби ҳақида нима дея оласиз?
- Рақибда ҳам худди биздек ҳолат кузатилди. Мураббийи янги, ўйинчилар унинг услубига тўлиқ мослашиб улгурмаган. Лекин мазкур баҳсда бизда хоҳиш юқорироқ эди. «Истиқлол» таркибидаги аксар футболчилар анчадан буён бирга тўп суришмоқда, ўзаро бир-бирларини яхши тушуниб ўйнашади. АГМКга янги келган футболчи ва легионерлар ҳам ички муҳит, ўйин услубига мослашиб олишса, биз янада кучли жамоага айланамиз.
- Мураббийлар учрашувдан олдин қандай кўрсатмалар беришди?
- Ўйинни биз бошқаришимиз лозимлиги, майдонда боримизни бериб, юқорида айтганимдек, биринчи рақам остида тўп суришимиз кераклигини уқтиришди. Ўз навбатида, имкон қадар рақибни тўпсиз қолдиришимиз талаб этилди.
- Мавсумдаги дастлабки ўйин бўлгани учун ҳаяжон сезилгандир?
- Янги жамоа, ўзгарган таркиб ва биринчи муҳим ўйин бўлгани сабабли, албатта, бироз ҳаяжон кузатилди. Голга келадиган бўлсак, бу - футбол, унда ҳар нарса бўлиши мумкин. Илк дақиқалардан эътиборни жамлай олмадик, мувозанатни йўқотдик ва бунинг оқибатида жазоландик. Ўйиндаги голларни ҳам ўз хатоларимиз эвазига ўтказиб юбордик. Муҳими, «Истиқлол» ҳисобни очганидан кейин вазиятдан тўғри хулоса чиқардик, тўхтаб қолмадик. Босимни кучайтириб, якунда ўзимиз учун керакли натижага эришдик.
- Адашмасам, клуб миқёсида халқаро мусобақалардаги илк голингизни урдингиз. Бу ҳақда билармидингиз?
- Шунақа бўлса керак (кулади).
- Сизнингча, «Истиқлол»га қарши кечган баҳсдан сўнг жамоадошларингиздан қайси бири учрашувнинг энг яхши футболчиси сифатида эътироф этишга лойиқ эди?
- Футбол - фақат бир кишига боғлиқ ўйин эмас. У жамоавий спорт тури. Шундан келиб чиқсак, ғалабага бутун жамоа биргаликда эришди. Барча ўйинчилар ўз ишларини аъло даражада бажаришди. Агар муайян бир футболчини танлаш ҳуқуқи берилса, ҳеч иккиланмай, Жасур Ҳасановни кўрсатардим. Мазкур ғалабада ушбу жамоадошимнинг ҳиссаси катта бўлди, урилган тўртта голга ҳам айнан у ассистентлик қилди. Бунақаси эса ҳар доим ҳам кузатилавермайди.
- Олдинда АГМКни Саудия Арабистонининг «Ал-Наср» клубига қарши янада муҳим ўйин кутиб турибди. Мазкур учрашувда сиз ва жамоадошларингизга омад ва ғалаба ёр бўлишини тилаб қоламиз.
- Раҳмат! Насиб қилса, сафар ўйинида ҳам бор кучимизни сарфлаб, ютуққа эришамиз ва гуруҳ босқичи йўлланмасини қўлга киритиб, шу тариқа мухлисларимизни янада хушнуд этамиз.
Р.S. Ушбу суҳбат ОЧЛ 3-саралаш босқичи учрашувидан олдин уюштирилган эди.
Абдулазиз ИСКАНДАРОВ суҳбатлашди.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20