Ҳа, Жанубий Корея терма жамоаси етакчиси ва «Тоттенхэм»нинг муҳим ўйинчиси бугунги кунда футболдан бошқаси ҳақида бош қотирмаяпти. У ҳаттоки, фаолияти якунига етмасидан олдин уйланмоқчи эмас. Сон Хюн вақтида отасининг қатъий талабига мувофиқ, чап оёғида кўп ишлаган. Мана, қитъадошимиз ЕЧЛ чорак финалининг илк ўйинида «Манчестер Сити» дарвозасига айнан чап оёғи билан гол уриб, чин қаҳрамонга айланди. «Тоттенхэм»нинг узоқ кутилган кўчиб ўтишидан ҳеч ким Сон Хюн Миндек роҳатланмаётган бўлса керак. Корейс футболчиси ЧЛ учрашувидан олдин янги стадионда урилган илк голга муаллифлик қилганди. «Кристал Пэлас»га қарши кечган баҳснинг 56-дақиқасида ҳисобни очиб, «тақачилар»ни олға ундаган Сон Хюн орадан кўп ўтмай, «Манчестер Сити»ни мағлубият кўчасига «етаклади». Ҳужумкорликни хуш кўрувчи Сон Хюн рақиб ҳимоячиси Фабиан Дельфдан ўзиб кетганча дарвозабон Эдерсонга ҳам иш қолдиргани йўқ.
Муҳими, Жанубий Корея футболи фахри ҳозирда фаоллик баробарида маҳсулдорликни ҳам ўз ўрнига қўймоқда. У ўтган сешанба оқшоми жорий мавсумдаги барча турнирлар ҳисобидан «Тоттенхэм» сафида 40-марта майдонга тушиб, 18-голини нишонлади. Таққослаш учун айтсак, Сон Хюн аввалги мавсум 53та учрашувда шунча гол урганди. Ҳа, маҳсулдорлик бобидаги ўсиши чакки эмас. Хўш, Осиё футболи вакили нималар эвазига тобора кучлироқ ўйнамоқда, еврофутболда янги баландликка кўтарилмоқда? Биринчи ва асосий омил - бу ҳужумчининг футболга фанат даражасида содиқлиги. Қолаверса, унинг ўсишида отасининг қатъий талабларию, «Тоттенхэм» бош мураббийи Маурисио Почеттино йўлга қўйган ўйин услуби ўрни ҳам бор, албатта. Оддий айтганда, Сон Хюн Миннинг бугунги ҳаёти гўёки, фақат ва фақат футболдан иборат - ўйинлар, машғулотлар, сафарлар. Унинг ўзи бошқа ишларни ортга суриб келмоқда. Хусусан, уйланишни ҳам.
Сон Хюн Мин март ойида The Guardian нашрига берган интервьюсида болалигида қандай шуғуллангани ҳақида батафсил гапириб берди. Айтишича, у ёшлигидан отаси тузган режа бўйича ҳар куни кўп соатли машғулотларда терга ботиб ишлаган. Дарвоқе, Сон Вун Чоннинг ўзи ҳам вақтида профессионал футбол билан жиддий шуғулланган, аммо жароҳатлар оқибатида 28 ёшидаёқ бутсаларини михга илган. Қисқаси, у ўз орзулари рўёбини ўғиллари мисолида кўришга бел боғлаб, уларни футболга йўналтирган. Бошқача айтганда, Хюн Мин ва унинг акасида келажак борасида бош-қа танловнинг ўзи йўқ эди. Бир куни ака-ука машғулот чоғи бир-бирлари билан уришиб қолишади. Бу ҳолат табиийки, қаттиққўл отага сира ёқмайди: у ҳар икки ўғлини ўзига хос тарзда жазолайди: «Отам машғулотга қўшимча равишда нақ 4 соат давомида тўп билан ишлашимизни буюрди. Очиғи, чамаси 3 соатлик тепишлардан сўнг мадорим қолмади, кўзим қорунғулашиб кетди, спорт залининг поли қизил тусда кўрина бошлади. Эҳ, бутун ҳаётимда ҳеч қачон бу қадар чарчамаганман. Ўзингиз ўйланг, 3 соат давомида тўпни ерга туширмай тепиш осонми? Жуда қийин, лекин мен уддалагандим...», - дея хотирлади Сон Хюн ёшлигини. Кейинчалик корейс йигити яна бир бора шундай ҳолат билан дуч келади. Чунончи, отаси мактаб жамоаси бошқарувини қўлга олган ва унинг таркибида Хюн Мин ҳам ўйнарди. Хуллас, янги мураббий болалардан тўпни 40 дақиқа ҳавода ўйнатишни талаб қилади. Эътиборлиси, бошқа болалар хатога йўл қўйишса, яъни тўпни ерга тушириб юборишса, мураббий озгина койиш билан чекланарди. Аммо шартга кўра, мабодо Хюн Мин тўп назоратини йўқотса, бутун жамоа машқни бошқатдан бошлашга маҳкум этиларди. Ҳа, катта Сон ўғлида шу тариқа масъулият ҳиссини шаклллантирган, унинг чидамлилик хусусиятини оширган.
Қаттиққўл ота шунингдек, ўғли чап оёқда ўйнаш масаласида нўноқроқ эканлигини пайқаб, бу борада махсус машғулотлар дастурини ишлаб чиқади. Унга мувофиқ, Хюн Мин чап оёғида дриблинг, узатма ва айниқса, зарба устида кўп ишлаши ва маълум кўрсаткичларга эришиши лозим эди. Ўша тинимсиз машғулотлар самарасини футболчининг ҳозирги статистикаси яққол кўрсатиб турибди: АПЛдаги 42та голидан 17тасини айнан чап оёғида урди. Асосий факт: Сон Хюн кузда Европанинг энг кучли 5та чемпионатида ўйнайдиганлар орасидан танланган энг яхши «икки оёқли» футболчилар қаторига кирди: «Тоттенхэм»да юлдуз мақомини олишга улгурган корейс йигити жами зарбаларидан 42 фоизини чап оёғида йўллар экан. Диққат қилинг, АПЛда кучсиз оёқ билан зарба бериш бўйича атиги икки футболчи Хюн Миндан олдинда, холос. Булар - Адам Лаллана («Ливерпуль») ва Педро («Челси»). «Кристал Пэлас» ва «Манчестер Сити» дарвозаларига урилган голлар! Ҳар иккиси - чап оёқда йўлланган зарбалар маҳсули! Ажойиб, шунчаки, қойилмақом тасодиф...
Сон Хюн - мутлақ футбол телбаси. «Тоттенхэм»нинг ҳар бир аъзоси билан қўл бериб кўришиш учун нодир «тизим» ўйлаб чиққан йигитни одам-овиликда айблаш қийин. Аммо футбол даврасини ҳисобга олмаганда, у ҳеч ким билан яқин дўстлик ришталарини боғлаган эмас. «Гап шундаки, Кореяда футболга дахли йўқ бирор киши билан гаплашиш имкониятига эга бўлмаганман. Чунки машғулотлардан сира бўшамасдим, - деганди Сон Хюн Германияда «Байер» учун ўйнаган вақти. - «Гамбург» ёшлар жамоаси сафига қўшилганимда ҳам фақат футболчилар билан гаплашардим. Ҳозир бу борада ҳеч нарса ўзгармаган. Хуллас, фақат футболчилар ва миллионлар ўйинига боғлиқ кишиларни танийман, холос. Бошқалар - бегона. Лекин бундан ортиқча ташвишланмайман. Ахир футбол дунёсининг ўзида қизиқарли одамлар етарли...». Сон Хюн минг уринса ҳам, яхши гид (йўл кўрсатувчи) бўлолмасди. «Уйдан машғулотга ва орқага - Леверкузенда бошқа ҳеч нарса кўрган эмасман» - майдонда меҳнаткашлиги билан ажралиб турадиган қитъадошимиз Германиядаги ҳаётини шундай тавсифлаганди. Лондонда эса у уч хонали турар-жойда она-онаси билан бирга яшаяпти.
Қаҳрамонимиз вақтида кореялик поп-юлдузлар - Бан Мин А ва Ю Со-Юн билан танишган, аммо ҳозир маҳбубаси йўқ. Кўринишидан, «Тоттенхэм» футболчиси ҳали узоқ вақт ёлғиз юради, шекилли. Ҳар ҳолда, отаси унга футболчилик фаолияти охирига қадар уйланмасликни тавсия этган. Ҳужумчининг ўзи ҳам бу фикрга тўлиқ қўшилади: «Отам мутлақо ҳақ. Агар эрта уйлансанг, оиланг ўз-ўзидан биринчи ўринга чиқади - турмуш ўртоғинг, фарзандларинг... Футбол эса кейинги масалага айланади. Бу эса менга маъқул эмас. Юқори даражада ўйнар эканман, футболнинг ҳаётимда бош юмуш сифатида қолишини истайман. Хуллас, фаолиятим якунланганидан кейингина ёки 33-34 ёшда оилавий ҳаёт ҳақида ўйлашим мумкин».
Кўплаб юлдузлар ва таниқли мураббийлар футболдан озгина чалғиш мақсадида гольф ўйнашади. Мисол учун, Гарет Бэйл ва Хосеп Гвардиола. Бироқ Сон Хюнга бунинг ҳам қизиқ томони йўқ: «Тўғриси, гольфни тушунмайман - сен умумий вақтнинг катта қисмида жим турасан, ҳаракат кам. Ҳа, бу спорт тури Кореяда жуда оммалашган, гоҳида телевизор орқали қандайдир турнирларни томоша қилишим ҳам мумкин. Аммо ўйнаш? Сен коптокни имкони борича узоқроққа йўналтирасан, кейин эса уни қидиришга тушасан. Жуда зерикарли. Яхшиси, уйда қолиб, мусиқа тинглаш асносида ҳордиқ чиқарганим маъқул».
Сон Хюн Мин Англия чемпионатидаги дебют мавсумида «Тоттенхэм»нинг бошланғич таркибига атиги 13 марта кирганди. У 2016 йилнинг ёзида ҳаттоки, жамоадан кетишга ҳам чоғланди, лекин Маурисио Почеттино кореяликни озгина сабр қилишга кўндира олди. «Тоттенхэм» устози ўша вақт ҳужумчида қай тариқа мотивация уйғотгани ҳақида ўзининг Brave New World: Inside Pochettino~s Spurs номли китобида ҳикоя қилган - «Германия клубларидан бири Хюнни сотиб олишни хоҳлаган ва унинг ўзига мунтазам ўйин амалиёти тақдим этиш ҳақида ҳам ваъда берганди. Мен эса бу каби ваъдалар футболчи учун ўлим ҳукмига баробар эканлигини қайта-қайта уқтирдим. Зеро, ҳар қандай ўйинчи рақобатда устун келсагина ўйнашини билиши ва ўз кучига тўлиқ ишониши керак. Олдиндан берилган ваъда эса футболчининг бўшашига олиб келиши ҳеч гап эмас. Хуллас, Сон Хюнга ҳаммасини соддагина тушунтирдим: «Ўйнашга ҳақли эканлигингни ўзинг амалда исботлаштинг шарт. Футболда юксалишнинг бошқа йўли йўқ». Чунончи, у ўзи учун қониқарсиз кечган мавсумдан кейин кетишга чоғланган эди. Шунинг баробарида футболчига ишонишимни, унга шахсий режамда жой борлигини айтдим, осонгина қўйиб юбормаслигимни ҳам қўшиб қўйдим. Натижада Сон фикрини ўзгартириб, «Тоттенхэм»да қолишга қарор қилди».
Аргентиналик мутахассис кейинчалик матбуотдаги чиқишида аниқ фамилияни айтмаган бўлсада, кўпчилик унинг айнан Сон Хюн ҳақида гапирганини тушунди. Аниқроқ айтсак, Почеттино 2017 йилнинг баҳорида шогирдларидан бирининг майдондаги қатъятсизлигидан қаттиқ норози бўлиб, унинг олдига ҳаттоки, шарт ҳам қўйганди: «Агар сен шу руҳда давом этсанг, бизга керагинг йўқ». Айтишларича, шундан кейин «Тоттенхэм» мураббийлари кореялик футболчига унинг ўйинлардан бирида икки вазиятда олдинга интилиш ўрнига ўта эҳтиёткорона ҳаракатлангани тасвирланган видеоёзувни кўрсатишган. Хюннинг сусткашлиги нафақат ўзи, балки бутун жамоага таъсир қилганди. Муҳими, у бу фикрга қўшилди: «Эҳ, ҳа, чиндан ҳам, нотўғри йўл тутибман. Аслида футболчини «Миллоулл» билан баҳсда таркибга киритмоқчи эмасдим, лекин якунда яна имконият беришни лозим топдим. Натижада Сон Хюн идеал даражада тўп сурди», - дея эслаганди кейинроқ Почеттино. Гап шундаки, кореялик ҳужумчи «Миллуолл»га қарши учрашувга қадар нақ 1,5 ой мобайнида гол урмаганди. Ўша куни эса бирданига «хет-трик»ка эришди.
Жорий мавсумга қарасак, Сон Хюн Мин гол урган ўйинлар «Тоттенхэм»нинг фойдасига ҳал бўлмоқда. Кореялик футболчи «Боруссия» Д. дарвозасини нишонга олган учрашувдан сўнг Почеттино бу борада бироз ҳазиллашишга ҳам жазм этди: «Сон кейинги сафар гол урса, тўғри кийиниш хонасига йўл оламан ва ювиниб, ўйин якунланишини хотиржам кутиб ўтираман». Нима дердик, корейс ҳужумчиси аллақачон Почеттино учун омад қанотига айланибди...
А.ҲАМИДОВ тайёрлади
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20