«Реал» клубининг янги мавсумдаги таркиби қандай кўриниш олиши хусусидаги баҳс-мунозаралар ҳозир испан футболидаги бош мавзулардан бири бўлиб турибди. Жамоанинг уэльслик ҳужумчиси эса ёзда Мадридни тарк этишга асосий номзод. Шу боис, кўпчиликнинг эътибори Гарет Бэйлга қаратилган. Испания ОАВнинг маълумотларига кўра, «Қироллик клуби» Бэйлни 130 млн. еврога сотиш ёки Поль Погба ва Кристиан Эриксендан бирига алмаштиришга тайёр.
Ҳар бир гол учун 2,3 млн. евро
Испаниянинг таниқли нашрларидан бири - AS томонидан эълон қилинган ҳисоб-китобларга кўра, «Реал» ўзининг уэльслик ҳужумчиси учун шу пайтгача 236 млн. евро (101 млн. трансфер қиймати, 135 млн. 6 йиллик иш ҳақи) сарфлаган. Гарет дастлабки 3 мавсумда 18, кейингиларида 27 «лимон»дан олган. Бэйл «Қироллик клуби» либосида 227 марта майдонга тушиб, 102та гол урди. Демак, ҳужумчининг ҳар бир голига 2,3 млн. евро, бир марта майдонга тушишига эса 1 млн.дан кўпроқ маблағ сарфланган. Муаллиф фикрича, Гаретнинг Мадриддаги фаолияти жамоа учун жуда қимматга тушган, футболчи ана шу харажатларни оқлай олмаган. Хўш, чиндан ҳам шундайми? Масалага ойдинлик киритишга уриниб кўрамиз.
Трансфер рекорди
Бундан 6 йил аввал «Қироллик клуби» 24 ёшли ҳужумчи учун «Тоттенхэм» ҳисобига 101 млн. евро ўтказиб, футбол тарихидаги энг қиммат трансферни амалга оширганди. Мазкур рекорд 3 йилдан кейин, Поль Погба 105 «лимон» эвазига «Ювентус»дан «МЮ»га ўтиши билан янгиланди. Ўша пайт «Реал»да бош мураббий алмашган, Моуриньо ўрнини эгаллаган Карло Анчелотти янги жамоани шакллантиришга киришганди. Жумладан, италиялик мутахассис Месут Озил ва Гонсало Игуаиндан воз кечганди.
Уэльслик чапақай спринтернинг дон Карло номзодлари рўйхатида 1-ўринда қайд этилгани бежиз эмасди: 2012|2013 йиллар мавсумида Бэйл бир йўла 4та индивидуал совринни қўлга киритганди: АПЛда мавсумнинг энг яхши футболчиси, профессионал футболчилар ассоциацияси таснифига кўра йил ўйинчиси ва АПЛнинг энг яхши ёш футболчиси, журналистлар таснифига кўра АПЛнинг йил ўйинчиси. Гарет томонидан амалга оширилган 24та гол эса «шпорлар»нинг муваффақиятли иштирокига, жумладан, ЕЛда чорак финалга қадар етиб боришларига имкон яратди.
Мадридликлар «Тоттенхэм» президенти билан узоқ савдолашишган бўлсада, охир-оқибат Даниэль Левининг талабини қондиришга мажбур бўлишди. Натижада «Қироллик клуби» футбол тарихида биринчи бўлиб бир футболчи учун 100 млн.дан ортиқ маблағ сарфлаган жамоага айланди.
Переснинг хайрихоҳлиги
Бэйлни Мадридга олиб келиш ташаббуси Карло Анчелоттидан эмас, балки клуб соҳиби Флорентино Пересдан чиққан бўлса, ажабмас. Уэльслик футболчининг қайси позицияда тўп суришини италиялик мутахассис жуда яхши биларди. «Тақачилар» сафидаги ўйинларнинг асосий қисмини Гарет чап қанот ҳужумчиси чизиғида ўтказганди. Бироқ Мадридда бу чизиқ Роналдунинг, марказ эса Карим Бенземанинг тасарруфида эди. Хуллас, британиялик чапақай учун ўнг қанотга йўл олишдан ўзга вариант қолмаганди. Мана шу ягона номутаносиблик ҳужумчининг самарадорлигига салбий таъсирини кўрсатмасдан қолмади - Мадриддаги 6 йил давомида Бэйл бирор марта ҳам Лондондаги сермаҳсуллигини такрорлай олмади.
Орадан бир неча йил ўтгач, Анчелотти ўзининг автобиографик асарида «Реал»дан кетишига Бэйл билан чиқиша олмай қолгани асосий сабаблардан бири бўлганини баён қилганди. Маълум бўлишича, «Валенсия»га қарши учрашувда (1:2) ҳужумга отланган уэльслик футболчи тўпни қулай вазиятда турган Бенземага узатиш ўрнига дарвозага зарба йўллаган. Лекин зарба ноаниқ бўлган экан. Натижада мураббий унинг ўрнига бошқа футболчини майдонга туширган. Бундан хафа бўлган Гарет ўз агентига, у эса Пересга Анчелотти устидан шикоят қилган. Президент ва бош мураббий ўртасидаги суҳбатдан маълум бўлишича, Бэйл қанотда тўп сураётганлигидан қониқмаётган ва марказга ўтказишни талаб қилаётган экан.
Марказга яқинроқ ҳудудда тўп суриш Бэйлга насиб этмади, жамоа янги бош мураббий - Рафаэль Бенитес тасарруфига ўтганидан кейин эса президентнинг ҳомийлик даражаси яққол намоён бўлди. Воқеалар ривожидан хулоса чиқарадиган бўлсак, Зиданнинг жамоадан кетишида ҳам Бэйл асосий роль ўйнади. Зизу уэльслик ҳужумчига муносиб жой топа олмаган ва уни ёзда сотиб юборишни мўлжаллаганди. Бироқ Перес бу вариантни тақиқлаб, «Ювентус» билан музокарага киришди ва Роналдуни сотиб юборди. Табиийки, Зидан ҳам Мадридни тарк этди.
Жароҳатлар хуружи
Албатта, чапақай спринтернинг «Қироллик клуби»даги омадсизлигида ноодатий позицияда тўп сурганлиги ва Роналдунинг ёрқин ўйинлари муҳим роль ўйнади. Лекин Мадридга келганидан кейин Бэйл жароҳатлар ботқоғига ботиб қолди. Фақат дебют мавсумининг ўзида ҳужумчи 9 марта турли даражадаги шикастланишларни бошдан кечирди, 15та ўйинни томошабин сифатида кузатишга мажбур бўлди. 6 йил ичида мажбурий таътиллар сони 30дан ошиб кетди, гоҳ грипп, гоҳ қўполлик билан амалга оширилган «подкат»лар ҳужумчининг тинкасини қуритди. Кейин эса футболчининг бели ва болдирида муаммолар пайдо бўлди. Энг асосийси, Гаретнинг даҳшатли қуроли ҳисобланган чап оёғининг сермаҳсуллиги пасайиб кетди. Натижада «Тилла бола» «Шиша бола»га айланди. 2017 йилнинг ноябрида у навбатдаги жароҳатини олгач, мадридликлар жиддий ҳисоб-китобга киришдилар. Маълум бўлишича, Бэйл «Реал»нинг охирги 60 учрашувидан 40тасида майдонга туша олмаган экан. Ҳужумчининг ҳозирга қадар ўтказиб юборган ўйинлари сони 100тага яқинлашиб қолди. AS услубидаги таҳлилни давом эттирадиган бўлсак, ҳужумчининг ўтказиб юборган ўйинлари урган голларидан қимматроқ эканлиги ойдинлашади.
Испания кубоги, «Десима» ва Киев
Лекин Бэйлнинг «Қироллик клуби»га ҳадя этган барча голларини бир хилда баҳолаш адолатга зид эканлигини алоҳида таъкидлаш ўринли бўлади. Айниқса, 2014 йилнинг баҳорида амалга оширилган икки голнинг баҳоси йўқ. Чунки улар мадридликларни тарихий ғалабага олиб келганди. Аввалига чапақай спринтер Марк Бартра билан бўлган пойгада яшиндек учиб, таъқибчини ортда қолдирган ва жамоага мамлакат кубогини («Барселона», 2:1), кейин ЕЧЛнинг Лиссабондаги финалида («Атлетико», 4:1) узоқ йил орзиқиб кутилган ўнинчи «шалпангқулоқ»ни тортиқ этганди. Эҳтимол, Бэйл Переснинг чексиз мурувватига унинг 12 йиллик орзусини рўёбга чиқаргани учун сазовор бўлгандир? Ахир «Реал» айнан Перес даврида «Десима»га эришди ва у ҳанузгача ягоналигича қолмоқда.
Гаретнинг бошқа бир аниқ зарбаси ҳам пул билан ўлчанмайдиганлар тоифасидан. Балки 2017|2018 йиллар мавсуми финалида «Реал» «Ливерпул»ни унинг кўмагисиз ҳам енгиши мумкин бўлгандир. Бироқ юз берган воқеани инкор этиб бўлмайди: Киевдаги баҳснинг 61-дақиқасида Гарет Исконинг ўрнига майдонга тушди ва тез орада тўпни ўзининг устидан оширган ҳолда ғалаба келтирувчи голни амалга оширди. Кейинчалик ҳужумчи «дубль» соҳибига айланди. Энди айтинг-чи, ўша голни 2,3 млн.га, умуман, маблағ билан қиёслаш мумкинми? Боз устига, Киевдаги зафар учун «Реал» 15,5 млн.га, мавсумдаги халқаро учрашувлари учун 88 «лимон»га эга бўлганди.
Ҳозирда воқеалар ривожи Бэйлнинг Мадридни тарк этишидан дарак бермоқда. Чунки ҳужумчи тез орада 30га чиқади, дурустроқ баҳода сотиб юборишнинг айни пайти. Қолаверса, Зидан ҳам янги мавсумда ундан умидвор эмаслигини билдирди. Лекин Мадриддаги фаолияти қандай ўтганидан қатъий назар, Гарет Бэйл «Реал»дан қарздор эмас.
Хўжа АБДУЛАҲАД тайёрлади.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20