Қайднома

Қидирув

Шерзод Ҳакимов: «Чиройли ўйин эсдан чиқади, натижа сақланиб қолади»

Шерзод Ҳакимов: «Чиройли ўйин эсдан чиқади, натижа сақланиб қолади»

  01.05.2019 00:13
  0
  155
Шерзод Ҳакимов: «Чиройли ўйин эсдан чиқади, натижа сақланиб қолади»

Ушбу мавсумдан эътиборан Сурхондарёга ҳам катта футбол қайтди. Аниқроғи, Термизнинг «Сурхон» клуби бир неча йиллик танаффусдан сўнг яна элитада қатнашиш бахтига муяссар бўлди. Чемпионат стартига оз муддат қолган вақтда, жамоа ўз сафини тажрибали ва маҳоратли футболчилар билан тўлдирди.

Мураббийликка эса «Локомотив»да улкан тажриба орттирган Андрей Микляев таклиф этилди. Қилинган ўзгаришлар самараси ўлароқ, термизликлар чемпионатни ижобий натижалар билан бошлашди, рақиб қандай кучга эга бўлишидан қатъий назар, муносиб кураш тақдим этишмоқда.

Жумладан, Жиззахдан йирик ғалаба билан қайтишди, турнир карвонбошиси - «Пахтакор» билан дуранг ўйнашди. Бунда, албатта, истеъдодли ҳужумчи Шерзод Ҳакимовнинг ҳам ўрни бор. Яқинда иқтидорли форвардни суҳбатга тортиб, унга ўзимизни қизиқтирган саволлар билан мурожаат этдик.

- «Навбаҳор» билан ўйинда қайд этилган йирик (0:3) ҳисобдаги мағлубиятга нима сабаб бўлди?

- Барча жамоалар қатори ҳар бир ўйинда ғалаба учун майдонга тушамиз. Бироқ футболнинг ўзига яраша ёзилмаган қонун-қоидалари бор. Мағлубият билан ғалаба доим ёнма-ён юради. Уларнинг қай бири сиз томонда бўлиши ўзингизга боғлиқ. Бу каби мағлубиятлар мен ва жамоадошларимни янада кучли қилади, хатолардан тўғри хулоса чиқариб, кейинги турларда сурхондарёлик ишқибозларни хурсанд қилишга уринамиз.

- Балки жамоа жисмоний тарафлама толиқаётгандир?

- Футбол 90 дақиқадан иборат. Табиийки, кучли рақибларга қарши баҳсларда бир маромда тўп суриш осонмас. Ташқаридан қаралса, мураккаб эмасдек туюлиши мумкин, аммо майдонда ҳаракат қилаётган футболчига бу яққол билинади. Таркибимиздаги барча йигитлар профессионал, ўз ишининг устаси. Қолаверса, улар бундай вазиятларда тобланишган.

Умуман, собиқ жамоам «Нефтчи» сафида «Навбаҳор»га қарши кўплаб учрашувлар ўтказганман. Наманганликлар доим кучли ўйин намойиш этишган, ҳамиша ўз фалсафаларига содиқ қолишган. Сўнгги учрашувда ҳам рақиб айнан шу жиҳат бўйича устунликка эришди.

- Андрей Микляев қўл остида илк бор ўйнаяпсиз, у жамоага ўз услубини тўлиқ сингдира олдими?

- Микляев юксак савиядаги мураббий, унинг «Локомотив» билан қандай ютуқларни қўлга киритганини ҳамма билади. Ўйлайманки, у анъанасини «Сурхон» билан ҳам давом эттиради. Фақат буни амалга ошириш учун маълум вақт керак. Биласиз, сўнгги лаҳзаларда элитада иштирок этишимиз аниқ бўлди, жамоа янгидан шаклланмоқда. Буни ҳам инобатга олиш даркор.

- Ижтимоий тармоқларда «Сурхон» антифутбол намойиш этяпти», қабилидаги фикрлар кўзга ташланди. Аслида ҳам ўйинларга ҳимоявий тактика танланяптими?

- Ушбу фикрингизга қўшилмаган бўлардим. Футбол мухлислар учун ўйналиши бот-бот такрорланяпти, бу мавзуга яна қайтишимиз шарт эмас. Баъзан кучли рақибларга қарши баҳсларда ҳимояга нисбатан кўпроқ эътибор қаратаётганимиз айни ҳақиқат. Чунки гранд клублар билан ўйинларда битта хато ҳам мағлубиятга олиб келади. Нафақат биз, балки бошқалар ҳам бундай пайтларда эҳтиёткорликни маъқул кўришади. Ахир чиройли ўйин тезда эсдан чиқади, натижа эса сақланиб қолади.

- Энди собиқ клубингиз «Нефтчи» хусусида суҳбатлашсак. Жамоани мураккаб пайтда ташлаб кетиш осон бўлмагандир?

- Дарҳақиқат, «Нефтчи» ҳаётимда муҳим ўрин тутади. Футболчи сифатида айнан шу клубда улғайдим, камол топдим. Афсуски, жонажон жамоам охирги йилларда омадсизлик гирдобига тушиб қолди. Фарғонани тарк этишимнинг ўзига хос сабаблари бор, албатта.

Ҳар бир футболчи фаолияти давомида янги марраларни кўзлайди. «Сурхон» олдига аниқ мақсад қўйган, шу жиҳат ўзига қаратди. Насиб қилса, Фарғонага ҳали қайтаман.

- Одатда, урган голларингизни сальто билан нишонлайсиз. Бундай услуб саноқли футболчиларда кузатилади...

- Тўғри, ҳар бир футболчи голни турлича нишонлайди. Сальто мен учун одатга айланган, буни Жепаровга ўхшаш учун қилмайман. Ушбу футболчини ҳурмат қиламан, терма жамоамиз тарихидаги энг кучли ижрочилардан бири сифатида тан оламан. Сервер ярим ҳимояда ўйнайди, мен эса ҳужумчиман. Шунингдек, истеъдодли ёш футболчи Азиз Ғаниевда ҳам шундай қобилият бор.

- Ўтган мавсум якунига кўра сизнинг голингиз «Йилнинг энг чиройли голи» номинациясида ғолиб деб топилди. Шундай бўлишини кутганмидингиз?

- Йўқ, албатта. Умуман олганда, номзодлар қаторига киритилганимнинг ўзи катта гап. Мазкур рўйхатда, шунингдек, Азиз Ҳайдаров ва Игорь Йелич ҳам бор эди. Ўзимни улардан устун қўя олмайман. Аммо якунда мени ғолиб деб топишди. Бундай эътибор ва эътироф учун барчага миннатдорчилик билдираман.

Абдулазиз ИСКАНДАРОВ суҳбатлашди


Манба: www.interfutbol.uz


InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.

Оммабоп мақолалар

Хабарингиз борми

Чемпионатлар

тўлиқ жадвал »
  • ЎФФ ва ПФЛнинг янги раҳбарияти олиб бораётган ислоҳотларга қандай баҳо берасиз?


«ИнтерФУТБОЛ» газетасининг расмий сайти.
Гувоҳнома № 0149. Берилган санаси: 25.06.2008 Муассис: «ИНТЕРФУТБОЛМЕДИА» МЧЖ.
Бош муҳаррир: Аҳадхон АБДУҲАМИТОВ.
Таҳририят манзили: 160400, Косонсой шаҳри,Чорбоғ кўчаси, 17-уй.
Электрон манзил: info@interfutbol.uz