«ПСЖ»да фаолият олиб бораётган Даниэль Алвес «Барселона»нинг ҳозирги ҳолати ҳақида сўз юритди. Каталонияликлар икки ўйин натижасига кўра «Ливерпул»га имкониятни бой бериб, ЕЧЛни тарк этишганидан сўнг жамоанинг ҳозирги модели тан-қид остига олинди. Кўпчилик клуб ўз академиясидан воз кечиб, кўп миллионли харидларни амалга ошираётганидан норози бўлмоқда.

— «Барса»да ўйнаган пайтларим клуб бизни анча ҳимоя қиларди, - дейди Алвеш. - Қандайдир омадсизлик бўлса, одамлар бундан фойдаланиб танқид қилишга тушишади. Лекин танқид фойдали деб ҳисоблайман. «Барселона» ҳамон тўпни назорат қилишни, қисқа пасларга асосланган ўйинни ёқтиради. Футболчилар келади, кетади. Аммо «Барса» ўз фалсафасини ўзгартирмайди. Трансфер бозорида эса вазият бироз ўзгарган. Умуман олганда, ўзи шунақа. Агар ғалаба қозонсангиз, сиз энг яхшисиз. Мағлубиятга учрасангиз, ҳеч ким эмассиз. «Барселона» ҳозир жамоада йўқ бўлган балансни топиши лозим. Айни пайтда бир нарса дейиш қийин. Чунки мавсум ҳали якунланмади. Охирги 11 йилда «Барса» саккиз марта Испания чемпиони бўлди. Энди эса «Ливерпул»га имкониятни бой бергани учун танқидлар остида қолиб кетди.

Ҳозирги «Барселона»да энг кўп танқид қилинаётган футболчи Коутиньодир. Бразилиялик Андрес Иньестанинг ўрнини босиш учун келганди. Каталонияликлар унинг трансферига 160 миллион евро сарфлашган. Ҳозирча Коутиньо бу пулларни оқламади. Яқинда ESPN клуб Коутиньни сотмоқчилиги ва унинг трансферини 105 миллионга баҳолагани тўғрисида хабар берди. Алвешнинг фикрича, ҳамюртининг «Барса»да ҳали вақти келади. Аммо бунинг учун олдинга қадам ташлаши керак.

— Унинг бундай ҳолатга тушиб қолганидан жуда афсусдаман. Унда «Барса»га мос келадиган хислатлар жуда кўп. Лекин у ерда муваффақият қозониш учун тинимсиз меҳнат талаб этилади. Чунки одамлар сизга «заряд» беришлари ёки шунчаки «чўктириб» юборишлари мумкин. «Барселона» - ўзига хос жамоа. Нима учун? Негаки, бу клубнинг бир бўлагига айланиш учун шунчаки яхши футболчи мақоми камлик қилади. Сиз «Барселона» нима эканлигини тушунишингиз керак. Менимча, Коутиньо шуни ўрганиш жараёнида. Лекин мухлислар ўта шошқалоқлар. Кимлардир янги жойга тезда мослашади, бошқаларда эса бу маълум вақтни олади. Биз шу жараён билан яшашга мажбурмиз. Агар у шуни истаса, унга ёрдам беришимиз керак. Ишончим комил, Коутиньо жаҳон футболидаги машҳур шаҳслардан биридир. Қайси жамоада ўйнамасин, ҳамиша юқори савия намойиш қилган. Уни «ПСЖ» таркибига қўшиб олган бўлардим. Аммо бунча пулим йўқ.

Алвеснинг «Барса»даги яна бир яқин дўсти - Лионель Мессидир. «Ливерпул»га қарши жавоб учрашувидан сўнг кўплаб фанатлар аргентиналик футболчидан норози бўлишди.

— Футболда танқидга номуносиб кимнидир танлаш керак бўлса, шубҳасиз, Мессини кўрсатаман. Унинг майдонда ва унинг ташқарисида олиб бораётган ҳаёт тарзи мақтовга арзийди. Лео кўп йиллардан буён юқори савияда ҳаракат қилмоқда. Дастлабки учрашувдан сўнг Мессини нималар дейишмади-ю. Лекин футбол жамоавий спорт тури, индивидуал эмас. Ҳар ким ўз ишини 100 фоиз бажариши керак.

Изоҳларда Месси «Барселона»да бекор вақт ўтказаётгани, энди бу жамоа билан ЕЧЛда ғолиб чиқа олмаслиги ҳақида ёзилган. Бунга эса Алвеш қуйидагича жавоб берди:

— Сиз қанчалик кучли бўлманг, жамоани ўзингиз олиб юра олмайсиз. Ҳамиша Неймар Бразилияда, Месси Аргентина ва «Барселона»да шундайлиги ҳақида кўп гапирганман. Бу вутболчилар вазиятни ўзгартириш учун туғилишган, ҳамма ишни қилиш учун эмас. «Барса»нинг ЕЧЛдан чиқиб кетиши кутилмаган бўлди. Икки йил олдин «ПСЖ»га қарши ўйинда «Барселона» тарихий «камбэк»ни амалга оширганда ҳам шундай ҳайрон бўлгандик. Каталонияликлар яна «требл» учун ҳаракат қилишди. Аммо улар истаганидек бўлмади. Биз учун, шу клубни севадиганлар учун аччиқ таассуротлар қолди.

Шу ўринда айтиш жоиз, Алвес ЕЧЛ финалида «Барселона» ва «ПСЖ» жамоаларини кўришни истаётганини яшириб ўтирмади.

А.ҲАМИДОВ тайёрлади.