Кутилишича, «Атлетико» ҳужумчиси Антуан Гризманн яқин орада «Барселона» футболчисига айланади. Sport.es сайтининг хабар беришича, франциялик футболчи Лионель Месси билан гаплашганидан кейин «Атлетико»дан кетишга қарор қилган. Ҳар ҳолда, Антуан Мадрид жамоаси раҳбариятига ўз қарорини айтиб, буни оддий изоҳлаган: «Тўғриси, Месси чорловини рад этолмайман...». L~Equipe нашрида эса «Барселона» тақдим этган келишувнинг баъзи шартлари маълум эканлиги ҳақида ёзилди. Таъкидланишича, Каталония клуби 28 ёшли Гризманнга 5 йиллик шартнома таклиф этган. Футболчи буни қабул қилса, йилига 17 миллион евро миқдорида маош олади. Таққослаш учун айтсак, Антуаннинг «Атлетико»даги йиллик маоши 21 миллион еврога тенг. Қисқаси, у агар «Барса» таклифига кўнса, маош масаласида бироз ютқазади. Лекин «кўк-анорранглилар» сафига қўшилса, ҳомийлик шартномалари орқали кўпроқ фойда кўриши ҳеч гап эмас. Дарвоқе, Гризманн ва «Атлетико» ўртасидаги айни шартномага мувофиқ, жорий йил 1 июлдан сўнг футболчининг трансфер қиймати 200 миллиондан 120 миллион еврога тушади. Бу сумманинг 20 фоизи (24 млн.) француз ҳужумчисининг собиқ клуби - «Реал Сосьедад»га тегади.

Умуман, Гризманн «Барселона»нинг ёзги трансферлар бозоридаги ягона  мўлжали эмас. Клуб «Аякс»дан ҳимоячи Маттейс де Лигтни ҳам сотиб олмоқчи. Қолаверса, Маттейснинг клубдоши - Френки де Йонг трансфери ҳал қилиб қўйилган. Marca нашрининг хабар беришича, «Барса» ушбу футболчилар хариди учун 235 миллион евро ажратади: Гризманн -  120, де Лигт - 70, де Йонг - 75 миллион евро. Испания чемпиони табиийки, ушбу катта харажатни қоплаш учун бир қатор футболчиларини трансферга қўймоқчи. «Барса»нинг «қора рўйхати» анча узун, лекин унга тушган баъзи футболчилар клубда қолишади, барибир.

«Барселона» трансферга қўйишни режалаштираётган футболчилар

Филиппе Коутиньо - тахминан 100 млн. евро

Иван Ракитич - тахминан 50 млн. евро

Самуэль Юмтити - тахминан 40 млн. евро

Яспер Силессен - тахминан 30 млн. евро

Малком - камида 40 млн. евро

Андре Гомеш - чамаси 20-25 млн. евро

Денис Суарес - тахминий баҳо белгиланмаган

Рафинья Алькантара - тахминий баҳо белгиланмаган

Марк Кукурелья - тахминан 10 млн. евро

Нелсон Семеду - чамаси 35 млн. евро