Қайднома

Қидирув

МДҲ ҳудудидаги «янги Мессилар»га яна бир бора эътибор берамиз...

МДҲ ҳудудидаги «янги Мессилар»га яна бир бора эътибор берамиз...

  24.05.2019 10:35
  0
  255
МДҲ ҳудудидаги «янги Мессилар»га яна бир бора эътибор берамиз...

«Янги месси» - бу мақтов шакли: Россия матбуоти «Ростов» вакили Элдор  Шомуродовни тез-тез «Ўзбек Мессиси» сифатида мақтамоқда. Бу эътироф осмондан олинган эмас, албатта. Чунончи, Буюк Британиянинг энг обрўли нашрларидан бири саналган The Sun олдинроқ бутун дунёдаги энг истиқболли футболчилардан алоҳида рўйхат шакллантирганди. Инглизлар бунда вақтида лоақал бир марта айнан «Барселона» юлдузи Лионель Мессига таққосланган истеъдодларга эътибор қаратишган. Қизиқ, ҳам ҳудудий томондан, ҳам футбол нуқтаи назаридан бизга яқин мамлакатларда кимлар «Янги Месси» ёрлиғига муносиб кўрилганлар? «СЭ» газетаси The Sun томонидан тузилган ўша рўйхатга қараб, собиқ иттифоқ ҳудудида бош кўтарган «Янги Месси»ларни яна бир бора эсга солди.

 

«Қозоғистон Мессиси» - Еркебулан СЕИДАХМЕТ

19 ёшли ҳужумчини буюк аргентиналик билан таққослай бошлаганларига 2 йилча бўлди. Еркебулан ўшанда қадрдон клуби - «Тараз»да ўйнар ва кучли дриблинг салоҳиятию, юқори тезлиги билан кўзга ташланган эди. Қозоғистонлик журналистлар Сеидахмет айниқса, тўп билан ишлашда Мессини эслатиб юборишини бот-бот ёзишганди. Иқтидорли ҳужумчи ўтган йили Россия Премьер-лигаси иштирокчиси «Уфа» сафига қўшилди, аммо бир уринишда Бош­қирдистон жамоаси асосий таркибига киролмади - жароҳатлар панд берди. Уфаликлар бундан 3 ой олдин Сеидахметни ижара келишуви асосида «Левски»га жўнатишди. Эндиликда Болгария ОАВда ҳам «Қозоқ Мессиси» ҳақида кўп ёзилмоқда. Тўғри, ҳозирча ҳайратланган ҳолда эмас. Мисол учун, Gol.bg сайти яқинда «Левски» бош мураббийига ачиниш ҳисси билан ёзди: «Қозоқ йигитини таркибга қўшиш жуда қийин, албатта. Бунга легионерларга нисбатан ўрнатилган чеклов имкон бермайди».

«Латвия Мессиси» - Кристапс ГРАБОВСКИС

Болтиқ бўйи мамлакатларида футбол унчалик оммалашган эмас, шунинг учунми, бу ҳудудда тўп сурувчи юлдузлар йўқ, ҳисоби. Лекин яқин келажакда камида бир нафар ёрқин ижрочи катта саҳнага чиқиши мумкин. Гап бир неча йил илгари «Латвия Мессиси» мақомини олган Кристапс Грабовскис ҳақида кетмоқда. Ўшанда 10 ёшли болакайнинг техник қобилияти, тўп билан муомала қилиш ва зарба йўллаш масаласидаги мўъжизавий ҳаракатлари акс этган видеоёзув бутун интернет кенгликларига ёйилганди. Кейинчалик Грабовскис ҳаттоки, Adidas билан шартнома тузди. Аммо у ҳозирча майдонда эмас, ижтимоий тармоқларда фаоллик кўрсатмоқда.

«Ўзбекистон Мессиси» - Элдор ШОМУРОДОВ

- Ўйлашимча, мен Мессига умуман ўхшамайман, - деди «Ростов» шарафини ҳимоя қилаётган 23 ёшли ҳамюртимиз россиялик касбдошларимизга интервью берар экан. Дарҳақиқат, Элдор на ўйин услуби ва на гавда тузилиши (бўйи 190 сантиметрга тенг) билан аргентиналик «митти сеҳргар»ни эслатади. Лекин Ўзбекистонда Осиё кубогида ва Россия Премьер-лигасида бирдек гол урадиган кучли футболчилар ҳар доим ҳам баралла бош кўтараверишмайди. Дейлик, Элдор жорий мавсум РПЛда «Спартак» ва «Краснодар»га қарши кечган ўйинларда 3та гол муаллифига айланди. Хуллас, кимдир шуларни назарда тутиб, Шомуродовни Месси билан таққослаб кўришга қарор қилди ва...

«Арманистон Мессиси» - Арас ОЗБИЛИС

Умуман, Арманистонда битта фикр ҳукмрон: «Арман Мессиси» - бу Мессининг ўзи». Айтишларича, Леонинг бобокалони ва момокалони арман миллатига мансуб эмишлар. Улар 100 йил олдин мажбурий ҳолатда Аргентинага кўчиб кетишган... Хуллас, шу тушунчага мувофиқ, «Барселона»нинг буюк голеадорини арман сифатида кўрсатиш мумкин экан. Тўғри, алоҳида «Арман Мессиси» ҳам бор - Арас Озбилис. «Аякс» тизимида тарбияланган бу футболчи вақтида ақлга сиғмас даражадаги иқтидори билан кўпчиликни ҳайратга солган. Арас кейинчалик «Спартак» (Москва)да тўп сурди. 29 ёшли Озбилис ҳозирда «Бешиктош» ихтиёрида.

«Қирғизистон Мессиси» - Эрбол АТАБАЕВ

2012 йили «Барселона» академиясида қирғизистонлик бола шуғуллана бошлади. Шу муносабат билан Бишкекда ҳаттоки махсус матбуот анжумани ҳам ўтказилди ва унда 10 ёшли Эрбол ҳамда унинг бир қатор муҳим ўрин тутувчи «амаки»лари иштирок этишди. Эрбол Атабаев 300 нафар иқтидор қатнашган икки босқичли саралаш танловидан муваффақиятли ўтиб, Ла Масияга дунёнинг турли мамлакатларидан жалб этилган 12 нафар бола қатори йўл олганди. Тушунарлики, Атабаевга шу заҳоти табиий равишда «Қирғиз Мессиси» ёрлиғи ёпиштирилди. 17 ёшли футболчи ҳамон Каталонияда ўйнамоқда, аммо «Барселона» эмас, «Хосеп Мария Гене» жамоасида.

«Грузия Мессиси» - Гиорги АРАБИДЗЕ

21 ёшли хавбек якунланган мавсум Португалия чемпионати юқори дивизионида Сардор Рашидов билан бирга «Насьонал» шарафини ҳимоя қилди, аммо муваффақиятсиз.... Гиорги бунга қадар бир йилча «Шахтёр» (Донецк)да тажриба оширганди. Иқтидорли футболчининг вакили Михаил Метревели мижозини «Грузия Месси» сифатида эътироф этиш баробарида машҳур румин Георги Хаджи билан таққослашларини тез-тез эслатиб туради. Кўринишидан, барчаси реклама ва ташвиқот учундек. Ҳар ҳолда, Арабидзе ҳали айтарли каромат кўрсатгани йўқ ва ярим ҳимоячининг лоақал Хаджи даражасига кўтарилишига ҳам ишониш қийин.

«Озарбайжон Мессиси» - Нихат АҲМАДЗОДА

Ўтган йили кузда Озарбайжоннинг «Сумгаит» клуби мактабидан «Бешиктош» академиясига йўл олган Нихат Аҳмадзода ўта юқори техник салоҳиятга эга. У 12 ёшидаёқ «Озарбайжон Мессиси» мақомини олганди. Вақтида Бокуда фаолият юритган «Манчестер Юнайтед» мактаби филиалида ҳам шуғулланган болакай энди Истанбулда катта футбол сирларини ўзлаштирмоқда.

«Тожикистон Мессиси» - Парвизжон УМАРБОЕВ

Бу футболчи ўз вақтида Россия ўсмирлар терма жамоаси сафида ўйнаган, «Рубин» академиясида таҳсил олган. Ҳозир эса Пловдивнинг «Локомотив» клубида тўп сурмоқда. Парвизжон шунинг баробарида Тожикистон миллий жамоаси аъзоси ҳамдир. 24 ёшли футболчи ўсмирлик чоғиёқ «Тожик Мессиси» номини олган. Ҳар ҳолда, бўйи нисбатан паст (168 сантиметр), дриблинг маҳорати ҳам зўр. Тўғри, Болгарияда тожик йигитини кўпроқ  Алексис Санчесга қиёсламоқдалар. Аммо Парвизжон бундан унча хурсанд бўлмаса керак. Ахир чилилик ҳужумчи Англия чемпионатининг якунланган мавсумида атиги 1та гол урди. Дарвоқе, Умарбоевнинг ўзи ҳам Болгарияда рақиблар дарвозасига бир мартагина йўл топди, холос.

«Украина Мессиси» - Алексей КАРАСЬ

Украина матбуоти 2 йилча олдин «Коммунар» (Харьков)нинг 10 ёшли малласоч футболчини муҳокама қила бошлади. Алексей Карась тарихи «Латвия Мессиси»никига ўхшаш - ижтимоий тармоқларда унинг энг яхши голлари ва финтлари видеоёзуви роса «айлантирилди». Натижада Карасга «Украина Месси»си номи берилди. Эътиборлиси, Карась ҳақида ҳаттоки, маҳаллий телевидениеда ҳам кўрсатув берилди. Карась ҳозир 12 ёшда ва унинг YouTube тармоғидаги канали мунтазам равишда янги  видеоёзувлар билан бойитиб борилмоқда.

«Россия Мессиси» - Денис ДАВИДОВ

- Давидов агар ҳаволаниб кетмаса, ақлини йўқотмаса, уни келаси йили терма жамоада кўрамиз. «Спартак» эса шу суръати билан тез орада терманинг базовий клубига айланади. Бизда «Янги Месси» улғаймоқда. Ишқилиб, уни ортиқча мақтаб юбормасак, бас - бу сўзлар 2014 йили «Спартак» хўжайини Леонид Федун томонидан айтилганди. Клуб соҳибининг фикри ўша вақтдаёқ кенг муҳокама қилинди. Бинобарин, у ўз гапини инкор этганди («Янги Месси» - бу ортиқча мақтов эмасми?). Мана, Давидов аргентиналик буюк футболчи даражасига яқинлашиш у ёқда турсин, лоақал Россия Премь­ер-лигаси миқёсида ҳам ўз ўрнини тополмади. Хусусан, бир неча ижара саёҳатларидан кейин йил бошида «Спартак» билан хайрлашиб, «Нижний Новгород» сафига қўшилди. Денис ҳозир 24 ёшда, вақт эса тўхтамай ўтиб боряпти...

Уткирбек УМАРОВ тайёрлади.


Манба: interfutbol.uz


InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.

Оммабоп мақолалар

Хабарингиз борми

Чемпионатлар

тўлиқ жадвал »
  • Сиз Эктор Купер миллий терма жамоамизни ЖЧ-2022 (Қатар)га олиб бора олишига ишонасизми?


«ИнтерФУТБОЛ» газетасининг расмий сайти.
Гувоҳнома № 0149. Берилган санаси: 25.06.2008 Муассис: «ИНТЕРФУТБОЛМЕДИА» МЧЖ.
Бош муҳаррир: Аҳадхон АБДУҲАМИТОВ.
Таҳририят манзили: 160400, Косонсой шаҳри,Чорбоғ кўчаси, 17-уй.
Электрон манзил: info@interfutbol.uz