“Металлург” – “Бунёдкор”(0:2) учрашувидан сўнг меҳмонлар устози Вадим

Абрамов қуйидагича фикр билдириб ўтди: 

- “Металлург” – жиддий рақиб. Шуни инобатга олган ҳолда мазкур баҳсга жиддий ҳозирлик олиб борган эдик. Агар ютқазсак, мусобақа жадвалида пастга тушиб кетишимиз мумкин эди. Зеро мусобақа жадвалида жамоалар анча яқин жойлашган. Лекин биз бугунги баҳсни ўз фойдамизга ҳал эта олдик. Рақибдан устун эканимизни намойиш этдик. Бунинг учун йигитлардан жуда ҳам миннатдорман. Ана энди чемпионатда қисқа танаффус юзага келади. Танаффусга яхши кайфиятда йўл оляпмиз, - деди мутахассис.  

“Металлург” – “Бунёдкор” учрашувидан сўнг мезбонлар устози Андрей Шипилов қуйидагича фикр билдириб ўтди: 

- Бу йилги мавсумдаги энг ёмон ўйинимизни ўтказдик. Ўйинни қандай таърифлашни ҳам билмаяпман. Мағлубиятдаги айб – тўлалигича менинг зиммамда. Таркиб танлашда хато қилдим. Барчага ўйнаш имконини тақдим этишга ҳаракат қилаётган эдим. Наманганда яхши ўйнаган эдик. Лекин ундан кўра, Наманганда бундай ёмон ўйнаб, бугун уйда ғалаба қозонсак яхшироқ бўлар эди балким. “Бунёдкор” эса бугун ҳақли равишда ғалаба қозонди. Вадим Абрамов шогирдилари бугун ғалабага ҳақли ўйин намойиш этишди, - деди мутахассис.