Қайднома

Қидирув

«Муғомбир» учун 120 «лимон»

«Муғомбир» учун 120 «лимон»

  03.06.2019 06:32
  0
  254
«Муғомбир» учун 120 «лимон»

Килиан Мбаппе ва Жейдон Санчо ўзгача ўйин кўрсатишмоқда. Лионель Месси ва Криштиану Роналдунинг фаолиятлари эса бироз бошқачароқ бошланганди. Албатта, иқтидорли футболчи ўзлигини йўқотмай, бошқалардан кўчирма олмай ўсишга эришса, бундан барча мамнун бўлади. Бугунги ҳикоямиз қаҳрамони ҳам худди шундай ўзгача салоҳият соҳибларидан бири - Жоау Фелиш.

Кучли жиҳатлари

Ўзига ишончи юқори. 19 ёшида керак бўлса, хотиржам тарзда пенальти тепгани бориб, ундан фойдаланади. Фикрлари тиниқ - айёрона қарорлар чиқаради, ҳаракатлари енгил. Самарали узатмалари кўплиги тезкор ўйлашидан дарак. Ҳаводаги курашларда фаол. Эндигина 19 ёшга тўлганига қарамай, жисмонан бақувват. Бўйи 180 сантиметр, аммо Зидан сингари яна 4-5 см.га ўсиши мумкин.

Жоау Фелишда гол сезиш қобилияти бор, ҳужумлар пайти зиқналик қилмайди - зарур пайтда шеригига тўпни оширади. Зарба йўллайдиган позицияни тўғри танлайди (15та гол шунинг маҳсули). Икки қанотда, ҳужумчи ортида тўп суриб, ўйинни назорат қилади. Зарбалари ўта кучли бўлмасада, ўта аниқ. Техникаси оддий, ортиқча финтлар йўқ, шунга қарамай Жоау тўп учун курашга дадил киришади.

Кучсиз жиҳатлари

Дастлабки минус - агенти Жорже Мендеш экани. Болалигидан «Бенфика»га мухлислик қилган Жоау 7 ёшида «Порту» мактабида таҳсил олиб, бўйи ва жисмоний ҳолатидаги бошқа камчиликлар учун ҳайдалганди. Энди эса «аждарлар» «бургутлар»га тегадиган 100 млн. евродан қуруқ қолишади, чоғи.

Фелиш керак бўлса, вазн тўплайди. Аммо энг муҳими - паслар аниқлиги. Рақиб ҳимоячиларини ортидан эргаштирадиган ҳар қандай футболчи хатолардан холи бўлмайди. Дарвоза томон йўлланадиган зарбалар борасида муаммо йўқ - бир ўйин мобайнида ўртача 2,3-2,4та зарба марказий форвард бўлмаганлар учун яхши кўрсаткич. Прессингларда ҳам қатнашади, лекин ҳозирча яккама-якка кураш чоғида мўъжиза кўрсатганича йўқ - рақибни муваффақиятли алдаб ўтишдан кўра, йиқилишни кўпроқ маъқул кўради. Умуман, унинг асосий кучи - яккакурашларга кам киришиб, кўпроқ гол уриш. Ҳозирча буни уддалаяпти, «Айнтрахт» буни тасдиқлаши мумкин, зеро Жоау Европа Лигаси «плей-офф» баҳсида «хет-трик» ва голли пас расмийлаштирди.

БошҚалар билан

солиштирманг

Навқирон Месси ва Роналду 19-20 ёшда вингер бўлишган, Фелиш эса тўп қаерда бўлса ўша ерга «бурун суқади». Керак пайтда «Бенфика» ўйинига йўналиш топишни ҳам қойиллатади. Хўш, катталар ишини қандай уддаламоқда? «Ботқоқ»да кўп ўйнаган. Жоау Сегунда клубидаги энг ёш дебютант - иккинчи таркибда тўп сурганида 16 ёшда эди.

Катталар футболида энди кўриниш бермоқда, аммо етакчилик сифатларини ўсмирлар футболидан кўчирган. Услуби билан ҳам бошқа ҳамкасбларидан фарқланади. Мбаппе тезкорликка урғу беради - худди бразилиялик Роналдо сингари, зеро Килиан бақувват йигит. Санчо эса - яшин одам. Англиялик футболчининг шу ёшда 13та самарали узатма муаллифига айланганини инобатга олсак, унда ўйинни ўқий олиш хусусияти борлиги ойдинлашади.

Агар 20 ва ундан кичик ёшдаги йигитлар орасидан кучли беш нафарини танлашга тўғри келса, Мбаппе ва Санчодан ташқари яна икки кишини эътироф этиш мумкин: қанот ҳимоячилари - Александер-Арнольд ва Ҳакими. Мойзе Кин асосан жисмоний ҳолатига эътибор қаратади, унинг ўйин дақиқалари кўп эмаслиги эса хулоса чиқариш эрталигини англатади. Алоҳида ўринга «Байер» аъзоси Хавертсни қўйиш мумкин. У 19 ёшида Бундеслигада 12та гол ва 3та ассист муаллифи бўлди. Бироқ Германия термаси футболчиси ҳозирча чаққонлик бобида Фелишга ютқазмоқда.

Машҳур плеймейкерлар вориси

Жоау Фелиш кимларнинг изидан бораётгани шундоққина кўриниб турибди - Кака ва Руй Кошта. Уни «Милан»нинг собиқ футболчилари билан солиштирамиз. Рикардодан фарқли равишда Жоау бош билан яхши ўйнайди - нимжон кўринишга эга йигитга хос бўлмаган жиҳат. Руй билан таққослаганда, Фелиш классик плеймейкерлар сингари бир жойда туриб ишлашни ёқтирмайди.

Португалиялик иқтидор соҳибининг позициясини аниқлаш ҳозирча мушкул. Кўпинча унинг ҳужумчи эканини таъкидлашмоқда, аслида эса бундай эмас. Мбаппе сингари марказий форвард эмас. Голлари сонига қараб эҳтимол ҳужумчи экани ҳақида гапирилаётгандир. Бироқ Кошта ва Каканинг фокусларини ўзлаштирган ҳолда, индивидуаллик сари интилади, Жоаунинг услубини тасвирлаш қийин. Яхшиси, унинг ўйинини бир бор кўрган маъқул.

Жоау Роналду, Нани, Куарежма ёки Андре Силвадан фарқли ўйин кўрсатади. Зайниддин Зидан «Реал» таркибини кучайтиришда унинг хизматларига таяниши мумкин. Фелиш - ўта маккорона ўйин кўрсатади, майдонда ҳамма нарсани яққол кўради, сониялар ичида қарор чиқаради, бу борада ёшлик чоғларида қойилмақом ҳаракатлари билан ажралиб турган Какадан ҳам қатъиятлироқ.

Жоау «Бенфика»да қоладими ёки 100-120 млн. евро эвазига бошқа клубга ўтадими, буюк футболчига айланиши эҳтимоли юқори. Бундай ҳолат Мбаппе билан кузатилган - муҳими, қобилиятингга тўғри баҳо берадиган, ўз навбатида, назоратга оладиган жойга борсин. Зеро, ўша бразилиялик Роналдонинг фаолиятига нафақат тиззасидаги жароҳатлари, балки тунги маишатбозликлар ҳам халал берганди. Фелиш ҳозирча майдондан ташқарида можароли ишларга аралашганича йўқ, бунинг ўрнига Европа Лигасидаги энг ёш «хет-трик» муаллифига айланишни маъқул кўрди.

Фелиш Криштиану Роналду билан бир жамоада ўйнаш орзуси борлигини яширмади - бу ерда термадан кўра, кўпроқ клубни назарда тутаётганини сезиш қийин эмас. Шунингдек, қаҳрамонимиз Ла Лигани АПЛдан устун қўйишини таъкидлади. Ваҳоланки, «Бенфика»нинг асосий жамоасида дебютини нишонлашидан аввал «Вест Хэм» таркибига қўшилишига бир баҳя қолганди. Туманли ўлкага бормай тўғри қилди, чунки Фелиш ўйин услуби билан кўпроқ жанубий лигалар футболчисига ўхшайди. Умуман, музокаралар бошлаб юборилган, Роналдунинг ҳам «бургутлар» ўйинини кўриш учун Лиссабонга ташриф буюргани бежиз эмас.

Мадрид, Барселона

ёки Турин

Криштиану тез орада ўзига янги касб танлайди, ҳозирча эса «Ювентус» агенти сифатида ярим «ставка» ишлаши мумкин. Дибаланинг тақдири сўроқ остида, Бернардески яхши формада, лекин Фелиш сингари ёш ва ёрқин эмас. Канселуни эса португалиялик дуэт (Роналду-Мендеш) муваффақиятли тарзда Аньелли оиласига таклиф этишди. Шундай экан, Жоауни диққат билан кузатамиз.

Фақат бир жамоага омад кулиб боқади! Жамоасига еврокубоклар ва чемпионатда ёрдам бераётган ёш футболчида яширин иқтидор борлиги, унинг учун кўп пул сарфлаш мумкинлигини ҳамма грандлар ҳам тушуниб етишганича йўқ. Ўз вақтида Перес бундан воз кечиб, ҳозир афсусланмоқда. Замонавий трансфер оламида қоидалар ўзгарган. Ҳозирги тартибга кўра, ким айни пайт янги Мбаппе, Салоҳ, Де Брюйне ёки Ван Дейк чиқишига ишонса, уч йилдан сўнг ўшанинг ошиғи олчи.

Жоауга ҳам кимдир аниқ ишонади, гарчи «Бенфика» товон пули учун 100 миллион евродан кам сўрамаётган бўлсада. Португалиялик иқтидор соҳибининг ўзгачалиги уни навқиронлик даврида порлаган Месси ва Роналдудан фарқлаб туради - Фелиш майдонда анча қатъиятлироқ. Бўлажак афсоналар «Барселона» ва «МЮ»нинг йирик армиясида тарбия топишган, Жоаудан эса ҳали топ-5даги чемпион жамоани топиш талаб этилади.

Танловга кўп нарса боғлиқ, чунки одатда, Мендешнинг агент сифатида мижозлари манфаатларини бир четга суриб қўйганига кўп гувоҳ бўлганмиз. Уни трансфер суммаси кўпроқ қизиқтиради. Маблағ масаласида «Бенфика»нинг ютқазмаслиги аниқ. Янги клуб эса юқори салоҳият соҳибига эга бўлади. Фелишда Платини, Зико, Кака, Руй Кошта, Франческоли ёки Зиданга хос бўлган хусусиятлар мужассам. Жарима майдончасида боши ёрдамида ақлли ўйин кўрсатиши билан Инзагини эслатади.

Шунингдек, афсоналар иштирокидаги кўплаб видеоларни томоша қилиши сезилмоқда - Тотти, Рауль сингари юлдузларга хос фокусларни ижро этганини кўп кўрдик. Жоау Фелиш айнан шу мавсумнинг асосий кашфиётига айланди. Аввалги йилларда Португалия чемпионатида бирорта ҳам ўйин ўтказмаганди, 19 ёшида эса Европа Лигаси, Португалия кубоги ҳамда Примейрада 14та гол, 5та ассист муаллифига айланди. Футбол аренасига дадил кириб келди ва энди кўпчиликни хурсанд қилиши мумкин. Таъкидлаш жоизки, 2019 йили «Бенфика» бош мураббийни алмаштиргач, унинг ўйини янада ёрқинроқ кўриниш касб этди.

Витория Жоаудан асосан «жокер» сифатида фойдаланган бўлса, 42 ёшли Бруну Лаже 19 ёшли шогирдини асосий таркибга киритиб, адашмади. Фелиш ўз ҳисобидаги 15та голдан 12тасини, 5та ассистдан 4тасини айнан 2019 йилда амалга оширди. Ҳозирги ёши учун мақтовга лойиқ натижа. Янги юлдуз порлаш арафасида, муҳими, уни «янги Роналду» демаслик керак - чунки услуб жиҳатидан мутлақо ўзгача футболчи, Криштианудан анча фарқланади.

МАЪЛУМОТ УЧУН: Тўлиқ исми: Жоау Секейра Фелиш

Клуби (фуқаролиги): «Бенфика» (Португалия)

Позицияси: иккинчи форвард, ҳужумкор хавбек

Ёши: 19 (10.11.1999)

Бўйи (вазни):180 см. (64 кг.)

Нархи: 120 млн. евро (товон пули)

Шартномаси: 2023 йилгача


Манба: interfutbol.uz


InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.

Оммабоп мақолалар

Хабарингиз борми

Чемпионатлар

тўлиқ жадвал »
  • Сиз Эктор Купер миллий терма жамоамизни ЖЧ-2022 (Қатар)га олиб бора олишига ишонасизми?


«ИнтерФУТБОЛ» газетасининг расмий сайти.
Гувоҳнома № 0149. Берилган санаси: 25.06.2008 Муассис: «ИНТЕРФУТБОЛМЕДИА» МЧЖ.
Бош муҳаррир: Аҳадхон АБДУҲАМИТОВ.
Таҳририят манзили: 160400, Косонсой шаҳри,Чорбоғ кўчаси, 17-уй.
Электрон манзил: info@interfutbol.uz