Тиниб-тинчимас Фабио Квальярелла 36 ёшида «А» сериянинг энг яхши тўпурарига айланди. Унга шунчаки, қойил қолиш керак - фахрий ҳужумчи пойгада ёш иқтидорлар Кшиштоф Пентек («Милан») ва Дуван Сапата («Аталанта»)ни ортда қолдирди. Қолаверса, кимсан Криштиану Роналдуни ҳам. Браво, Фабио! «Сампдория» ҳужумчиси якунланган мавсум рақиблар дарвозасини 26 марта нишонга олди. Таққослаш учун айтсак, «Ювентус» юлдузи Криштиану Роналду «А» серияда бундан 5та кам гол урди. Дарвоқе, Фабионинг самарадорлигидан ҳайратланган «Наполи» президенти Аурелио де Лаурентис унинг жамоа сафига қайтиши хусусида гапира бошлади: «Менимча, Квальярелла «Наполи»да ўйнаш имкониятига ҳақли эканлигини амалда исботлади. Бизда ёки унда моддиятга тегишли қандайдир муаммо чиқади, деб ўйламайман. Умуман, Квальярелла фаолиятини «Наполи»да тугатиши - бу романтик қарор».
Маълумот учун: Ютуқлари: Италия чемпиони (3 карра): 2011|2012, 2012|2013, 2013|2014; Италия суперкубоги соҳиби (2 карра): 2012, 2013; Италия чемпионатининг энг яхши тўпурари: 2018|2019 (26та гол)
Айтиш жоиз, Кампанияда туғилган Фабио ҳам, унинг бутун оиласи ҳам айнан «Наполи»га содиқ мухлис ҳисобланади. Ҳужумчининг Неа-поль клубига нисбатан кучли меҳрини тушуниш мумкин. Зеро, унинг ёшлиги Диего Марадона «Наполи»да чақнаган вақтларга тўғри келган. Аммо Квальярелланинг ўзига севимли жамоасида муносиб тўп суриш насиб этгани йўқ. У неаполликлар сафидаги қисқа муддат ичида ўзини айтарли кўрсата олмади. Мана, Фабио энди жонажон жамоасига қайтиб, самарали фаолиятига романтик нуқта қўйиши мумкин. Ўзи «А» серияда бош тўпурарга аталган соврин фахрий футболчига насиб этиши одатий ҳолдек. Мисол учун, XXI аср бошида 35 ёшли Дарио Хюбнер нисбатан навқирон Давид Трезеге билан тенг миқдорда гол уриб, мукофотни бўлишиб олганди. Кейин Алессандро Дель Пьеро 33 ёшида муваффақиятга эришди, Антонио ди Натале эса қаторасига 2 марта Италия чемпионатининг энг сермаҳсул футболчиси бўлди - 32-33 ёшида. Лекин бу борада Лука Тонининг мавсум-2014|2015даги кўрсаткичи алоҳида ўрин тутади. Италиялик ҳужумчи 38 ёшида Мауро Икардига жиддий рақобат тақдим этиб, бош тўпурар совринига шериклик қилганди.
Фабио Неаполь яқинидаги мўъжазгина Кастелламмаре-ди-Стабия шаҳарчасида туғулиб-улғайган. Шунинг учун бўлса керак, болалигидан «Наполи»га алоҳида меҳр беради. Фабио ҳозиргача ўз интервьюларида Диего Марадона даврида Неаполда ҳукм сурган ноодатий ва жўшқин футбол муҳити ҳақида тўлқинланиб гапиради. Бироқ Квальярелла севимли жамоаси сафида 26 ёшга тўлганидан кейингина кўриниш беради. Унинг самарали фаолияти «Торино»да бошланади. «А» сериядаги дебютини 17 ёшида «Пьяченца»га қарши кечган баҳсда нишонлаган Фабио кейинги 6 йил давомида Турин клуб ихтиёрида бўлди - асосан захирада ўтирди ёки ижара муддатларини ўтади. Ўзингиз ўйланг, бугунги қаҳрамон ўша вақт давомида «А» сериянинг атиги 5та ўйинида қатнашган ва ҳаттоки, «С»-2 серияда «Фиорентина» шарафини ҳам ҳимоя қилганди. Кейин эса «Кьети» сафига ўтдию, бирданига маҳсулдорликни кескин оширди - «С»-1 сериясининг 1та мавсумида 17та гол. Натижада Квальярелла Туринга қайтиб, «В» серияда 8та гол уришга эришди, бироқ «Торино» молиявий муаммоларга учраб, барча футболчиларига жавоб берди. 2005 йилнинг ёзига келиб, Фабио «А» серияга қайтиб, «Удинезе» билан шартнома тузди, аммо удинеликлар унинг ярим трансфер ҳуқуқини дарҳол «Асколи»га сотишди. Шу тариқа футболчи бу клубда 1 мавсум тўп сурди - 33та ўйинда 3та гол (фақат чемпионатда). Кейинги йил унинг учун бурилиш нуқтасига айланди. Аслида «Сампдория» аввалига Фабиони захира вакили ролида кўрганди, футболчи эса 7-турда илк марта бошланғич таркибда майдонга тушиб, «дубль» қайд этди. Қисқаси, ўша мавсум рақиблар дарвозасини 14 бора «ўқ»қа тутган футболчи ниҳоят, бутун Италия назарига тушди. Аслида унинг фақат голлари эмас, балки ўйин услуби ҳам кўпчиликни қизиқтириб қўйганди. Зеро, Фабио баъзан тўп билан ақлга сиғмайдиган «ҳунар»лар кўрсата бошлаганди. Тез орада футболчини Италия миллий жамоасига ҳам жалб этишди. Бу вақтда «Манчестер Юнайтед» ва «Ювентус» клублари, шунингдек, Миланнинг ҳар икки топ-клуби Квальяреллага жиддий қизиқиш билдиришга улгурганди. «Сампдория» раҳбарияти эса дарҳол етакчи футболчисини сотмаслиги ҳақида баёнот берди. Аммо шу орада Фабионинг шахсий агенти - Стефано Антонелли ўртага тушиб, бошқача гапирди: «Йўқ, Квальяреллани харид қилиш имконияти бор. Бунинг учун даъвогар клуб камида 11 миллион фунт таклиф қилса, бас». Аслида ҳужумчи трансферининг 50 фоизи «Удинезе»га тегишли эди. Кейинчалик Квальярелла учун курашга «Челси» ҳам қўшилди. Унинг ўзи «Ювентус» ёки «МЮ» сафини тўлдиришга мойил эди, аммо якунда маълум сабабларга кўра, «Удинезе»да қолди. Гап шундаки, уденеликлар Фабионинг қолган 50 фоиз ҳуқуқи учун «Сампа»га 7 млн. евро тўлади.
Квальярелла «Удинезе»да гарчи барқарор ўйнаш масаласида баъзи муаммоларга учраган бўлсада, 2 мавсум давомида бинойидек ўсишга эришди: «А» сериянинг ўзида 73та ўйин, 25та гол. У шунингдек, УЕФА кубоги-2008|2009да чакки таассурот қолдирмади. Шундай қилиб, 2009 йилнинг 1 июнь куни Фабио ниҳоят ўз орзусига эришди - «Наполи» билан бирданига 5 йиллик шартнома тузди. Бироқ атиги 1 йилдан кейин неаполликлар билан хайрлашишига тўғри келди. Энг қизиғи, «Наполи» уни ашаддий рақбларидан бири - «Ювентус»га юборди - ижара сафари. Фабио Туринда секин-аста ҳужум чизиғи етакчилари қаторига қўшилгач, «Юве» раҳбарияти 2011 йили унинг трансферини тўлиқ сотиб олди (келишув баҳоси - 10,5 млн. евро). Квальярелла Турин суперклуби билан бир неча марта Италия чемпиони бўлишдан ташқари, ЧЛда муҳим голларни урди, аммо жароҳатга йўлиққанидан кейин бош-қа ҳужумчилар билан рақобатлашишда анча қийналди. Натижада 2014 йил ёзда 3,5 млн. евро эвазига «Торино»га қайтди ва тез орада одатий самарадорлигини тиклади.
Умуман, Квальярелла энг ёрқин даврини яна «Сампдория» сафида ўтказди. Ахир охирги мавсумда кўрсатган жасоратининг ўзиёқ салмоқли тош босади, албатта...
Фабио Квальярелла тенгдошларига назар
Александр Кержаков (Россия). Россиялик буюк тўпурар фаолиятининг охирги 4 мавсумида жами 26та гол урганди. Қисқаси, у 30 ёшдан ошгач, хавфли ҳужумчи мақомини йўқотди.
Робин ван Перси (Голландия). Якунланган мавсум фаолиятига муносиб нуқта қўйди: жонажон клуби - «Фейеноорд» учун Голландия Эредивизионида 16та гол урди.
Клас-Ян Хунтелар (Голландия). Охирги мавсум Голландия элит лигасида 16та гол урган яна бир фахрий ҳужумчи. Фарқи шуки, ван Персидан атиги 1 ҳафта кичик саналган Хунтелар «Аякс» сафида чемпионликни ҳам тантана қилди.
Жермейн Дефо (Англия). 36 ёшига қадар АПЛ талабига жавоб беролмади. Аниқроғи, ўтган йили қишда «Борнмут»дан «Глазго Рейнжерс»га ўтиб (ижара), Шотландия чемпионатида 8та гол урди.
Павел Погребняк (Россия). Охирги мавсум «Урал»да ўйнаган футболчи атиги 3та гол билан чекланди.
Мирко Вучинич (Черногория). Вақтида Квальярелла билан «Ювентус»да бирга ўйнаб, 3 марта скудетто ютган Вучинич 30 ёшида БААга йўл олди ва «Ал-Жазира»да 3 мавсум ўйнагач, фаолиятини тугатди.
Дмитрий Сичев (Россия). Россия футболида катта умид уйғотган Дмитрийнинг катта спортдан кетганига 11 мавсум бўлди.
«А» сериянинг «қария» голеадорлари
(35 ёшдан ошгач, 10та ёки кўпроқ гол урган футболчилар)
Футболчи Клуби Ёши Мавсум Гол
Итало Росси «Про Патрия» 35 1932|1933 10та
Сильвио Пиола «Новара» 35 1948|1949 14та
Сильвио Пиола «Новара» 37 1950|1951 19та
Сильвио Пиола «Новара» 38 1951|1952 18та
Пьетро Феррарис «Новара» 37 1948|1949 10та
Пьетро Феррарис «Новара» 38 1949|1950 10та
Гуннар Нордаль «Рома» 35 1956|1957 13та
Дарио Хюбнер «Пьяченца» 35 2001|2002 24та
Дарио Хюбнер «Пьяченца» 36 2002|2003 14та
Роберто Баджо «Брешиа» 35 2001|2002 11та
Роберто Баджо «Брешиа» 37 2003|2004 12та
Жузеппе Синьори «Болонья» 35 2002|2003 12та
Энрико Кьеза «Сиена» 35 2005|2006 11та
Эуженио Корини «Палермо» 36 2006|2007 10та
Кристиано Дони «Аталанта» 35 2007|2008 12та
Филиппо Инзаги «Милан» 35 2008|2009 13та
Давид ди Микеле «Лечче» 36 2011|2012 11та
Марко ди Вайо «Болонья» 35 2011|2012 10та
Антонио ди Натале «Удинезе» 35 2012|2013 23та
Антонио ди Натале «Удинезе» 36 2013|2014 17та
Антонио ди Натале «Удинезе» 37 2014|2015 14та
Франческо Тотти «Рома» 36 2012|2013 12та
Лука Тони «Верона» 36 2013|2014 20та
Лука Тони «Верона» 38* 2014|2015 22та
Мирослав Клозе «Лацио» 36 2014|2015 13та
Массимо Маккароне «Эмполи» 35 2014|2015 10та
Массимо Маккароне «Эмполи» 36 2015|2016 13та
Фабио Квальярелла «Сампдория» 35 2017|2018 19та
Фабио Квальярелла «Сампдория» 36 2018|2019 26та
-------------------------------------------------------------------------------------------
Тони 26 май куни туғилган, яъни чемпионат финишида 38 ёшга тўлиб бўлганди.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20