Кескин курашлар руҳида ўтган БАА Про-лигаси-2018|2019 якунига кўра, юртдошимиз Отабек Шукуровнинг клуби - «Шаржа» чемпионликни тантана қилганидан кўпчилик хабардор, албатта. Амирликларда ўз ўрнига эга жамоа узун пойгада бир неча йилдан буён шоҳсупанинг юқори поғонасини ҳеч кимга бермай келаётган «Ал-Айн», «Ал-Жазира» каби жиддий рақибларни ортда қолдирди. Умуман, шаржаликлар бутун мавсум давомида етакчиликни қўлдан чиқармай, якунда шоҳсупадан жой олишди. Жамоанинг мазкур зафарига Отабек ҳам муносиб улуш қўшди, албатта. Тўғри, миллий жамоамиз ярим ҳимоячиси жароҳат туфайли ҳал қилувчи аҳамиятга эга охирги ўйинларда қатнашолмади, лекин унинг чемпионлик йўлидаги хизмати катта, барибир. Буни «Шаржа» мураббийлари ҳам эътироф этишди. Хўш, Отабекнинг таассуротлари қандай? Умуман, у қачон сафга қайтади. Ҳамюртимиз билан суҳбат чоғи шу каби саволларга жавоб изладик.
- Отабек, аввало, бироз кеч бўлсада, «Шаржа» учун катта қиймат касб этган чемпионлик унвони билан табриклаймиз. БАА Про-лигаси-2018|2019 шахсан сизда қандай таассурот қолдирди?
- Табрик ва эътибор учун катта раҳмат. Табиийки, чемпионлик унвони осонликча қўлга киритилмади. Бу - бутун мавсум давомидаги тинимсиз кураш ва меҳнат маҳсули. Эътиборлиси, илк турлардан кейиноқ турнир жадвалида пешқадамликни қўлга олдик ва бир зум бўшашмадик. Хуллас, олтин медаль йўлида мислсиз куч сарфладик. Меҳнатга яраша тақдирланганимиздан хурсандман, албатта. Ҳиссиётлар ҳам, таассуротлар ҳам аъло. Буни сўз билан ифодалаб беришим қийин. Ахир «Шаржа» 24 йил бадалига илк марта бош совринга эга чиқди. Жамоа бундан олдин 1996 йили зафар қучган экан.
- Қизиқ, БАА Про-лигасида ўзингиз учун қайси жиҳатларни кашф қилдингиз?
- Мавсум шахсан мен учун янгиликларга бой бўлди. Биринчидан, фаолиятимда илк марта легионер сифатида соврин ютдим. Бундан олдин «Бунёдкор» билан чемпионликка жуда яқин келгандик. Тўғриси, хорижда зафар қучиш икки ҳисса ёқимли экан. Умуман, чемпионат борасидаги хулосаларим ижобий, мослашиш жараёнида ҳам унча қийналмадим. Мақтанишга йўймангу, майдонда эркин тўп сурдим. Ўзи БАА чемпионатининг ҳар мавсуми қизиқарли, кескин тус олади. Чунки 1-ўринга яққол даъвогарлар кўп. Рақобат даражаси баланд. Араб мамлакатларида жамоалар асосан легионерларга суянади - бу барчага маълум. Айниқса, БААда хорижликларга эътибор баланд, талаб ҳам шунга яраша. Қисқаси, легионерлар майдонда катта ҳажмда иш бажаришлари шарт, акс ҳолда, таркибдан тушиб қолишади.
- Шу ютуқларингиз сабабми, сизни БААда муваффақиятли фаолият олиб борган Азиз Ҳайдаровга қиёслаётганлар ҳам бор...
- Сени ўзбек футболида ўз ўрнига эга бўлган, терма жамоамизда ёрқин из қолдирган футболчига ўхшатишларини эшитишинг ёқимли. Азиз акага ҳурматим жуда баланд, ундан ҳам устоз, ҳам дўст сифатида кўп нарса ўргатганган. Ҳозиргача маслаҳат бериб туради.
- Терма жамоалар ва клуб сафида араб жамоаларига қарши кўп бора майдонга тушгансиз. Айтингчи, араб футболи хусусидаги олдинги ва ҳозирги тасаввурингиз ўртасида қандай фарқ бор?
- Тўғри айтдингиз, вақтида ОЧЛ ва терма жамоалар ўйинларида араб футболи билан кўп бора тўқнаш келганман ва умумий фикрим унча яхши эмасди. Энди барчасини БАА чемпионати мисолида кўриб, бу борадаги тасаввурим буткул ўзгарди: араб футболида профессионаллик юқори даражада. Мисол учун, футболчи учун барча зарур шарт-шароитлар яратилган, майдонлар сифати зўр, клублар базаси, маош, мукофот пули - ҳаммаси жойида. Хуллас, бу масалаларда муаммога дуч келмайсиз. Асосийси, ишлар тўғри йўлга қўйилган, фақат битта жиҳат оқсайди - стадионларда мухлислар ташрифи паст. Ҳакамлик савияси ҳам анча юқори. Чунончи, VAR тизими жорий этилган ва учрашувларда қўпол хатолар кузатилмайди, ҳисоб. Раҳбарлар томонидан эътибор кучли, ташкилотчилик зўр. Футболчи бундай шароитда янада ўсиш имкониятига эга.
- Клубингиз чемпионликни тантана қилиш баробарида ОЧЛ гуруҳ босқичи йўлланмасини қўлга киритди. Энди таркиб шунга мувофиқ, кучайтирилса керак. Бош мураббий Абдулазиз Анбарийнинг мавсумолди режалари қандай?
- Таркибни кучайтириш бўйича ишлар бошлаб юборилди. Чунки клуб олдига ОЧЛда яхши натижа қайд этиш вазифаси қўйилмоқда. Бунинг учун эса юқори савияли футболчилар зарур. Афсуски, муваффақиятимизга муносиб ҳисса қўшган Веллитон «Ал-Васл» жамоасига ўтиб кетди. Энди таркиб трансферлар бозори вақти маҳаллий ва легионер футболчилар ҳисобига тўлдирилади, албатта. Кейинги мавсум биз учун мураккаб кечиши аниқ. Ҳар ҳолда, ОЧЛ ва ички чемпионатда бирдек куч сарфлашимизга тўғри келади.
- Ҳаммани бирдек қизиқтираётган масала: Шукуров қачон майдонга қайтади?
- Жамоа раҳбарияти 1 июлгача таътил берган. 6-7 июль кунлари «Шаржа» базасида тўпланамиз ва янги мавсум тадоригини бошлаймиз. Билишимча, илк йиғин учун Германия ёки Австрияга йўл оламиз. Ўйлайманки, айнан у ерда ташкиллаштириладиган назорат учрашувларида майдонга тушсам керак.
- Терма жамоа аъзоси сифатида айтингчи, Эктор Купер ҳимоявий услубдан воз кечяптими?
- Миллий жамоамиз ҳимоявий ўйин намойиш этаётгани ҳақидаги фикрларга қўшилмайман. Ҳа, Эктор Купер бошида, хусусан, илк йиғинларда ўзи маъқул кўрадиган ҳимоявий услубга кўпроқ эътибор қаратгани рост. Лекин Осиё кубогидан аввалги тайёргарлик жараёнида бу услубдан воз кечилди. Чунончи, Купер 4 ой давомида ўзбек футболи билан танишди, чемпионат баҳсларини кўздан кечирди. Якунда футболимизга ҳимоявий ўйин унча мос эмаслигини пайқади, менимча. У назарий машғулотларда ҳам бизда техник-тактик ҳаракатлар, тўп билан муомала қилиш яхши ривожланганини алоҳида таъкидлади: «Аввалги жамоаларимда ҳимоявий услубни жорий этгандим. Сизларда менталитет бунга зид экан, шунинг учун ўзингиз ўрганган услубга қайтамиз, фақат барчасини бироз тартибга келтирамиз». Жаноб Купер ҳозир футболчиларга кўпроқ тўп билан ишлаш ва ҳужумлар ташкил этишни ўргатмоқда. Эътибор беринг, Тошкентдаги охирги 2та ўртоқлик учрашувида ҳам футболчилар тўлиқ устунликка эришишди. Туркия термасига қарши баҳсда эса фақат стандарт вазиятлар қимматга тушди. Ўйлайманки, ҳали ўйин сифати янада ошади, ҳаракат мукаммаллаштирилади.
А.ИСКАНДАРОВ суҳбатлашди
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20