Болалигида отасининг қаттиққўллигидан жабр кўрган бу футболчини бугун бутун дунё танийди. «Тоттенхэм» сафидаги сермаҳсул ўйинлари орқали мухлис орттирган вингер «сариқ қитъа» вакили сифатида Европа Чемпионлар Лигаси финалида ўйнаган иккинчи футболчи бўлди. Бунга қадар унинг ҳамюрти Парк Жи Сун «МЮ» сафида худди шундай шарафга эришганди. Қолаверса, Сон Хюн Мин ЕЧЛдаги осиёлик тўпурарлар рейтингида голлар сони бўйича Ўзбекистон терма жамоасининг собиқ ҳужумчиси Максим Шацкихни ортда қолдирди. Бугун жорий мавсумни ёрқин кўрсаткичлар билан якунлаган ушбу футболчининг ўтмишига назар соламиз.
ҚаттиҚҚўл отанинг мураккаб машҚлари
Сон Хюн Мин уч ёшлигида ота-онаси билан Янги Зеландияга бориб, кейинги олти йилни ўша ерда ўтказишди. Сўнгра оила Жанубий Кореяга қайтди ва болакай дарҳол бошланғич мактабга кирди. Ўқишдан бўш вақтларида у отаси - 28 ёшигача профессионал футболчи бўлган, жароҳат туфайли фаолиятини эрта якунлаган Вун Чун Сон билан машғулот ўтказарди. Собиқ ўйинчи ўғлининг ўзи йўл қўйган хатоларни такрорламаслиги, каттароқ натижаларга эришиши учун қўлидан келган барча ишни қиларди. Катта Соннинг фикрича, муҳими - тўғри тайёргарлик кўриш. Шу тариқа футбол кўникмалари болаликдан шаклланиб боради.
Машғулотлар оғир ва машаққатли кечарди. Сон Хюн Мин бир кунда юз марталаб арғамчида сакрарди, югурарди, тўп билан ва тўпсиз шуғулланарди. Эътиборлиси, битта машқни мукаммал адо этмагунича кейингисига ўтмасди. Маълум вақтгача Сонга дарвоза томон зарба йўллаш ва пас билан ўйнашни пишитиш тақиқланди: отаси дастлаб тўп билан ишлаш ва жисмоний машғулотларни ўтказиш керак, деб ҳисобларди. Ҳар қандай хато қатъий жазоланарди: «Ўғилларимни жуда қаттиқ калтаклайман, чунки баъзан бу зарурдир. Биламан, европаликлар буни тушунишмайди», - деганди Вун Чун Сон кореялик журналист Минха Пакка берган интервьюсида.
Бир сафар Сон акаси билан тортишиб қолганида, отаси буни эътиборсиз қолдирмаганди. «У бизга 4 соат давомида тўпни ерга туширмай тепишни буюрди, - деганди «Тоттенхэм» ярим ҳимоячиси The Guardian нашрига берган интервьюсида. - Уч соатдан сўнг ҳамма нарса кўзимга учта бўлиб кўрина бошлади, пол эса қизил тусга киргандек эди. Жуда чарчадим, отам эса ҳамон ғазабидан тушмаганди. Бу воқеани ҳозир ҳам ҳар сафар учрашганимизда эслаймиз».
Катта Сон ўғлининг мактабидаги жамоани шуғуллантириш учун келганида ҳам машқлар такрорланди. «Машғулотлар дастури ҳамма учун бир хил эди: тўпни 40 дақиқа мобайнида ерга туширмай тепиб туриш керак. Кимдир тўпни ерга тушириб юборса, отам ҳеч нарса демасди. Аммо мен шундай қиладиган бўлсам, ҳамма учун машқ қайтадан бошланишини айтарди. Жамоадошларим унинг ўғли эканлигим учун шундай бўлаётганини тушунишарди, ҳа, жуда қийналганман. Аммо ҳозир ўша воқеаларни эсларканман, отамнинг тўғри йўл тутганини англайман», - деганди Сон ўша Англия нашри вакиллари билан суҳбат чоғида.
14 ёшигача Соннинг отаси ўғлининг расмий ўйинларда иштирок этишига рухсат бермади: «Бунинг ўрнига фарзандимга асосий жиҳатларни ўргатдим - ҳар куни олти соатни шунга ажратардик. Футболчиликда эришолмаган ниятларимга ўғлим етишишини хоҳлардим», - деганди Вун Чун Сон ўз интервьюсида. Шунингдек, талабчан ота машғулотлар пайтидаги ўйинларга ҳам қарши эди: улар кичик ёшдаги футболчининг руҳиятига таъсир ўтказиши мумкин экан.
16 ёшида мактабни ташлаб, Германияга кетди
2008 йили Сон ФК «Сеул» академиясига кирди: машғулот ўтказиш баробарида, асосий жамоа ўйинларида «болбой» вазифасини ўтади. Бир неча ойдан сўнг уч нафар энг яхши ўйинчи қатори уни ҳам Германияга жўнатишди - мазкур дастур Жанубий Корея футбол федерацияси ҳамда «Гамбург» клуби ўртасидаги келишув доирасида амалга оширилганди. Европага кўчиб ўтиш учун мактабни ташлашига тўғри келди, аммо бу қароридан асло афсусланмади: «Ҳа, Корея чемпионатида ўйнашим ҳам мумкин эди, бу турнир ёмон эмасди. Лекин Европа - ҳар бир футболчига жаҳоннинг энг кучли ўйинчиларига қарши тўп суриш имконини тақдим этади». Отаси у билан бирга бориб, базадан унча узоқ бўлмаган меҳмонхонага жойлашди.
Сон билан бир йиллик шартнома имзоланди, аммо бу муддат якунлангач, янгисини таклиф қилишмади. Оқибатда турли кўриклардан ўтишга тўғри келди. Англиянинг икки клуби - «Блэкберн» ва «Портсмут» унга қизиқиш билдирганди, бироқ Сон уларга жавоб бермади, чунки ўша пайт туманли ўлкага кўчиб ўтишга хоҳиши йўқ эди. Бунинг ўрнига жаҳон чемпионати U-17га бориб, терма жамоасининг энг яхши тўпурари бўлди. «Гамбург» у билан яна алоқага чиқиб, тўрт йиллик шартнома таклиф қилди - Сон рад этмади. 18 ёшигача ёшлар жамоаси ўйнади, сўнгра асосий таркибга ўтди ва дастлабки мавсумдаёқ клуб тарихидаги энг ёш тўпурарга айланди.
Орадан уч йил ўтиб, Сон «Байер»га ўтди: леверкузенликлар 10 млн. евро тўлаш орқали ўша пайт учун жамоа тарихидаги энг қиммат трансферга қўл уришди. Яна бир трансфер рекорди икки йилдан сўнг кузатилди: «Тоттенхэм» Сонни 30 млн. еврога сотиб олиб, уни Осиёнинг энг қимматбаҳо футболчисига айлантирди.
Биринчи мавсумдан кейин «Тоттенхэм»дан кетмоҚчи бўлган
Асосий таркибдаги 13та ўйин - Сон хоҳлаган натижа эмасди. Ўзи учун мавсумни омадсиз ўтди деб ҳисоблаган футболчи кетишни хоҳлади (унга Германиядан таклифлар бўлганди), аммо Почеттино ўз режаларида кореялик футболчига ҳам жой борлигини айтиб, уни қолишга кўндирди. Аммо янги мавсумда ҳаммаси янада ёмонроқ бўлди: мураббий Сондан шу қадар норози эдики, унинг олдига ультиматум қўйишгача борди. Кейинги ўйинда эса қаҳрамонимиз учта гол урди.
Икки оёҒида бир хил ўйнайди
Соннинг болалик чоғларида отаси унга ҳар икки оёғида бир хилда тўп суриш кераклигини уқтириб, шунга яраша машғулот ўтказарди: буни ҳар бир футболчи учун муҳим деб биларди. Сонда асосий оёқ ўнги ҳисобланади, чапига эса зарбаларнинг 42 фоизи тўғри келади.
Ҳарбий хизматдан озод бўлди
2018 йилнинг ёзида Соннинг тақдири Жанубий Корея термасининг Осиё ўйинларида қандай қатнашишига боғлиқ бўлиб қолди. Бунга қадар «Тоттенхэм» футболчиси мажбурий ҳарбий хизматни ўтаб улгурмаганди: Жанубий Корея қонунларига кўра, 18 ёшдан 35 ёшгача (агар спортчи бўлса, 28 ёшгача) бўлган ҳар бир эркак киши уни ўташи шартлиги белгиланган. Армиядан озод бўлиш учун футболчининг олдида иккита йўл бор эди - Олимпиадада олтин медаль ютиш ёки Осиё ўйинларида чемпион бўлиш.
2014 йили ҳам Сонда шундай имконият туғилган, ўшанда Жанубий Корея термаси Осиё ўйинлари финалида КХДР устидан зафар қучганди. Аммо қаҳрамонимизни клуби ўша мусобақага қўйиб юбормаганди: «Байер» ОЎ мусобақаси ФИФАнинг расмий тақвимига кирмаслигини сабаб сифатида кўрсатганди. Бу сафар ҳаммаси муваффақиятли кечди: «Тоттенхэм» Сонни қўйиб юборди, финалда эса кореяликлар японларни мағлубиятга учратишди.
Ота-онаси билан яшайди
Ҳа, Сон 26 ёшда ва Лондондаги уч хонали квартирада ота-онаси билан бирга истиқомат қилади. Аммо бу факт уни заррача хавотирга солмайди: «Европа ва Осиёда бундай ҳолатга турлича қаралади, - деганди у The Guardian нашрига берган интервьюсида. - Бу ердагилар «Нега у ота-онасидан алоҳида яшамайди?» деб ҳайрон бўлишади. Лекин ким мен ҳақимда қайғуряпти? Ким футбол ўйнашимга ёрдам беряпти? Айнан ота-онам. Улар одатий ҳаётларини ташлаб, менга кўмаклашиш учун бу ерга келишган».
Кореялик ярим ҳимоячи асосан футболчилар билан суҳбатлашади - турли сайрлар, зиёфатларга вақти йўқ, бор эътибори футболга қаратилган. Шу боис машғулотлар ва ўйинлардан сўнг дарҳол уйига боради.
Фаолиятини якунлаганидан кейин уйланмоҚчи
Отасининг яна бир талабига Сон сўзсиз итоат қилади. «Уйланганингда, оила, рафиқа ва фарзандлар биринчи ўринга чиқади, шундан кейингина футбол ҳақида ўйлайсан, - деганди Сон интервью пайтида. - Юқори даражада ўйнаётган пайтимда футбол мен учун биринчи рақамли бўлишини хоҳлайман. Шундай савияда яна қанча ўйнашим мумкинлигини билмайман. 33 ёки 34 ёшда фаолиятни тугатгандан кейин ҳам ўз оиланг билан узоқ вақт яшашинг мумкин. Тўғри, аксарият мураббийларга футболчининг уйланган бўлиши маъқул, акс ҳолда, бўйдоқларни майдон ташқарисида назорат қилиш қийин, улар тунги клубларда кайфу сафога берилишлари, алкоголь истеъмол қилишлари ёки шунга ўхшаш ишларни амалга оширишлари эҳтимоли йўқ эмас. Мен эса бундай нарсалардан йироқман».
Унинг кумири - Роналду
Яна ўша The Guardian уюштирган интервьюда бошқа бир қизиқарли факт ойдинлашганди: «Ўз иқтидоримни намоён этишдан кўра, профессионал бўлишни нисбатан аҳамиятлироқ деб биламан. Ҳақиқий профессионал - бу менинг кумирим Роналду. У кўп ютуқларга иқтидори эмас, асосан катта меҳнат эвазига эришган. Фақатгина қобилиятни етарли деб биладиган кўплаб футболчиларни биламан. Аммо аслида бундай эмас. Ўз устингизда қўшимча тарзда ишлаш ҳам керак».
Ҳар бир жамоадошга алоҳида услуб
«Мен учун қўл сиқишиш - ўзига яраша ҳаракат ҳисобланади, - дейди у. - Бу йигитлар мен учун нафақат жамоадош, балки дўст ҳам ҳисобланишади. Уларнинг ҳар бирига персонал қўл сиқишишни ўйлаб топганман: умид қиламанки, бошқаларга ҳам бу нарса ёқади».
А.Абдуҳамитов тайёрлади.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20