Душанба куни Франческо Тотти матбуот анжумани ташкил қилиб, «Рома» директори лавозимидан кетиши сабабларини ошкор қилди. Клубнинг расмий медиа каналлари бу анжуманни трансляция қилишдан бош тортишди.

 «Император» матуот анжуманида қуйидагиларни гапириб ўтди:

- «Рома»нинг америкалик раҳбарлари қобилятсизлар. Бюджетдаги тешикни ямаш учун футболчиларни сотишни ҳар қандай аҳмоқ эплайверади. Уларга ҳақиқатни айтганимда («Рома»нинг тўрт ёки бешинчи ўринни олиши, «Ювентус»нинг январдаёқ чемпионликни ҳали қилиши), мени қобилиятсизликда айблайшди. Жеймс Паллотта Римга бир йилдан бери келмайди. Қобилиятсиз эса менман. Ажойиб!

Ўзим ишлашни истаган тармоқда имкониятга эга бўлмадим. Президент­га Римга келиб, клубни бошқариши лозимлигини бир неча бор айтганман. Натижада биз сичқонларимизни истаган ерда айлантирдик, ахир мушук йўқ эди-да.

Кетишга қарор қилишимга сабаб - одамларга, ўйинчиларга нисбатан хоинликни кўрдим. Бу жараёнда иштирок этишни истамайман. Агар «Рома»да раҳбарият ўзгарса, уни биринчилардан бўлиб қўллаб-қувватлайман. Бу америкаликлар ва Бальдинига нисбатан ҳеч қандай ишончим қолмади.

Улар клуб муаммога дуч келганида мендан маслаҳат олишган. Ҳаммаси яхши бўлганда эса мени ҳеч ким эсламади. Икки йил давомида атиги ўнта йиғилишда бўлдим. Бунинг устига, менга сўнгги дақиқаларда қўн­ғироқ қилишарди. Худди атайин боришимни истамагандек. Мендан худди Пиноккио сингари фойдаланишди. Бу нафақат директорга, балки бир инсонга нисбатан ҳурматсизликдир.

«Рома» мен учун жуда муҳим. Клубдан кетиш худди ўз жонига қасд қилишдек қийин бўлди. «Рома»ни тарк этгандан кўра, бугун ўлиб қолганим яхши эди... Бу қарорга келишдан олдин роса йиғладим.

Нима учун Лондонга раҳбарият ва Фонсека билан учрашувга бормадим? Биринчидан, саммит ҳақида икки кун олдин билдим. Иккинчидан, мураббийни менсиз танлашди (янги спорт директори танлашдими ёки йўқми, бундан бехабарман). Тасаввур қилинг: Антонио Контега қўнғироқ қиляпман (фақат Конте билан шахсан боғланганман), у эса «Рома» Фонсека билан келишиб олганини мендан олдин билибди. Аҳмоққа ўхшаб қолдим.

Бош директор Гвидо Фиенга - мени қўллаб турган ягона инсон. Агар у бўлмаганида мени худди Де Росси каби аллақачон кўчага улоқтирган бўлишарди. Гвидо иккимиз «Рома»га Клаудио Раньерини таклиф қилганмиз (айтганча, бу инсонга миннатдорчилик билдирмоқчиман. Уни ҳеч қачон молиявий саволлар қизиқтирмаган. «Рома»нинг ҳақиқий фахри. Мавсумнинг сўнгги ойларида текинга ишлади. У керак бўлиб қолса, фақат бир гапни эшитардик: «Эртага Тригорияга бораман»).

Фиенга мени техник директор қилмоқчи эди. Лекин ҳар сафар шартномам борасида гап бошласа, кимдир йўлига тўсқинлик қилаверган. Кимлигини яхши билиб турибсиз. Мен аҳмоқ эмасман (Франко Бальдинига шаъма қилиняпти - таҳ.).

Паллотта? У ўз баёнотлари орқали алдайди (яқинда «Рома» президенти Тоттини Лондондаги саммитга таклиф қилганини айтганди, - таҳ.). Оёғимдан чаладиганлар билан ишлай олмайман. Мисол учун, Паулу Фонсека менинг танловим бўлмаган. Мен Контени таклиф қилмоқчи эдим. Уни жамоадаги инқирозни ҳал қиладиган ягона мураббий, деб ҳисоблагандим. Агар Антонио розилик берганида (оғзаки «ҳа» деб жавоб берганди), клубда қолардим. Ўз қарорларидан олдинроқ хабар қилиб туришганида кетмасдим. Айтганча, аввалига Фиенга икковимиз Конте билан келишиб қўйгандик. Гвидо Паллоттага қўнғироқ қилди. У эса номзодимизни маъқуллади. Лекин ўйинга бир киши қўшилиб, вариантни йўққа чиқарди.

Бу йил «Рома» 50-60 миллион евролик қарзга ботди. Улар яна футболчиларни сотишади. Паллотта атрофига қобилиятсиз инсонларни йиғиб олган ва фақат ўшаларга қулоқ солади. У ўзига савол бериб кўриши керак.

Менинг Тригорияда бўлишимни истамайдиган инсонлар бор. Уларнинг исмларини айтиб ўтирмайман (Паллотта улар орасида йўқ). Аммо шуни айтмоқчиманки, улар менга эмас, балки «Рома»га қарши ишлаш­япти.

Бальдини? Иккимиздан биримиз кетишимиз керак эди. Мончи билан ҳамкорлик? Бир мисол келтирмоқчиман: таътилдан қайтганимда Рамон мендан бир футболчи ҳақида сўради. У кўпдан бери ўйнамаётганди (гап Пасторе ҳақида кетяпти, - таҳ.). Ушбу футболчининг Ди Франческо танлаган ўйин услубига мос келмаслигини айтдим. Унга «Аякс»даги ўзимнинг вариантимни (гап Ҳаким Зиеш ҳақида кетмоқда, - таҳ.) айтдим. Нима деб ўйлайсиз? Кейинчалик Мончи барибир ўша футболчи билан шартнома имзолади. Ди Франческони ҳам мураббий сифатида мен танламаганман. Уни ҳам Мончи танлаган. Эусебионинг тарафини олмоқчи эмасман. Лекин ЕЧЛ ярим финалидан сўнг у 3-4 нафар футболчи харид қилиш кераклигини айтди. Мончи Ди Франческо сўраган бирорта ҳам ўйинчини сотиб олмади.

Агар мендан бирор-бир футболчи «Рома»га ўтсам бўладими?» деб сўраса, унга бор ҳақиқатни айтаман. Ҳақиқат шундаки, «Рома»да ҳозир тартибсизлик ҳукмрон.

Ҳамиша «Рома»га мухлислик қиламан. Унга «алвидо» демайман. Шунчаки, «кўришгунча» дейман.